Contact Us

SON XƏBƏRLƏR

İran Azərbaycandakı ravvinə qarşı terror hazırlayırmış

2025.04.06, 09:14
İran Azərbaycandakı ravvinə qarşı terror hazırlayırmış

İranın xüsusi xidmət orqanı Azərbaycandakı aşkenazi yəhudilərinin baş ravvini Şneor Seqala sui-qəsd hazırlayıbmış. Bu barədə “The Washington Post” Qərb ölkələrindən birinin kəşfiyyat orqanındakı mənbəyə istinadla məlumat yayıb.

Gunaz.tv

Xəbərdə deyilir ki, İslam İnqilabının Keşikçiləri Korpusunun “Sepah-e-Qods” briqadasının zabiti ravvini öldürməsi üçün Aslanov soyadlı gürcüstanlı narkotik qaçaqmalçısını ələ alıbmış. Aslanova ravvinin fotosu, həmçinin ətraflı təlimat verilib və “xidmətinə” görə $200.000 vəd olunub.

 

Aslanov İranda “Sepah-e-Qods”un nümayəndələri ilə görüşəndən sonra Azərbaycana qayıdıb və İsmayılov soyadlı yerlisini ravvini izləmək işinə cəlb edib. Lakin Azərbaycanın təhlükəsizlik orqanları onları həbs ediblər.

 

Məsələyə münasibət bildirən Şneor Seqal “The Washington Post”a deyib ki, bu haqda məlumatı Azərbaycan mediasından oxuyub və bu ölkədə özünü çox güvənli hiss edir.

 

Yada salaq ki, yanvar ayında Azərbaycanın Dövlət Təhlükəsizlik Xidməti (DTX) Azərbaycanda dini icmalardan birinin rəhbərinə qarşı sui-qəsd hazırlayan iki şəxsin - Gürcüstan vətəndaşları Aqil Aslanov ilə Azərbaycan vətəndaşı Ceyhun İsmayılovun saxlanıldığı haqqında məlumat yaymışdı. Amma məlumatda onların İrana "işlədikləri" barədə heç nə deyilmirdi.

 

Qəzet xatırladır ki, bu, İranın törətmək istədiyi sui-qəsdlərlə bağlı tək nümunə deyil. 2023-cü ildə Almaniya Prokurorluğu İranı sinaqoqlara və yəhudi məktəblərinə hücum təşkil etmək üçün yerli kriminaldan yararlanmaq cəhdində ittiham etmişdi. 2024-cü ilin martında Peru polisi İranın Qüds qüvvələrini təmsil edən şəxsi İsrail vətəndaşına sui-qəsd cəhdinə görə saxlamışdı. Ötən ay isə Nyu-York məhkəməsi Rafat Əmirov və Polad Ömərov adlı iki şəxsi iran mənşəli amerikalı jurnalist və ictimai fəal Məsih Əlinecatı öldürmək istədiklərinə görə həbs edib.

Rusiyadakı mütəşəkkil cinayətkar dəstələri ilə əlaqəsi olan bu iki şəxs jurnalisti Bruklindəki evində öldürməyə görə İslam İnqilabının Keşikçiləri Korpusundan $500,000 alacaqmışlar. Məsih Əlinecatı İranda insan haqları ilə bağlı fəal çıxışlar edir və hicab məcburiyyətini pisləyir, iranlı qadınları hicabsız şəkillərini paylaşmağa çağırır.

Açar Sözlər :

SEÇİLMİŞ XƏBƏRLƏR

Çox oxunanlar