Pezeşkiana dəstək kampaniyası başladı - Aşeriyə qarşı cinayət işi açıldı

SON XƏBƏRLƏR

Pezeşkiana dəstək kampaniyası başladı - Aşeriyə qarşı cinayət işi açıldı

2025.07.10, 11:36

Rəşt Şəhər Şurasınnı üzvü Rza Aşerinin İran Prezidenti Məsud Pezeşkiana qarşı paylaşımından sonra, bir qrup ziyalı və ictimai fəalın təşəbbüsü ilə Aşeriyə qarşı imza kampaniyası başladılıb.

Gunaz.tv

Bu haqda yerli mediada məlumat yayılıb.

"Rza Aşerinin paylaşımı təxribat xarakterli olmaqla yanaşı, həm də təhlükəsizlik əleyhinə, xalqın səsinə, respublika quruluşu prinsipinə açıq-aşkar təhqirdir",- kampaniya təşəbbüsçüləri yazıblar.

Bildirilib ki, məhkəmə sistemi və əlaqədar dövlət qurumları Rza Aşeri və onun kimi sərt xətt tərəfdarlarının təhlükəli çağırışlarına görə qəti addım atmalıdır:

"Bu cür bəyanatlar qarşısında susmaq xaosa, siyasi etibarsızlığa, sistemin əsaslarına hücumlara yol aça bilər. Biz bu şəxsə qarşı məhkəmə sistemindən dərhal, şəffaf və qətiyyətli cavab tələb edirik. Bu gün hüquqi və qəti cavab verilməsə, sabah sistemin legitimliyi, məmurların təhlükəsizliyi, xalqın səsi təhlükə altında olacaq".

Kampaniya başladılandan sonra Gilan Əyalət Prokurorluğu Məsud Pezeşkianı öldürməyə çağıran Rəşt Şəhər Şurasının üzvü Rza Aşeriyə qarşı cinayət ittihamı elan edib.

"Rəşt Şurası üzvünün sosial şəbəkədəki səhifəsində məlum materialın paylaşılmasından sonra əyalət prokuroru məhkəməyə müraciət edərək, onun məhkəməyə çağırılması barədə göstəriş verib",- məlumatda deyilir.

Bildirilib ki, cinayət işi açıldıqdan və məhkəmə işi qaldırıldıqdan sonra sözügedən şəxs "ictimai rəyi narahat etdiyi üçün" məhkəməyə çağırılıb və hazırda iş üzrə ibtidai araşdırma aparılır.

Qeyd edək ki, iki gün əvvəl Rəşt Şəhər Şurasının üzvü Rza Aşer, özünün sosial media hesabında etdiyi paylaşımında İsrail hökumətini İran Prezidenti Məsud Pezeşkianı öldürməyə çağırıb.

İsrailin keçmiş prezident İbrahim Rəisini hədəf aldığını iddia edən Aşeri, yazıb ki, İsrail Məsud Pezeşkianı öldürərsə, İran müharibədə məğlubiyyəti qəbul edəcək.

Şəhər Şurasının üzvü rişxəndlə Məsud Pezeşkianın keçmiş Prezident İbrahim Rəisidən daha radikal olduğunu və şəhid olmağın ona daha çox yaraşdığını qeyd edib.

Rza Aşeri mühafizəkar siyasi cərəyanın tərəfdarıdır və ötən il keçirilən prezident seçkilərində Məsud Pezeşkianın əsas rəqibi Səid Cəlilinin bölgədəki seçki qərargahının rəhbəri olub.

GünazTV

GUNAZ.TV

SON XƏBƏRLƏR