Belçika Nümayəndələr Palatası SEPAH-ı terror təşkilatı kimi tanıdı

SON XƏBƏRLƏR

Belçika Nümayəndələr Palatası SEPAH-ı terror təşkilatı kimi tanıdı

2025.07.18, 12:13

Bu gün iyulun 18-i səhər saatlarında Belçikanın Nümayəndələr Palatası İran İnqilab Keşikçiləri Korpusunu (SEPAH) terror təşkilatı kimi tanıyan qətnamə qəbul edib.

Gunaz.tv

Bu haqda beynəlxalq media məlumat yayıb.

Belçikalı nümayəndələr İranda saxlanılan azərbaycan əsilli İsveç vətəndaşı professor Əhməd Rza Cəlalinin dərhal azad edilməsini tələb edib və İranda bir sıra siyasi məhbusların edam edilməsi ehtimalına görə narahatlıqlarını bildiriblər.

Qətnamədə İranda professor Cəlalinin girov götürülməsi, zorakılıq, insan haqlarının pozulması, qeyri-insani cəzalar, edam sayının artması, etnik azlıqlara qarşı repressiya, əfqan qaçqınlarının deportasiyası və başqa insan haqları pozuntuları pislənilib.

Belçikalı nümayəndələr Belçika hökumətini İran rejiminin bir neçə siyasi məhbusun edamını və başqa siyasi məhbuslara qarşı edam hökmlərinin çıxarılmasını qətiyyətlə pisləməyə, bu barbar hərəkətlərə qarşı Avropa səviyyəsində daha sərt tədbirlər görməyə çağırıblar.

Bununla yanaşı, onlar Belçika hökumətini İslam İnqilabı Keşikçiləri Korpusunun digər Avropa Birliyinə üzv dövlətləri ilə birlikdə Avropanın terror təşkilatları siyahısına salınması üçün lazımi addımları atmağa dəvət ediblər.

Qətnamədə xüsusilə İran rejiminə qarşı daha güclü iqtisadi sanksiyaların tətbiqi istənilib.

Həmçinin İranda siyasi məhbusların edamında iştirak edən hakimlər, prokurorlar, həbsxana rəhbərləri və digər ədliyyə işçiləri də daxil olmaqla sanksiya siyahısının genişləndirilməsi tələb olunub.

Qətnamə Belçika hökumətini İran rejiminin girov diplomatiyasına qarşı mübarizəni gücləndirməyə çağırıb.

Qeyd edək ki, Yeni Flamand Alyansı və Liberal Partiyasının təqdim etdiyi qətnamə daha əvvəl parlamentin xarici əlaqələr komitəsi tərəfindən təsdiqlənmişdi.

GünazTV

GUNAZ.TV

SON XƏBƏRLƏR