Axios-un ABŞ-ın yüksək rütbəli rəsmilərinə istinadən verdiyi məlumata görə, ərəb və müsəlman liderlərin təcili təzyiqlərindən sonra İran və ABŞ arasında Omanda keçirilməsi planlaşdırılan görüş yenidən gündəmə alınıb. Regiondan ən azı 9 ölkə bu görüşün ləğv edilməməsini tələb edib və Vaşinqton skeptik mövqeyinə baxmayaraq, “müttəfiqlərə hörmət və diplomatik prosesin davam etdirilməsi naminə” buna razılıq verib.

İran və ABŞ danışıqları yalnız nüvə məsələsi ilə məhdudlaşdırmaq barədə razılaşmadan sonra görüşəcək.

Danışıqların ləğv edildiyi barədə məlumatlardan sonra İranın xarici işlər naziri Abbas Əraqçi bildirib ki, görüş cümə günü saat 10:00-da keçiriləcək. ABŞ tərəfi də danışıqların baş tutacağını təsdiqləyib. Bu, ABŞ Prezidenti Donald Trampın İranın ali rəhbərinin “çox ciddi narahat olmalı” olduğu barədə xəbərdarlığından sonraya təsadüf edir.

Abbas Əraqçi israrla vurğulayıb ki, ABŞ və İran arasında danışıqlar ləğv edilməyib və onların gələn cümə günü keçirilməsi planlaşdırılır. ABŞ-dan bir rəsmi də Reuters agentliyinə bildirib ki, danışıqlar cümə günü Omanda baş tutacaq.

Tehranda isə rəsmi dairələr çərşənbə axşamı axşam saatlarında vəziyyəti adi göstərməyə çalışıb və ABŞ mediasında yayılan danışıqların ləğvi ilə bağlı xəbərləri nə təsdiqləyib, nə də təkzib ediblər. Bunun əvəzinə bildiriblər ki, İran ABŞ-ın təzyiqlərinə boyun əyməyəcək və nüvə dosyesindən kənar mövzuları müzakirə etməyə hazır deyil.

İran hakimiyyətinə yaxın olan Tasnim xəbər agentliyi iddia edib:

“Görünür, ABŞ və İsrail İranın qəti mövqeyindən sonra danışıqların əvvəlki çərçivəsini qəbul ediblər.”

Əraqçinin paylaşımı, Prezident Donald Trampın NBC-yə verdiyi müsahibədən az sonra yayımlanıb. Tramp bildirib ki, Tehran hələ də danışıqlar aparır, lakin İranın ali rəhbəri Əli Xamenei “çox ciddi narahat olmalıdır”.

Tramp əlavə edib ki, ABŞ İranın yeni nüvə obyektinin yaradılması cəhdlərini müəyyən edib və xəbərdarlıq edib:

“Ona dedim ki, bunu etsəniz, sizə qarşı çox pis addımlar atacağıq.”

Əgər Əraqçinin açıqlamaları doğru çıxarsa, Wall Street Journal-ın yazdığına görə, bu Tehran üçün “kiçik bir qələbə” sayıla bilər. Son 24 saat ərzində İran danışıqların keçirilmə yerini Türkiyədən Oman paytaxtı Məsqata köçürməyə çalışıb. Bununla belə, danışıqların necə və kimlərin iştirakı ilə keçiriləcəyi hələ də dəqiqləşməyib.

Stiv Uitkoff və Cared Kuşnerin – Donald Trampa yaxın şəxslərin – Abbas Əraqçi ilə birbaşa görüş keçirməsi ehtimalı da gündəmdədir.

İran bəyan edib ki, danışıqlar yalnız nüvə məsələsi ilə məhdudlaşmalıdır və ballistik raketlər, eləcə də regiondakı silahlı qruplaşmaların maliyyələşdirilməsi kimi mövzular gündəmdə deyil.

ABŞ dövlət katibi Marko Rubio isə bildirib ki, əgər İran danışıqlardan real nəticə gözləyirsə, ballistik raketlər, regiondakı silahlı qruplara dəstək və İranın öz vətəndaşlarına münasibəti kimi məsələlər də müzakirə olunmalıdır. Tehran bu mövzuları qəbul etmir.

Rubio sonradan əlavə edib: “Əgər İran cümə günü görüşmək istəyirsə, biz hazırıq. ABŞ danışmağa hazırdır və həmişə də hazır olub.”

GünazTV