Tehran Trampın tələblərini rədd etdi

SON XƏBƏRLƏR

Tehran Trampın tələblərini rədd etdi

2026.02.27, 08:10

Nə uranın zənginləşdirilməsi dayandırılır, nə də ehtiyatlar başqa ölkəyə göndərilir. Raket proqramı və bölgədə silahlı qruplara dəstək də danışıqlar mövzusu deyil.

Gunaz.tv

İran ilə ABŞ arasında nüvə danışıqları (26 fevral 2026) tarixində Cenevrədə başa çatıb. İranın dövlət mediası bildirib ki, Tehran açıq şəkildə Donald Trampın irəli sürdüyü tələbləri qəbul etməyib və uranın zənginləşdirilməsi proqramını davam etdirəcək.

Yayılan məlumatlara görə, İran zənginləşdirilmiş uranın xarici ölkəyə köçürülməsi təklifini də rədd edib. Bu məsələ Trampın İranın nüvə proqramını məhdudlaşdırmaq üçün əsas şərtlərindən biri hesab olunurdu.

Dövlət mediası vurğulayıb ki, uranın zənginləşdirilməsi Tehran üçün “danışıqsız hüquqdur” və ehtiyatların dayandırılması və ya ölkədən çıxarılması gündəmdə deyil. Bu mövqe Tramp administrasiyasının açıqladığı tələblərlə birbaşa ziddiyyət təşkil edir.

İran rəsmiləri əlavə olaraq bildiriblər ki, raket proqramı və bölgədə silahlı qruplara dəstək məsələsi də müzakirə predmeti deyil. Bu isə Tehranın Trampın təklif etdiyi paketlə razılaşmaq niyyətində olmadığını göstərir.

Texniki danışıqların yaxın günlərdə Vyanada davam etdirilməsi planlaşdırılır. Lakin tərəflər arasında birgə bəyanat yayılmayıb.

Görüşlərdə Trampın xüsusi nümayəndəsi Stiv Uitkof ilə İranın xarici işlər naziri Abbas Əraqçi iştirak edib. Həmçinin Beynəlxalq Atom Enerjisi Agentliyi rəhbəri Rafael Qrossi də prosesə cəlb olunub.

Mövcud fikir ayrılığı danışıqlardakı əsas gərginlik nöqtəsi olaraq qalır. Çünki Trampın əsas məqsədi İranın nüvə silahına aparan yolunun tam bağlanmasıdır. ABŞ mediasının və Ağ Evin mövqelərinə əsasən, Trampın tələbləri bir neçə əsas istiqaməti əhatə edib:
^{1. Uranın zənginləşdirilməsinin dayandırılması və ya ciddi məhdudlaşdırılması

2. Zənginləşdirilmiş uran ehtiyatlarının xaricə çıxarılması

3. Agentliyin nəzarət və yoxlama səlahiyyətlərinin genişləndirilməsi

4. Uzunmüddətli və daimi məhdudiyyətlərin tətbiqi

5. Raket proqramı və bölgə siyasətinin danışıqlara daxil edilməsi

6. Saziş pozularsa, sanksiyaların sürətli şəkildə bərpası mexanizmi}
Hazırkı vəziyyət göstərir ki, tərəflər arasında prinsipial mövzularda razılıq hələ əldə olunmayıb.

GünAzTV
R.G

GUNAZ.TV

SON XƏBƏRLƏR