Müctəba Xamenei İranın yeni lideri elan edildi

SON XƏBƏRLƏR

Müctəba Xamenei İranın yeni lideri elan edildi

2026.03.09, 07:34

İran Ekspertlər Məclisinin açıqlamasına əsasən, Müctəba Xamenei bazar ertəsi, 9 mart səhər saatlarında İranın üçüncü lideri kimi təqdim olunub.

Gunaz.tv

GünAzTV-nin məlumatına görə, Ekspertlər Məclisi bazar günü axşam yaydığı bəyanatda Müctəba Xameneinin nümayəndələrin “qəti səsi” ilə İranın yeni ali lideri seçildiyini bildirib.

İranın siyasi sistemində ali liderin seçilməsi səlahiyyəti Ekspertlər Məclisinə məxsusdur. Bu qurum daha əvvəl İslam Respublikasının qurucusu Ruhullah Xomeyni və ondan sonra Əli Xameneini ölkənin ali lideri kimi seçmişdi.

Müctəba Xameneinin adı son iyirmi il ərzində İran rəhbərliyində varislik məsələsi ilə bağlı müzakirələrdə tez-tez hallanırdı. O, Əli Xameneinin ikinci oğlu hesab olunur və uzun illərdir ki, ali liderin ofisinə yaxın dairələrdə nüfuz sahibi olan fiqurlardan biri kimi tanınır.

Bununla yanaşı, Müctəba Xamenei ictimaiyyət qarşısında çox nadir hallarda görünən şəxslərdən biri olub. İran siyasətində fəaliyyət göstərən bir çox fiqurlardan fərqli olaraq, o, mediada az-az çıxış edib və onun ictimai nitqləri olduqca məhdud sayda yayımlanıb.

Son illərdə müxtəlif hesabatlarda onun İran hakimiyyətində bəzi qeyri-rəsmi təsir imkanlarına malik olduğu, xüsusilə təhlükəsizlik strukturları və Sepah Pasdaran ilə əlaqələrinin mövcudluğu barədə iddialar irəli sürülmüşdü. Lakin bu məlumatlar heç vaxt rəsmi şəkildə təsdiqlənməyib.

Bununla yanaşı, GünAzTV daha əvvəl yaydığı xəbərlərdə Ekspertlər Məclisinin Sepah Pasdaranın təzyiqi altında Müctəba Xameneini İranın növbəti lideri kimi müəyyənləşdirdiyini bildirmişdi.

^{Müctəba Xamenei İranın yeni Ali Rəhbəri seçilib}

Son günlərdə isə Ekspertlər Məclisinin bəzi üzvləri yeni liderin seçildiyi barədə xəbərləri təkzib etmiş və bu məsələ ilə bağlı yekun qərarın verilmədiyini açıqlamışdılar.

GünAzTV
R.G

GUNAZ.TV

SON XƏBƏRLƏR