İsrailli rəsmisi: İran hakimiyyətində “çatların əlamətləri” görünür

SON XƏBƏRLƏR

İsrailli rəsmisi: İran hakimiyyətində “çatların əlamətləri” görünür

2026.03.16, 06:43

Gunaz.tv

İsrailin yüksək vəzifəli bir rəsmisi İran hakimiyyətinin strukturunda çatların yaranmasına dair əlamətlərin göründüyünü bildirib və bu hakimiyyətin devrilməsi üçün şəraitin formalaşdırıldığını vurğulayıb.

Gunaz TV-nin məlumatına görə, “The Times of Israel” qəzeti adının açıqlanmasını istəməyən israilli yüksək vəzifəli bir rəsmiyə istinadən yazıb ki, İran hakimiyyətinin daxilində “çatların əlamətləri” müşahidə olunur.

Həmin israilli rəsmi bu media orqanına açıqlamasında deyib: “Biz İran hakimiyyətində çatların əlamətlərini görürük.”

O əlavə edib: “Biz bu hakimiyyətin devrilməsi üçün şərait yaradırıq”, lakin eyni zamanda vurğulayıb ki, sonda İran hakimiyyətinin taleyi İran daxilində yaşayan insanların iradəsindən asılıdır.

İsrailli rəsmi həmçinin bildirib ki, bu proses vaxt apara bilər, lakin onun sözlərinə görə, “bu, sonsuz bir müharibə olmayacaq” və hadisələrin gedişi “planlaşdırılandan xeyli irəlidədir”.

Eyni zamanda İsrailin 14-cü televiziya kanalı da ayrı bir reportajında İran hakimiyyətinin strukturunda çatların yaranması barədə məlumat yayıb.

Həmin reportajda qeyd olunur ki, xarici təzyiqlərlə yanaşı, ölkə daxilində də böhran əlamətləri üzə çıxmağa başlayıb və bəzi təhlükəsizlik və hüquq-mühafizə qüvvələri verilən əmrləri yerinə yetirməkdən imtina edir və ya vəzifələrini tərk edirlər.

Məlumata görə, daha əvvəl İran İnqilab Keşikçiləri Korpusu sıralarında xidmətin tərk edilməsi ilə bağlı xəbərlər yayıldıqdan sonra, indi bəzi polis qüvvələri arasında da əmrlərə tabe olmamaq və xidməti tərk etmə halları barədə məlumatlar yayılmağa başlayıb.

Müşahidəçilər hesab edir ki, bu hadisələrin ümumi mənzərəsi İran hakimiyyətinin daxilində parçalanmanın dərinləşdiyini göstərən əlamətlərdən biri ola bilər. Son həftələrdə müxtəlif media və siyasi təhlillərdə də bu mövzuya dəfələrlə diqqət çəkilib.

GünAzTV
R.G

GUNAZ.TV

SON XƏBƏRLƏR