“İqtisadi terrorizm”; Hörmüz boğazının bağlanmasına görə BƏƏ-dən misilsiz xəbərdarlıq

SON XƏBƏRLƏR

“İqtisadi terrorizm”; Hörmüz boğazının bağlanmasına görə BƏƏ-dən misilsiz xəbərdarlıq

2026.03.26, 06:25

Hörmüz böhranı dərinləşir...

Gunaz.tv

Gunaz TV xəbər verir, İsrail və beynəlxalq mühitdə müzakirə olunan açıqlamalarda, BƏƏ-nin sənaye və qabaqcıl texnologiyalar naziri və ADNOC şirkətinin icraçı direktoru Sultan Əhməd əl-Cabir, ABŞ-ın Hyuston şəhərində keçirilən enerji konfransında İranın Hörmüz boğazını bağlamasını “bütün xalqlara qarşı iqtisadi terrorizm” kimi qiymətləndirib.

O bildirib ki, İran Hörmüz boğazını girov götürdüyü zaman bunun bədəlini dünya üzrə insanlar gündəlik həyatlarında ödəyir; yanacaq məntəqələrində, ərzaq mağazalarında və apteklərdə.

Əl-Cabir vurğulayıb ki, heç bir ölkəyə bu şəkildə qlobal iqtisadiyyatı qeyri-sabit hala salmağa və insanların dolanışığına zərbə vurmağa icazə verilməməlidir.

BƏƏ-nin rəsmi mənbələri və beynəlxalq media qurumlarına əsasən, o xəbərdarlıq edib ki, bu addımın nəticələri yalnız enerji bazarı ilə məhdudlaşmır, eyni zamanda dünyada insanların həyatına, kənd təsərrüfatına, istehsala və ərzaq təhlükəsizliyinə birbaşa təsir edir.

O, Hörmüz boğazının strateji əhəmiyyətinə toxunaraq qeyd edib ki, gündə təxminən 20 milyon barel neft, yəni qlobal təklifin beşdə birinə yaxın hissəsi bu marşrutdan keçir. Həmçinin dünya üzrə kimyəvi gübrələrin üçdə biri və neft-kimya məhsullarının dörddə biri bu boğaz vasitəsilə daşınır. Əl-Cabir bu marşrutu “qlobal iqtisadiyyatın oksigeni” adlandırıb.

Nazir ABŞ ilə iqtisadi əlaqələrə də toxunaraq bildirib ki, BƏƏ bu ölkənin enerji sektoruna on milyardlarla dollar sərmayə yatırıb və bununla regional qeyri-sabitliklərə qarşı strateji əməkdaşlığı gücləndirməyə çalışır.

O, çıxışının sonunda dünya enerji liderlərini böhranlara davamlı enerji sistemi qurmaq üçün əməkdaşlığa çağırıb.

Bu arada, ərəb və beynəlxalq media qurumları məsələnin iqtisadi tərəflərinə və bunun qlobal ərzaq və dərman təhlükəsizliyinə təsirlərinə diqqət yetirir.

İrana bağlı media isə bu açıqlamaları ya görməzdən gəlir, ya da onları Qərb yönlü siyasi mövqelər çərçivəsində təqdim edir və İranın Hörmüz boğazı üzərində nəzarətini vurğulayır.

Müxalif yönlü media qurumları isə bu bəyanatları İran üzərində beynəlxalq təzyiqlərin artmasının göstəricisi kimi qiymətləndirir və enerji sahəsində qarşılıqlı gərginliklərə diqqət çəkir.

Məlumatlara görə, Hörmüz boğazının bağlanmasının dərman və ərzaq qiymətlərinə təsiri kimi bəzi mühüm nəticələr İran daxilində mediada daha az işıqlandırılır.

GünAzTV
R.G

GUNAZ.TV

SON XƏBƏRLƏR