ABŞ pilotunun xilasetmə əməliyyatında 9 İranlı ölüb, 8 nəfər yaralanıb

SON XƏBƏRLƏR

ABŞ pilotunun xilasetmə əməliyyatında 9 İranlı ölüb, 8 nəfər yaralanıb

2026.04.05, 10:22

Gunaz.tv

ABŞ pilotunun xilas edilməsi ilə bağlı əməliyyatlardan sonra İranın Kohgiluye və Boyerahmad vilayətində azı 9 nəfərin öldüyü, 8 nəfərin isə yaralandığı bildirilib.

Gunaz TV-nin məlumatına görə, Yasuc Tibb Universitetinin rəhbəri bildirib ki, şənbə gecəsi Dehdəşt şəhəri yaxınlığındakı “Siyah Dağ” bölgəsində baş verən hücum nəticəsində 5 nəfər ölüb, 8 nəfər yaralanıb. Yaralılar müalicə üçün Dehdəşt İmam Xomeyni xəstəxanasına yerləşdirilib.

“Mizan” agentliyinin yaydığı məlumata əsasən, eyni gecə vilayətin Vezeg və Kakan bölgələrində baş verən digər hücumlarda daha 4 nəfər həyatını itirib.

Ölənlərin hərbi qüvvələrə, yoxsa hökumətin “bəsic qüvvələri” adlandırdığı şəxslərə aid olduğu hələ dəqiq məlum deyil.

Bundan əvvəl Kohgiluye şəhərinin icra başçısı “Siyah Dağ” bölgəsinə raket zərbəsi endirildiyini bildirərək ilkin olaraq 3 nəfərin öldüyünü, 2 nəfərin yaralandığını açıqlamışdı. O, hadisə yerində “sıx insan toplaşması” olduğunu da qeyd etmişdi.

Digər tərəfdən, “Daneshju” agentliyi həmin vaxt yaydığı xəbərdə rabitə qülləsi və dövlət televiziyasına aid obyektin vurulduğunu, nəticədə 4 nəfərin öldüyünü və 1 nəfərin yaralandığını bildirmişdi.

Bu hadisələr ABŞ-a məxsus döyüş təyyarəsinin İranın cənub-qərbində vurulmasından və itkin düşmüş pilotun axtarışı ilə bağlı əməliyyatların davam etdiyi bir vaxtda baş verib.

Qeyd edək ki, ABŞ qüvvələri ilə yanaşı, İran hakimiyyəti də tapılmayan pilotun ələ keçirilməsi üçün geniş axtarış aparır və onun tapılmasına görə mükafat elan etmişdi.

GünAzTV
R.G

GUNAZ.TV

SON XƏBƏRLƏR