İranlı rəsmi: ABŞ-la razılaşmaya heç bir ümid yoxdur

SON XƏBƏRLƏR

İranlı rəsmi: ABŞ-la razılaşmaya heç bir ümid yoxdur

2026.05.07, 22:17

Gunaz.tv

Gunaz TV-nin yaydığı məlumata görə, İran parlamentinin Milli Təhlükəsizlik Komissiyasının üzvü Mahmud Nəbəviyan bildirib ki, İran ABŞ-la davam edən danışıqlara ümid etməməlidir və iddia edib: “İran üçün əlverişli danışıqlara və razılaşmaya heç bir ümid yoxdur.”

Nəbəviyan cümə axşamı “X” sosial şəbəkəsində paylaşdığı açıqlamada ABŞ-ın “etibarsız keçmişinə” toxunaraq, “ziyanlı Bərcam razılaşmasının tərəfdarları” adlandırdığı şəxslərin danışıqlar heyətindən uzaqlaşdırılmasını istəyib.

O, İran parlamentinin sədri Məhəmmədbaqir Qalibafdan həmin şəxslərin danışıqlar qrupundan çıxarılmasını tələb edib.

Nəbəviyan İran və ABŞ arasında İslamabad şəhərində keçirilən ilk danışıqlar mərhələsində də İran nümayəndə heyətinin yanında iştirak etmişdi və yenidən hazırkı danışıqlar prosesinə qarşı çıxdığını göstərib.

Bu açıqlamalar Donald Trampın Vaşinqtonun İranla münaqişəni bitirəcək razılaşmaya “yaxın” olduğunu deməsindən sonra səslənib.

ABŞ prezidenti PBS telekanalına telefon müsahibəsində bildirib ki, mümkün razılaşmanın maddələrindən biri İranın zənginləşdirilmiş uran ehtiyatlarının ABŞ-a köçürülməsi ola bilər.

Nəbəviyanın son açıqlaması İran daxilində ABŞ-la münasibətlər və danışıqların gələcəyi ilə bağlı fikir ayrılıqlarının davam etdiyini göstərən növbəti siqnal kimi qiymətləndirilir.

GünAzTV
R.G

GUNAZ.TV

SON XƏBƏRLƏR