Nətənz yaxınlığındakı yeraltı obyektlərdə şübhəli hərəkətlər

SON XƏBƏRLƏR

Nətənz yaxınlığındakı yeraltı obyektlərdə şübhəli hərəkətlər

2026.05.07, 23:15

Gunaz.tv

Gunaz TV-nin yaydığı məlumata görə, ABŞ-də fəaliyyət göstərən bir araşdırma mərkəzi yeni peyk görüntülərinin İranın Nətənz yaxınlığındakı “Kolang Qəzla” yeraltı kompleksində ehtimal olunan “müdafiə xarakterli” addımlar atdığını göstərdiyini bildirib. Bu obyekt İranın nüvə proqramının həssas mərkəzlərindən biri hesab olunur.

Elm və Beynəlxalq Təhlükəsizlik İnstitutu 6 may axşamı yayımladığı hesabatda kompleksin şərq hissəsində yerləşən iki tunel girişinin boz rəngli torpaqla qismən bağlandığını açıqlayıb.

Analitiklər hesab edirlər ki, bu addımın məqsədi nəqliyyat vasitələrinin tunellərə sürətli girişinin qarşısını almaq və birbaşa çıxışı məhdudlaşdırmaqdır.

Peyk görüntülərinə əsasən, dəyişikliklər ehtimal ki, 22 apreldən başlayıb. 1 apreldə çəkilmiş əvvəlki görüntülərdə isə tunel girişləri tam açıq vəziyyətdə idi və qarşılarında heç bir maneə görünmürdü.

Hesabatda qeyd olunur ki, Fordo və İsfahan nüvə obyektlərində daha əvvəl görülən tədbirlərdən fərqli olaraq, “Kolang Qəzla”dakı bağlanma tam deyil və tunel girişləri tamamilə örtülməyib. Bununla belə, yığılan torpaq sürətli hərəkəti ciddi şəkildə çətinləşdirə bilər.

Məlumata görə, girişlərin tam açılması üçün ağır texnikadan istifadə tələb olunacaq. “Kolang Qəzla” son illərdə təhlükəsizlik və nüvə hesabatlarında dəfələrlə gündəmə gəlib.

Digər tərəfdən, bu obyektin coğrafi mövqeyi və böyük dərinliyi onun həssas nüvə materialları və avadanlıqlarının saxlanılması üçün uyğun məkan ola biləcəyi ehtimalını gücləndirir.

Hesabatın başqa hissəsində bildirilir ki, bu ilin əvvəlində də 2007-ci ildə tikilmiş köhnə tunellərin girişlərinin torpaq və betonla möhkəmləndirilərək örtüldüyünə dair əlamətlər müşahidə olunub. Bu addımın həssas materialların tunellərə daşınması ilə əlaqəli ola biləcəyi qeyd edilir.

Bu hesabat İranın nüvə proqramının gələcəyi və Tehran–Vaşinqton danışıqları ilə bağlı müzakirələrin artdığı bir vaxta təsadüf edir.

GünAzTV
R.G

GUNAZ.TV

SON XƏBƏRLƏR