İran; dünyanın ikinci ən böyük yazıçı həbsxanası

SON XƏBƏRLƏR

İran; dünyanın ikinci ən böyük yazıçı həbsxanası

2026.05.13, 06:29

Gunaz.tv

İran söz azadlığının boğulmasında növbəti rekordunu qeydə alıb; yayımlanan yeni statistika ölkədə repressiyanın real miqyasını ortaya qoyur.

Gunaz TV-nin məlumatına görə, PEN America-nın son illik hesabatı göstərir ki, İran 53 həbsdə olan yazıçı ilə Çindən sonra dünyanın ikinci ən böyük yazıçı həbsxanasına çevrilib və eyni zamanda qadın yazıçıların saxlanıldığı ən böyük ölkə kimi göstərilib.

PEN America-nın “Yazmaq Azadlığı” indeksinə əsasən, 2025-ci ildə İranda həbsdə olan yazıçıların sayı ciddi şəkildə artıb və İran hakimiyyəti azı 17 yeni həbsi həyata keçirib; bu göstərici yazıçıların həbs sayını yenidən 2022-ci ildəki etirazlar dövründəki repressiya səviyyəsinə yaxınlaşdırıb.

Hesabat vurğulayır ki, dünyada yazıçı həbslərində ən kəskin artım məhz İranda qeydə alınıb.

PEN America-nın Risk Altında Olan Yazıçılar proqramının rəhbəri Karin Deutsch Karlekar İranla bağlı bildirib ki, İran hakimiyyəti “müstəqil səslərə qarşı xüsusilə qəddar kampaniya” başladıb.

O əlavə edib: “Şairlər, tərcüməçilər, tədqiqatçılar, mahnı sözləri müəllifləri, onlayn analitiklər, insan haqları müdafiəçiləri və köşə yazarları hamısı həbs və repressiyanın hədəfinə çevrilib”, çünki İran hakimiyyəti “müzakirə və müxalifəti” susdurmağa çalışır.

Hesabatda bildirilir ki, İranda yeni repressiya dalğası İranla İsrail arasında 12 günlük müharibədən sonra daha da güclənib və tanınmış tənqidçilərlə yanaşı, tədqiqatçılar və tərcüməçilər də hədəfə alınıb.

PEN America-nın hesabatına görə, 2025-ci ildə dünyada həbsdə olan yazıçıların sayı 401 nəfərə çatıb ki, bu da indeksin 2019-cu ildən bəri yayımlandığı dövrdə ən yüksək göstəricidir. Çin 119 həbsdə olan yazıçı ilə birinci yerdədir.

GünAzTV
R.G

GUNAZ.TV

SON XƏBƏRLƏR