İranın Küveytə raket və PUA hücumları Körfəzdə gərginliyi artırdı

SON XƏBƏRLƏR

İranın Küveytə raket və PUA hücumları Körfəzdə gərginliyi artırdı

2026.05.28, 21:30

Gunaz.tv

Gunaz.tv-nin məlumatına görə, Küveyt Silahlı Qüvvələrinin Baş Qərargahı ölkənin hava hücumundan müdafiə sistemlərinin “düşmən raketləri və pilotsuz uçuş aparatlarının hücumları” ilə mübarizə apardığını açıqlayıb.

Küveyt xəbər agentliyinin yaydığı bəyanatda bildirilib ki, eşidilən partlayış səsləri hava hücumundan müdafiə sistemlərinin “düşmən hücumlarını” zərərsizləşdirməsi ilə bağlıdır. Vətəndaşlardan və ölkə sakinlərindən təhlükəsizlik qaydalarına əməl etmələri istənilib.

Küveyt ordusu hücumların mənbəyini açıqlamasa da, hadisə ABŞ-ın İranın Hörmüz boğazında Amerika qüvvələri və beynəlxalq gəmiçiliyi təhdid etdiyini bildirdiyi pilotsuz aparat əməliyyatına qarşı həyata keçirdiyi hücumlardan sonra baş verib.

SEPAH qısa bəyanat yayaraq ABŞ hücumunu təsdiqləyib və yerli vaxtla saat 04:50-də ABŞ-a məxsus hava bazasını hədəfə aldığını bildirib. Bəyanatda hücumun Bəndər-Abbas hava limanı yaxınlığındakı hədəfə ABŞ tərəfindən endirilən zərbəyə cavab olaraq həyata keçirildiyi qeyd edilib.

Küveyt ABŞ hərbi hava bazalarından birinə ev sahibliyi edir. Son qarşıdurmalar zamanı Körfəz ölkələri, o cümlədən Küveyt də SEPAH-ın raket və pilotsuz aparat hücumlarının hədəfinə çevrilib.

ABŞ rəsmisi bildirib ki, CENTCOM qüvvələri Hörmüz boğazı ətrafında təhlükə yaradan dörd İran kamikadze pilotsuz aparatını məhv edib.

Həmin rəsminin sözlərinə görə, ABŞ qüvvələri həmçinin Bəndər-Abbasda beşinci pilotsuz aparatın buraxılmasına hazırlaşan yerüstü idarəetmə məntəqəsinə zərbə endirib. O vurğulayıb ki, bu addımlar yalnız müdafiə xarakterli olub və atəşkəsin qorunmasına xidmət edib.

Atəşkəsin qüvvəyə minməsindən sonra da bölgədə ara-sıra qarşıdurmalar davam edir. Bu müddətdə İrandan Körfəz ölkələrinə, o cümlədən Səudiyyə Ərəbistanı və Küveyt istiqamətində pilotsuz aparatların göndərildiyi bildirilir.

Bu hadisələrdən sonra Ərəb Körfəzi Əməkdaşlıq Şurası İranın Küveytə qarşı hücumlarını pisləyib. Şuranın baş katibi Casim əl-Bədəvi İranın addımlarını “təcavüzkar hücumlar” adlandıraraq, bunun beynəlxalq hüququn və xoş qonşuluq prinsiplərinin pozulması olduğunu bildirib.

O, həmçinin Körfəz ölkələrinin Küveytin təhlükəsizliyi və sabitliyini qorumaq üçün atdığı bütün addımları dəstəklədiyini vurğulayıb.

GünAzTV
R.G

GUNAZ.TV

SON XƏBƏRLƏR