İran Müəllimlər Koordinasiya Şurası müəllimlərin azad edilməsini tələb edib

SON XƏBƏRLƏR

İran Müəllimlər Koordinasiya Şurası müəllimlərin azad edilməsini tələb edib

2026.06.14, 11:14

İran Müəllimlər Koordinasiya Şurası müəllimlərə qarşı təzyiqlərin dayandırılmasını və həbsdə olan müəllimlərin azad edilməsini tələb edib.

Gunaz.tv

İran Müəllimlər Həmkarlar Təşkilatları Koordinasiya Şurası şənbə günü yaydığı bəyanatda müəllimlərin peşə birlikləri fəallarına qarşı təhlükəsizlik təzyiqlərinin, həbslərin, məhkəmə hökmlərinin və müxtəlif məhdudiyyətlərin ayrı-ayrı hadisələr olmadığını bildirib. Şura bu addımların müəllimlərin müstəqil təşkilatlarını zəiflətmək və cəmiyyətin tələb səslərini susdurmaq üçün həyata keçirilən “aydın və təşkilatlanmış bir modelin” tərkib hissəsi olduğunu vurğulayıb.

Şura müxtəlif vilayətlərdə bir sıra müəllimlərin və peşə fəallarının saxlanılması və təqib olunmasına diqqət çəkərək, müharibə şəraiti, internet məhdudiyyətləri və iqtisadi-təhsil böhranlarının dərinləşdiyi bir dövrdə təhlükəsizlik təzyiqlərinin artmasını tənqid edib. Bəyanatda qeyd olunub ki, ölkənin problemlərinin həlli əvəzinə təhlükəsizlik qurumları müstəqil vətəndaş cəmiyyəti institutlarını məhdudlaşdırmağa çalışırlar.

İran Müəllimlər Həmkarlar Təşkilatları Koordinasiya Şurası həmçinin həbsdə olan müəllimlərin dərhal azad edilməsini, peşə fəallarına qarşı yeni işlərin açılmasının dayandırılmasını və repressiya mühitinə son qoyulmasını tələb edib. Şura vurğulayıb ki, peşə və vətəndaş fəaliyyətlərinin təhlükəsizlik məsələsinə çevrilməsi cəmiyyətin tələblərinə cavab verməkdə acizliyin göstəricisidir.

Şura öz bəyanatında müharibəni, repressiyanı və xarici müdaxiləni pisləyərək sülh, azadlıq, sosial ədalət və müstəqil təşkilatlanma hüququna çağırış edib.

GünAzTV
R.G

GUNAZ.TV

SON XƏBƏRLƏR