Contact Us

SON XƏBƏRLƏR

Bu gün Babək Xürrəminin doğum günüdür

2026.07.01, 15:00
Bu gün Babək Xürrəminin doğum günüdür

Tarixi mənbələrdə Babək Xürrəminin dəqiq doğum tarixi və günü qeyd olunmasa da, qeyri-rəsmi və ənənəvi olaraq, onun doğum günü hər il 1 iyul tarixində qeyd olunur.

Gunaz.tv

Tarixşünaslıqda onun 798-ci ildə Ərdəbil şəhəri yaxınlığındakı Bilalabad kəndində anadan olduğu güman edilir.

 Babək (798–838) — IX əsrdə Ərəb Xilafətinə qarşı Azərbaycanda başlanmış Xürrəmilər hərəkatının ən görkəmli rəhbəri və sərkərdədir. O, xalqın azadlığı, müstəqilliyi və sosial ədalət uğrunda mübarizənin simvolu kimi tanınır.

Xürrəmilər hərəkatı sosial bərabərsizliyə və əcnəbi (ərəb) ağalığına qarşı yönəlmişdi. Babək 816-cı ildə hərəkatın lideri seçilmişdir.

Üsyanın əsas qalası və mərkəzi Azərbaycanın tarixi ərazisi, Cənubi Azərbaycanın Kəleybər bölgəsində yerləşən Bəzz qalası olub. Babək 20 ildən artıq bir müddətdə xilafətin saysız-hesabsız qoşunlarına qarşı mübarizə aparmıb və onları dəfələrlə məğlub edib.

O, dağlıq ərazilərin relyefindən məharətlə istifadə edərək partizan müharibəsi aparmıb, ərəb sərkərdələrinə ciddi zərbələr vurub.

Ərəb Xilafəti bütün qüvvələrini səfərbər edərək ordu başçısı Afşini Azərbaycana göndərib. Uzun və ağır mühasirədən sonra, 837-ci ildə Bəzz qalası süqut edib.

Babək xəyanət nəticəsində ələ keçirilərək İraqın Səmərra şəhərinə aparılıb və ona təklif edilən yüksək vəzifələri, xəlifənin təkliflərini rədd etdiyi üçün 838-ci ildə xilafət tərəfindən edam edilib. 

İşğalçı qüvvələrin tarixçilərinin və din tacirlərinin barəsində yazdıqları iftira və böhtanlara baxmayaraq, Babək Xürrəmi Azərbaycan tarixşünaslığında xalqın milli azadlıq mübarizəsinin ən parlaq simvollarından biri kimi qəbul edilib, azərbaycanlıların zülmə, ədalətsizlyə və işğalçılara qarşı mübarizə rəmzinə çevrilib.

Qeyd edək ki, uzun illərdir Cənubi Azərbaycanda Babək Xürrəminin xatirəsini anmaq və doğum gününü qeyd etmək üçün hər il iyun ayının sonu və iyul ayının əvvəllərində Şərqi Azərbaycan əyalətində yerləşən tarixi Bəzz qalasına kütləvi yürüşlər təşkil olunur. Bu tədbirlər milli oyanış və etiraz simvolu olaraq keçirilir.

Bu tədbirlər xalq qəhrəmanının xatirəsini anmaqla yanaşı, azərbaycanlıların milli-mədəni hüquqlarının tələb edilməsi aksiyası xarakteri daşıyır.

Çox sayda fəal və yerli əhali qalaya yürüş edərək, burada milli şeirlər oxuyur, musiqilər ifa edir və etiraz şüarları səsləndirirlər.

Bu günə kimi həmin dinc mədəni yürüşlərdə iştirak edən yüzlərlə insan həbs edilib, onlarla şəxsə qarşı müxtəlif ittihamlar irəli sürülərək barələrində uzun müddətli həbs qərarları çıxarılıb.

 GünazTV

Açar Sözlər :

SEÇİLMİŞ XƏBƏRLƏR

Çox oxunanlar