Tramp: Tezliklə razılıq əldə olunacağı təqdirdə İrana hücumu ləğv etdim

SON XƏBƏRLƏR

Tramp: Tezliklə razılıq əldə olunacağı təqdirdə İrana hücumu ləğv etdim

2026.08.02, 09:32

Donald Tramp bildirib ki, Tehranla razılaşmanın ümumi çərçivəsi üzrə anlaşma əldə olunduğu və qısa zamanda yekun sazişə nail olunacağı üçün İrana planlaşdırılan hücumları ləğv edib.

Gunaz.tv

Gunaz TV-nin məlumatına görə, ABŞ Prezidenti Donald Tramp şənbə axşamı Truth Social sosial şəbəkəsində yazıb ki, Tehranla razılaşmanın ümumi çərçivəsi üzrə əldə olunan anlaşma və qısa zamanda yekun sazişə nail olunacağına görə İrana qarşı planlaşdırılan hücumları ləğv edib.

Tramp yazıb: “ABŞ İkinci Dünya müharibəsindən bu yana görünməmiş səviyyədə hərbi hazırlıq, güc və döyüş qabiliyyəti ilə İran İslam Respublikasına qarşı hərəkətə keçməyə hazırdır. Buna baxmayaraq, İran və Yaxın Şərqin digər ölkələri bizdən hər hansı hücumdan çəkinməyi xahiş ediblər. Çünki razılaşmanın ümumi çərçivəsi üzrə anlaşma əldə olunub.”

O əlavə edib: “Bu razılaşma Hörmüz boğazının dərhal, tam və qeyd-şərtsiz açılmasını və İranın nüvə təhdidinə son qoyulmasını əhatə edəcək.”

ABŞ Prezidenti daha sonra bildirib: “Bu müraciət əsasında gələcəkdə dünyanın maraqlarını və uğurlu, firavan bir İranın mövcudluğunu təmin etmək məqsədilə hücumu ləğv etməyə razılaşdım. Lakin bunun şərti qısa zamanda yekun razılaşmaya nail olunmasıdır. İsrail dövləti də bu öhdəlikdə mənə qoşulub.”

Tramp sonda qeyd edib: “Hamınız işə başlayın və bunu başa çatdırın.”

Donald Trampın planlaşdırılan hücumları ləğv etməsi son günlər Tehran və Vaşinqton arasında gərginliyin artdığı, ABŞ-ın İrana mümkün hərbi əməliyyatı ilə bağlı narahatlıqların gücləndiyi bir dövrə təsadüf edir. Bununla yanaşı, yayılan məlumatlara görə, regional vasitəçilər gərginliyin azaldılması və hərbi qarşıdurmanın yenidən başlanmasının qarşısını almaq üçün diplomatik səylərini artırıblar.

GunAz TV
R.G

GUNAZ.TV

SON XƏBƏRLƏR