Türkiyənin Türk dövlətləri ilə ticarəti 6 ayda 9,4 milyard dollara çatdı

SON XƏBƏRLƏR

Türkiyənin Türk dövlətləri ilə ticarəti 6 ayda 9,4 milyard dollara çatdı

2026.08.16, 11:25

Gunaz.tv

Türkiyə Statistika İnstitutunun məlumatlarına əsasən, Türkiyənin Azərbaycan, Qazaxıstan, Türkmənistan, Özbəkistan və Qırğızıstan olmaqla beş Türk respublikası ilə ticarət dövriyyəsi cari ilin ilk altı ayında 9,4 milyard dollara çatıb.

Türkiyə bu dövrdə həmin ölkələrə təxminən 5 milyard dollar dəyərində məhsul ixrac edib, onlardan isə 4,4 milyard dollar dəyərində məhsul idxal edib. Nəticədə Türkiyənin ticarət saldosu 614,9 milyon dollar müsbət olub.

Qazaxıstan 1,5 milyard dollarla Türkiyənin bu ölkələr arasında ən böyük ixrac bazarı olub. Azərbaycan 1,4 milyard dollarla ikinci, Özbəkistan 945,6 milyon dollarla üçüncü, Qırğızıstan 594,4 milyon dollarla dördüncü, Türkmənistan isə 583,6 milyon dollarla beşinci yerdə qərarlaşıb.

Türkiyə ilə Qazaxıstan arasında iqtisadi əməkdaşlıq xüsusilə enerji, nəqliyyat və logistika, kənd təsərrüfatı, müdafiə sənayesi, texnologiya və investisiya sahələrində genişlənir. Qazaxıstanda Türkiyə sərmayəsi ilə fəaliyyət göstərən 3 mindən çox şirkət var.

İki ölkə qarşılıqlı ticarət dövriyyəsini 15 milyard dollara çatdırmağı hədəfləyir. “Orta Dəhliz” dəmir yolu marşrutunun inkişafı və Bakı–Tbilisi–Qars dəmir yolu xətti ilə yükdaşımaların artırılması da əməkdaşlığın əsas istiqamətlərindəndir. Türkiyə və Qazaxıstan həmçinin Qazaxıstanda “Anka” pilotsuz uçuş aparatlarının istehsalı, təmiri və texniki xidmətləri sahəsində əməkdaşlıq edir.

Türkiyə və Azərbaycan da ticarət dövriyyəsini 15 milyard dollara çatdırmağı hədəfləyir. 110 maddəlik fəaliyyət planına əsasən, iki ölkə ticarət, sənaye, investisiya, podratçılıq, nəqliyyat və enerji sahələrində əməkdaşlığı genişləndirir.

Özbəkistanla münasibətlərdə isə azad iqtisadi zonalar, müdafiə sənayesi və rəqəmsal iqtisadiyyat sahələrində əməkdaşlıq önə çıxır. İki ölkə azad iqtisadi zonaların layihələndirilməsi və idarə olunması üzrə təcrübə mübadiləsi ilə yanaşı, Türkiyənin sənaye ekosistemi nümunəsində Özbəkistan–Türkiyə mütəşəkkil sənaye zonasının yaradılmasını da müzakirə edir.

GünAz TV
R.G

GUNAZ.TV

SON XƏBƏRLƏR