Güney Azərbaycanın milli şairi Bulud Qaraçorlu Səhəndin anadan olmasının 100-cü ildönümü İzmirdə qeyd olundu

SON XƏBƏRLƏR

Güney Azərbaycanın milli şairi Bulud Qaraçorlu Səhəndin anadan olmasının 100-cü ildönümü İzmirdə qeyd olundu

2026.10.12, 17:36

Gunaz.tv

Güney Azərbaycanın milli şairi Bulud Qaraçorlu Səhəndin anadan olmasının 100-cü ildönümü münasibətilə 10 oktyabr 2026-cı ildə Türkiyənin İzmir şəhərində anım mərasimi keçirilib. Təpəkule Konqres və Sərgi Mərkəzində təşkil olunan tədbirdə ana dili, milli kimlik, tarixi yaddaş və Güney Azərbaycanın mədəni mübarizəsində ədəbiyyatın rolu müzakirə edilib.

Güney Azərbaycan Mədəniyyət Mərkəzinin təşkil etdiyi mərasimdə, eyni zamanda, Güney Azərbaycan Türk Şeiri Gününün əhəmiyyətinə diqqət çəkilib.

Tədbirdə hüquqşünas və mədəniyyət fəalı Camal Məhmətxanoğlu Səhəndin “Güney Azərbaycanın Milli Şairi” kimi tanınması prosesindən danışıb. Tədqiqatçı-yazıçı Xəzər Tandoğan isə Güney Azərbaycan türklərinin mübarizəsinin tarixi və geosiyasi tərəflərini, Səhəndin əsərlərinin tarixi yaddaşın nəsillər arasında ötürülməsindəki rolunu diqqətə çatdırıb.

Güney azərbaycanlı tədqiqatçı, jurnalist və yazıçı Mesut Haray çıxışında Səhəndin həyat və yaradıcılığını Güney Azərbaycanın milli mübarizəsi, İranda türk dilinə və milli kimliyə qarşı tətbiq olunan məhdudiyyətlər kontekstində dəyərləndirib.

Mərasim zamanı Durna Hatun Səhəndin şeirlərindən nümunələr səsləndirib. Burla Hatun şairin “Sazımın Sözü” əsərindən seçilmiş parçaları oxuyub. Türkiyəli şair Fatma Aras isə Türk dünyası və Güney Azərbaycan mövzularını əhatə edən şeirlərini təqdim edib.

Tədbirdə, həmçinin, Səhəndin xatirəsinə həsr olunmuş əvvəlki proqramlardan videoçarxlar nümayiş etdirilib. Güney azərbaycanlı şair doktor İsmayıl Ülkerin Səhənd haqqında yayımlanmamış şeirlərini səsləndirdiyi video, eləcə də yazıçı və tarixçi doktor Ziya Sədrüləşrəfinin Şəhriyarın “Səhəndiyyə” poemasını ifa etdiyi görüntülər iştirakçılara təqdim olunub.

Mərasim sual-cavab və fikir mübadiləsi ilə başa çatıb. Çıxışlarda Səhəndin yaradıcılığının ana dilinin, milli kimliyin və tarixi yaddaşın qorunmasındakı əhəmiyyəti vurğulanıb.

GunAz TV
R.G

GUNAZ.TV

SON XƏBƏRLƏR