İranın atom bombası arzusu: “Atom bomban varsa, liderini öldürə bilməzlər!”

SON XƏBƏRLƏR

İranın atom bombası arzusu: “Atom bomban varsa, liderini öldürə bilməzlər!”

2026.11.09, 18:38

İranlı təhlilçinin iddiası: Atom bombasına sahib olmaq ölkə liderlərinin öldürülməsinin qarşısını alır!

Gunaz.tv

Hakimiyyətə yaxın ekspert dolayısı ilə iddia edib: Atom bombası hazırlasaq, artıq liderimizi bombalamayacaqlar!

ABŞ məsələləri üzrə ekspert və İran hakimiyyətini dəstəkləyən siyasi cərəyana yaxın simalardan biri olan Fuad İzədi nüvə silahlarının hərbi çəkindirmə rolunu müdafiə edərək, atom bombasına sahib ölkələrin hərbi hücumlara və liderlərinin öldürülməsinə daha az məruz qaldığını iddia edib.

O, son hərbi hücumlara və çoxsaylı İran rəsmilərinin, xüsusilə Əli Xameneinin öldürülməsinə toxunaraq deyib: “Atom bombasına sahib olduğu halda lideri öldürülən və ya beş min nəfər itki verən bir ölkə tanımıram”.

İzədi öz fikrini əsaslandırmaq üçün Hindistan və Pakistanı misal göstərərək, hər iki ölkənin nüvə silahına malik olmasının hərbi qarşıdurmanın genişlənməsinin qarşısını aldığını iddia edib. O, Ukrayna müharibəsinə də toxunaraq, ABŞ-ın Rusiya ilə birbaşa qarşıdurma riskinə görə müharibəyə birbaşa qoşulmaqdan çəkindiyini bildirib.

Ekspertin bu açıqlamaları İranda nüvə doktrinasının dəyişdirilməsi və atom silahının hazırlanmasına doğru mümkün addımlar barədə müzakirələrin intensivləşdiyi bir vaxtda səslənib.

Bu fikirlər hakimiyyətə yaxın siyasi dairələrin bir hissəsində nüvə silahına yalnız hərbi vasitə kimi deyil, həm də rejimin mövcudluğunun qorunması və xarici hücumların qarşısının alınması üçün təminat kimi baxıldığını bir daha göstərir.

İzədi İranın dövlət televiziyasının siyasi təhlil proqramlarında mütəmadi iştirak edir. O, ABŞ məsələləri üzrə ekspert kimi tanınır və siyasi baxışlarına görə radikal mühafizəkar “Paydari” cərəyanına, eləcə də Səid Cəlili və Əlirza Zakani kimi fiqurlara yaxın hesab olunur.

GunAz TV
R.G

GUNAZ.TV

SON XƏBƏRLƏR