“AZƏRBAYCAN QARABAĞI AZAD ETMƏK İSTƏSƏ, RUSİYA İLƏ ÜZLƏŞƏR” Beynəlxalq ekspertlər münaqişənin həllində Ankara ilə Moskvanın əməkdaşlığını müşgül sayırlar “Cənubi Osetiyadakı vəziyyət Qarabağ münaqişəsindəki bütün tərəflərə bir dərs oldu ki, hərbi gücdən istifadə münaqişənin həlli yolu ola bilməz”. Bu sözləri “Azadlıq” radiosuna müsahibəsində Beynəlxalq Böhran Qrupunun Avropa proqramının direktoru Sabina Freyzer deyib. Ekspert hesab edir ki, Gürcüstan ətrafında baş verənlərə baxmayaraq, Amerika ilə Rusiya Minsk qrupu çərçivəsində birgə işləməkdə davam edəcəklər. Freyzerə görə, Cənubi Osetiya münaqişəsinin əsas dərsi o oldu ki, bir neçə il ərzində orduya böyük pullar sərf eləməklə belə mürəkkəb münaqişələri, o cümlədən Qarabağ problemini həll etməyin mümkün olmadığı üzə çıxdı. Freyzer deyib ki, Qarabağda yeni müharibə olarsa, Rusiyanın necə davranacağını təxmin etmək çətindir: “Bu sual olaraq qalır. Biz bilirik ki, Rusiya Ermənistanın təhlükəsizliyinə qarant kimi çıxış edir. Çox mümkündür ki, əgər Azərbaycan Qarabağı hərbi yolla azad etmək qərarına gəlsə, Rusiya mürəkkəb bir vəziyyətə düşəcək. Mən bilmirəm ki, o, münaqişəyə aktiv şəkildə müdaxilə edəcəkmi, Ermənistana kömək üçün öz qoşunlarını göndərəcəkmi. Amma bir məsələ aydındır ki, Rusiyanın Ermənistan qarşısında müəyyən öhdəlikləri var və bu elə bir şeydir ki, Azərbaycan nəzərə almalıdır ki, Rusiyanın reaksiyası nə ola bilər. Düzdü Azərbaycanın da öz müttəfiqləri var. Amma məncə ən pis nəticə o ola bilər ki, Qarabağda yeni müharibə Rusiya, Türkiyə və başqa dövlətlərin cəlb edildiyi əsl regional konfliktə çevrilər.” Ekspert bildirib ki, Türkiyə və Ermənistan arasında münasibətlərin yaxşılaşması təkcə bu iki ölkə üçün faydalı deyil, həm də bütün region üçün yaxşıdır. Onun sözlərinə görə, Türkiyə Azərbaycanın yaxın müttəfiqidir və Azərbaycanın maraqlarını dəstəkləyir: “Ümid edirəm ki, Türkiyə Qarabağ probleminin həllində faydalı vasitəçi kimi çıxış edə bilər.” Vaşinqtonda yerləşən Beynəlxalq və Strateji Araşdırmalar Mərkəzinin eksperti Bülent Əlirza isə “Azadlıq” radiosuna müsahibəsində deyib ki, əgər Türkiyə ilə Rusiya öz aralarında dialoq qura bilsələr, bu, bəlkə də Ermənistanla Azərbaycan arasındakı problemlərin çözümünə yardımçı ola bilər: “Yaddan çıxarmayaq ki, Ermənistanın prezidenti Serj Sərkisyan bu yaxınlarda Moskvada səfərdə oldu, bundan sonra da Azərbaycanın dövlət başçısı rusiyalı həmkarı ilə görüşdü. Göründüyü kimi indiki məqamda Rusiya amili çox vacibdir.” Ekspertin sözlərinə görə, yeni siyasi vəziyyətdə Vaşinqtonun nə edə biləcəyi mübahisəlidir. Belə ki, Rusiya regiona çox yaxındır. Artıq güc tətbiq edə biləcəyini də əyani sübut etdi. Vaşinqton bu situasiyaya qarşı uzunmüddətli bir strategiya qurmaq istəyirsə, onda mütləq Ankara ilə yaxınlaşmalıdır. Ankara isə Rusiya ilə konfrantasiyaya girmək istəmir. Bu baxımdan Amerikadakı seçkidə Rusiyaya qarşı sərt mövqeyi ilə seçilən respublikaçı Con Makkeyn qalib gəlsə belə, Vaşinqtona təsir imkanları məhduddur. Bülənt Əlirza hesab edir ki, Amerika ilə Rusiyanın Qarabağ məsələsində Minsk qrupunun daxilində əməkdaşlığı çox çətin görünür. Ona görə də indi əsas diqqət edilməli məqam budur ki, bu münaqişənin həllində Türkiyə ilə Rusiya necə əməkdaşlıq edəcəklər: “Ola bilsin ki, ÿRusiya Ermənistana təzyiq etsin ki, Ermənistan Türkiyəyə güzəştə getsin. Amma hələ bəlli deyil ki, Rusiya əlindəki kartları necə oynayacaq.” Siyasət şöbəsi musavat