Gülün solduğu gün... Terimin komandası Ermənistan yığmasını məğlub etməsə, ikiqat müsibət olacaq "Tarixi gün" gəlib çatdı. Bu gün Türkiyə prezidenti Abdullah Gül İrəvana gedəcək və "Razdan" stadionunda ermənistanlı həmkarı Serj Sərkisyanla Ermənistan və Türkiyə futbol yığmalarının qarşılaşmasını izləyəcək. Dünən Gülün Ermənistana səfərinin detalları açıqlanıb. Sərkisyanın qonağını "Zvartnots" hava limanında Ermənistanın xarici işlər naziri Edvard Nalbandyan qarşılayacaq. Təyyarədən yerə enməzdən əvvəl Türkiyə prezidenti əyninə kostyumun altından xüsusi polad gödəkcə geyinəcək. Türkiyə nümayəndə heyəti hava limanından Ermənistan Prezident Sarayında xüsusi olaraq yaradılmış təhlükəsizlik dəhlizi ilə gedəcək. Burada iki prezident arasında təkbətək görüşdən sonra Sərkisyan Gülün şərəfinə iftar yeməyi verəcək. Gül orucunu açdıqdan sonra Sərkisyanla birlikdə "Razdan" stadionuna gedəcək. Səfərin təhlükəsizlik məsələləri son detalına kimi Türkiyə tərəfi ilə razılaşdırılıb. Gülün İrəvanda istifadə edəcəyi maşın və hava limanından Prezident Sarayına, oradan isə stadiona doğru gedən yola nəzarət edəcək xüsusi cihaz Türkiyədən göndərilib (APA). "Razdan" stadionunda Türkiyə prezidentinə qarşı ehtimal olunan sui-qəsdin qarşısını almaq üçün Gülün oturacağı skamyanın dörd bir tərəfi güllə keçirməyən şüşə ilə bağlanacaq. Bununla da İrəvana Ermənistan-Türkiyə matçını canlı izləməyə gedəcəyi açıqlanan Abdullah Gül əslində oyunu şüşə arxasından izləyəcək. Gülün İrəvan səfəri ərəfəsində Türkiyənin baş naziri Rəcəb Tayyip Ərdoğan bu səfərə dəstək açıqlaması yayıb. Ərdoğan Azərbaycana bir müddət əvvəl etdiyi səfəri zamanı bu məsələni müzakirə etdiyini, "hər hansı sıxıntı olduğunu" zənn etmədiyini deyib. Səfər heyətinə xarici işlər naziri Əli Babacanı da daxil etdiyini deyən Ərdoğan bunu "Qafqaz İttifaqı" ilə bağlı ilkin danışıqların keçirilməsi üçün nəzərdə tutduğunu bildirib: "Masadan qaçdıqca heç bir şey əldə edə bilmərik. Siz masaya gəlin, başqaları masadan qaçsın. Olayı belə düşünürəm". "İdman ayrı, siyasət ayrı" deyən baş nazir Dağlıq Qarabağ məsələsi ilə bağlı ölkəsinin mövqeyini bir daha bəyan edib: "Əgər bütün məsələ Dağlıq Qarabağ problemi ilə bağlıdırsa, bu məsələdə biz ATƏT-in Minsk qrupunun apardığı danışıqların ədalətli nəticələr əldə edərək, problemi çözməsinin tərəfdarıyıq. Həmçinin Ermənistanın BMT Təhlükəsizlik Şurasının problemlə bağlı qətnamələrinə əməl etməsi lazımdır. Minsk qrupunu həmsədri olan Rusiya, ABŞ və Fransa 16-17 ildir ki, davam edən bu danışıqlar prosesini artıq bitirməlidir. Bu problemin həlli yolu tapılmalıdır". Beləliklə, bu gün qardaş ölkənin prezidenti düşmən ölkədə futbol matçına tamaşa edəcək. Şübhəsiz ki, hər bir ölkənin öz maraqları var və hər bir dövlət, o cümlədən Türkiyə də buna uyğun siyasət yürüdür. Bundan faciə düzəltmək bizə düşməyib, lakin dərd burasındadır ki, Ankaranın bu addımındakı maraqları da qaranlıqdır. AKP iqtidarı bu səfərlə hansı hədəfinə çatmaq istəyir, baş açmaq olmur. Ermənistan Türkiyənin ərazi bütövlüyünü tanımır, Şərqi Anadolunu "Qərbi Ermənistan" adlandırır. Gülün səfərinin ermənilərin Türkiyəyə qarşı ərazi iddialarından vaz keçmələrinə səbəb olacağını düşünmək min qat sadəlöhlükdür. Qondarma "soyqırım" iddialarından əl çəkməyi haylar heç ağıllarına belə gətirmirlər. Bəlli olduğu kimi, Türkiyə rəhbərliyini İrəvanla dialoqa ABŞ və Avropa itələyir. Qosqoca Türkiyə dövlətinin indiki başçıları da Qərbə uyub avantüraya gedir - zira Gül İrəvanda hər cür sürprizlə üzləşə bilər. Bəlkə, bu əcaib səfər Ankaranın AB yolunu açacaq? Arkadaş, özünüz də bilirsiniz ki, erməni, kürd və ya Şimali Kipr məsələsi bəhanədir, Sarkozi və kampaniyası sizin bu yolunuzu əngəlləmək üçün istənilən qədər ermənisayağı kötük tapa bilərlər. Türkiyənin Bakıdakı səfiri cənab Hulusi Kılıç vəd edir ki, Gülün səfərinin "Azərbaycan üçün faydası olacaq". Belə optimizmlə yalnız bişmiş toyuğu güldürmək olar. Türkiyə prezidentinin səfərinin Qarabağ nizamlanmasına tük qədər də təsiri gözlənilmir. Ən azı ona görə ki, Qarabağ danışıqları Moskvanın inhisarındadır və İrəvan bu məsələdə müstəqil qərar verməyə qadir deyil. Xatırladaq ki, Sərkisyan sentyabrın 2-də Soçidə Rusiya prezidenti Dmitri Medvedyevlə görüşmüşdü. Sərkisyana Kremldən hansı təlimat verilibsə, Güllə danışıqların mövzusu da ona uyğun qurulacaq. İrəvanda Gülün Sərkisyanla Ərdoğanın "Qafqaz Sabitlik Paktı" təşəbbüsünü müzakirə etməsinə gəlincə isə, "Ekspress" bu ideyanın ölü doğulması barədə dəflərlə yazıb: Rusiyanın Gürcüstana, Ermənistanın Azərbaycana təcaüzünün davam etdiyi bir şəraitdə hansı "Qafqaz İttifaqı"ndan danışmaq olar? Ermənilərin Gülün səfərindən hansısa faydalar, qazanclar götürəcəkləri şəksizdir. Sərhədlərin açılmasına doğru daha bir addım atılmasından tutmuş, ermənilərin Türkiyədə biznes qurmasınadək müxtəlif fərziyələr irəli sürmək, İrəvanın Ankaranı Qarabağ məsələsindən təcrid etməklə Azərbaycanı təkləmək planlardan danışmaq olar. Amma yenə ümidimi itirmək və inanmaq istəmirəm ki, Ankara nə vaxtsa "Qarabağ və digər problemlər həll edilmədən sərhədlərin açılmasından söhbət gedə bilməz" vədinə xilaf çıxacaq. Bununla belə, bu da şübhə doğurmur ki, Abdullah Gülün İrəvan missiyasının nə effekti, nə də nəticəsi olacaq. Əksinə, Gül və onu ora göndərən Ərdoğanın bu anlamsız riskə getməklə yalnız və yalnız öz siyasi reputasiyalarını zədələyəcəklər. Ən kədərlisi isə budur ki, qəfildən iki qardaş ölkənin münasibətlərinin zədə alması, soyuması təhlükəsi ilə üz-üzəyik. Ərdoğan məsələni Bakıda müzakirə etdiyini və "hər hansı sıxıntı olduğunu" zənn etmədiyini deyir. Rəsmi Bakı narazılığını aşkar şəkildə ortaya qoymasa da, incikliyini üstüörtülü şəkildə büruzə verir. "Gülün Ermənistana səfəri Türkiyənin daxili işidir. Bununla bağlı Türkiyə prezidenti qərar verəcək, Azərbaycan hansısa şəkildə öz tərəfindən buna müdaxilə edə bilməz",-deyə Azərbaycanın xarici işlər naziri Elmar Məmməyarov bildirib. Azərbaycanın baş diplomatı diplomatik etiketin hüdudlarından çıxmadan rəsmi Bakının mövqeyini dolayısı ilə ortaya qoyur. Məmmədyarovun sözlərini belə yozmaq olar, Gülün İrəvan səfəri Bakıya xoş getməyib, amma bu, Türkiyənin daxili işidir və Azərbaycan "buna müdaxilə edə bilməz". Gülün siyasi meydandakı uğursuz gedişi fonunda Fatih Terimin komandasının - Türkiyə millisinin yaşıl meydandakı uğuru yalnız təsəlliverici ola bilər. "Ay-ulduzlular" bu gün qalib gəlməsələr, iki qat müsibət olacaq... X.Rüstəm