MÜ­BA­RİZ ƏH­MƏ­DOĞLU­: «AB­XA­Zİ­YA və CƏ­NU­Bİ OSE­Tİ­YA RU­Sİ­YA­NIN TƏR­KİB HİS­SƏ­Sİ­NƏ ÇEV­Rİ­LƏ­CƏK­» Mübariz Əhmədoğlu Siyasi İnnovasiya və Texnologiya Mərkəzi (SİTM) avqust ayında beynəlxalq və regional aləmdə baş verən ictimai-siyasi proseslərin ümumi yekunlarına dair hesabatını açıqlayıb. Hesabatı təqdim edən SİTM sədri Mübariz Əhmədoğlu ABŞ-Rusiya münasibətlərinin ötən ay da dünyanın diqqət mərkəzində olduğunu bildirib. Onun sözlərinə görə, iki ölkə arasındakı ziddiyyətlər daha da dərinləşərək Qərb-Rusiya gərginliyinə çevrilib. SİTM sədri avqust ayında Mərkəzi Asiya regionunda baş verən ən mühüm hadisə kimi Tacikistanın paytaxtı Düşənbədə Şanxay Əməkdaşlıq Təşkilatı (ŞƏT) sammitinin keçirilməsini göstərib: «Bu təşkilat Cənubi Osetiya hadisələri ilə bağlı Rusiyanın tutduğu mövqeyi anlayışla qarşılasa da, Kremli dəstəkləmədi». M.Əhmədoğlu Gürcüstanda cərəyan edən hadisələrin Ermənistan üçün təsirsiz ötüşməyəcəyini deyib. Qeyd edib ki, Ermənistan xarici aləmlə yalnız Gürcüstan vasitəsilə əlaqə yarada bilər: «Erməni ekspertləri İran vasitəsilə qurulan əlaqələrin səviyyəsindən razı deyillər. Söhbət İranın müsəlman dövləti olaraq öz ərazisindən erməni şərabını buraxmamasından getmir. Problem odur ki, İrandan Ermənistana gedən marşrut nəqliyyatçılar üçün münasib deyil. Türkiyə və Azərbaycan yolu da bağlı olduğu üçün Ermənistan Gürcüstana möhtac qalıb. Gəlin unutmayaq ki, Ermənistan Rusiyanın MDB məkanındakı bir nömrəli forpostu, Gürcüstan isə bir nömrəli düşmənidir. Rusiya ilə Gürcüstanın münasibətlərinin nə zaman və hansı şərtlər daxilində normallaşacağını heç kim deyə bilməz. Regionda baş verən son hadisələr Gürcüstanla yanaşı Ermənistanı da çətin vəziyyətə salıb». SİTM sədri Rusiyanın Abxaziyanı (ərazisi 8600 kvadrat kilomert, əhalisi 72 min nəfər) və Cənubi Osetiyanı (ərazisi 3900 kvadrat kilometr, əhalisi 72 min nəfər) müstəqil dövlət kimi tanımasını Rusiyanın öz marağına zidd sayır: «Bir müddət sonra hər iki respublika Rusiyanın tərkib hissəsinə çevriləcək. SSRİ dağıldıqdan sonra Qara dənizdə strateji mövqeləri zəifləyən Rusiya üçün Abxaziyada hərbi dəniz bazası yaratmaq hava-su kimi lazımdır. Müstəqil Abxaziya Rusiyanın bu tələbini ödəyə bilməz. Çünki nə vaxtsa Türkiyədəki 800 minlik abxaz diasporunun hətta üçdəbiri öz dədə-baba torpaqlarına geri dönməklə Kremlin strateji planını alt-üst edə bilər. Rusiyanın tərkib hissəsi olan Şimali Osetiya Cənubi Osetiyadan ərazisinə görə iki dəfə böyükdür. Şimali Osetiyada Cənubi Osetiyadan təxminən 10 dəfə çox, 704 min əhali yaşayır. Məntiqsizlik göz qabağındadır. Bu bir daha göstərir ki, istər Abxaziya, istərsə də Cənubi Osetiya bir müddət sonra Rusiyanın tərkib hissəsinə çevriləcək». Azərbaycana gəlincə, politoloq Türkiyənin baş naziri Rəcəb Teyyub Ərdoğanın Bakıya səfərinin böyük əhəmiyyət kəsb etdiyini deyib. Bildirib ki, bu vaxtadək Qafqazda Sabitlik və Əməkdaşlıq Platformasını Moskva və Tbilisidə müzakirə edən türkiyəli baş nazirin Azərbaycan prezidenti İlham Əliyevlə görüşü gözləndiyindən uzun çəkib. Politoloq rəsmi Bakının Ermənistanın bu ideyaya qoşulmasından narazı qaldığını bildirib: «Azərbaycan Ermənistanla bir masa arxasında oturmaq istəmir, Gürcüstan isə Rusiya ilə münasibətləri tamamilə kəsdi. Buna görə də Ərdoğanın bu ideyasının reallaşacağı şübhə altındadır». «Media forum»