Siyasətsiz baxış: Ermənistan-Türkiyə matçı nə vəd edir? Sentyabrın 6-da Ermənistan və Türkiyə milli komandaları arasında 2010-cu il dünya çempionatının seçmə oyunu keçiriləcək. 5-ci qrupda yer alan iki ölkə təmsilçisinin qarşılaşması İrəvandakı “Razdan” stadionunda baş tutacaq. Son Avropa çempionatının bürünc medalını qazanan “ay-ulduzlular”ın reytinqcə özündən xeyli zəif olan ermənilərlə matça qələbə üçün çıxacağı aydındır. Əslində, baş məşqçi Fatih Terimin yetirmələrinin buna tam imkanları da çatır. Lakin türklərə qələbənin asanlıqla başa gəlməyəcəyini indidən ehtimal etmək mümkündür. Məsələ təkcə qarşılaşmanın prinsipial əhəmiyyət daşımasında deyil. Terim komandasını Ermənistanla oyuna adi bir görüşə çıxırmışlar kimi kökləmək iqtidarındadır və bunu matç öncəsi keçirdiyi mətbuat konfransında da bəyan edib. İş ondadır ki, türklər zəif komandalarla və postsovet məkanı təmsilçiləri ilə görüşlərdə daim çətin anlar yaşayırlar. “Ay-ulduzlular” 2004-cü il Avropa çempionatının “pley-off” mərhələsində Latviyaya iki görüşün nəticəsinə əsasən uduzaraq, Portuqaliyaya yollana bilməmişdilər. Son Avropa çempionatının qrup mərhələsində Moldova ilə səfər matçında türklər 1:1 hesablı heç-heçə ilə kifayətlənməli olmuşdular. Bundan başqa, 2006-cı il dünya çempionatının seçmə tsiklində Gürcüstanla heç-heçə, Ukraynaya isə böyük hesablı məğlubiyyət Terimin rəhbərlik etdiyi komandanın passivində əksini tapıb. Əvəzində Ermənistan millisi 2008-ci il Avropa çempionatının seçmə mərhələsində kifayət qədər güclü təsir bağışlayıb. Eyni qrupda yer aldığı Azərbaycanla oyunları keçirilmədiyindən, 14 mümkün matçdan 12-sinə çıxan ermənilər 2 qələbə, 3 heç-heçəyə nail olublar. Baş məşqçiləri Yan Porterfild xərçəng xəstəliyi üzündən dünyasını dəyişənədək öz meydanlarında keçirdikləri görüşlərdə Polşanı məğlub edən, Finlandiya və Portuqaliyadan isə bir xal almağı bacaran ermənilər yalnız Belçikaya uduzublar, Y.Porterfildsiz isə Serbiya ilə də heç-heçə ediblər. Yalnız yekunda 5-6-cı yerləri tutan Belçika və Qazaxıstana İrəvanda məğlubiyyət Ermənistan yığmasının güclülərə qarşı güclü, zəiflərə qarşı isə zəif təsir bağışladığı görüntüsünü yaradıb. Amma “yan” soyadlı ermənilərin daha bir “Yan” adlı danimarkalı yeni baş məşqçi Yan Poulsenin rəhbərliyi altında nəyə qadir olduqlarını söyləmək bir qədər çətindir. Fakt budur ki, Ermənistan yığması bu il keçirdiyi 6 yoldaşlıq görüşündə cəmi bir dəfə – İslandiyaya 0:2 hesablı məğlubiyyətə uğradığı halda, Qazaxıstan, Malta, Belarusu yeniblər, Moldova və 20 avqusta təsadüf edən son yoxlama matçında Yunanıstanla qolsuz heç-heçəyə nail olublar. Ermənistan və Türkiyənin gənclərdən ibarət yığmaları hazırda davam edən Avropa çempionatının seçmə mərhələsində də eyni qrupda yer alıblar. Avqustun 20-də iki komanda arasında İrəvanda keçirilmiş oyunda ermənilər 0:1 hesabı ilə geridə olduqları halda, son dəqiqələrdə iki qol vuraraq, qələbəni təmin ediblər. Sadalanan faktlar Ermənistan millisi ilə qarşıdakı matçın “ay-ulduzlular” üçün heç də asan keçməyəcəyini təsdiqləyir. Bununla belə, türklərin xeyrinə tarixi baxımdan müsbət məqam da var. Belə ki, Türkiyə millisi indiyədək sentyabrın 6-da keçirdiyi 4 görüşün hamısını qələbə ilə başa vurub. Həmin qələbələrdən biri isə məhz keçmiş SSRİ yığması ilə 1984-cü ildə baş tutan yoldaşlıq matçına təsadüf edib. İstənilən halda, Türkiyə millisi Ermənistan yığması ilə qarşılaşmanın favoriti sayılmalıdır. Ümid edək ki, iki ölkənin prezidentləri Abdulla Güllə Serj Sərkisyanın da stadionda birgə izləyəcəyi qarşılaşmanın yekununda bukmeyker kontorları yox, məhz haqq-ədalət zəfər çalacaq. Elşən Məmmədov LENT.AZ