“AMERİKA AZƏRBAYCANI TƏHVİL VERƏ BİLƏR” Vəfa Quluzadə: “Əgər Vaşinqtonun belə bir planı yoxdursa, onda bizimlə hərbi müqavilə imzalasın” ABŞ dövlət katibinin müavini Daniel Frid Gürcüstanın işğalından sonra Azərbaycanın da təhlükədə olduğunu söyləyib. Ancaq eyni zamanda o, ölkəsinin Rusiyaya qarşı tədbir görməyə tələsmədiyini bildirməklə faktiki təhlükəyə məruz qala biləcək postsovet ölkələrinə kömək edə bilməyəcəklərinə işarə vurub. Lakin bu ərəfədə Amerikanın vitse-prezidenti Dik Çeyninin regiona Azərbaycandan başlayan səfərə gəlməsi Ağ Ev adminstrasiyasının hansısa tədbirlər görmək niyyətindən xəbər verir. Politoloq Vəfa Quluzadə Dik Çeyninin ilk dəfə Azərbaycana gəldiyini və onun Buşu təmsil etdiyini vurğulamaqla bərabər, nəticə çıxarmağa tələsmədiyini söylədi: “Görək o, gəlişi ilə bizə nə gətirir? Əgər düşünürsə ki, burda onun adının çəkilməsi Rusiyanı qorxudacaq, səhv edir. Rusiya olduqca cəsarətlənib. Buş bir müddət öncə Gürcüstana getmişdi, amma Rusiya onunla hesablaşmadı. İndi Çeyninin bölgəyə səfərinin nəyisə dəyişəcəyinə az ümid edirəm. Çünki Amerika Əfqanıstan və İraqda ilişib və üçüncü cəhbəni açmaq istəmir”. V.Quluzadə artıq Rusiyanın ABŞ-dan çəkinmədiyini qeyd etdi: “Mən Rusiyanın Gürcüstana hücumunu Moskvanın Amerikaya vurduğu təpik kimi qiymətləndirirəm. Çünki Amerikanın Gürcüstanda tikdiyi əsgəri və qeyri-əsgəri obyektləri Rusiya vurub dağıtdı”. Politoloq D.Fridin Azərbaycanın təhlükə altında olması barədə xəbərdarlığını real saydığını bildirdi. Ancaq V.Quluzadə D.Fridin bəyanatını ABŞ-ın acizliyinin nümunəsi olaraq qiymətləndirdi: “Frid Azərbaycana təhlükələrin olduğu barədə bəyanat verməkdənsə, deməliydi ki, biz Rusiyanın Azərbaycana hücum etməsinə imkan verməyəcəyik. Fakt budur ki, Azərbaycandan Amerikanın neft boru kəmərləri gedir, ancaq Rusiya onlara təhlükə yaradır. Digər tərəfdən rus qoşunu Potinin Azərbaycana aid hissəsində oturub, yüklərin daşıyan dəmir yolunu, terminalı partladıb. Qorxuram ki, Amerika bizi Rusiyaya təhvil verə bilər. Çünki Amerikanın Əfqanıstan və İraqda Rusiyanın dəstəyinə ehtiyacı var. Böyük dövlətlər belə alverə gedirlər. İndi görək Çeyninin Bakıya gəlməsi bizə nə gətirir? Çeyni Azərbaycana ciddi təhlükəsizlik qarantiyaları verəcəksə, onda demək olar ki, Amerika Qafqazda iddialı addımlar atmağa başlayıb. Yox, əgər o, Amerikanın meylini nümayiş etdirməyə gəlirsə, gəlməsəydi daha yaxşıydı. Çünki Rusiya bununla hesablaşmayacaq”. Ekspert ABŞ-dan konkret mövqe gözlədiyini bildirdi: “Görək ABŞ Azərbaycanla Rusiya və Ermənistan arasında bağlanmış əsgəri müqavilənin oxşarını bağlaya bilərmi? Əgər Amerika bizi qorumaq istəyirsə, onda çox demirəm, eynilə həmin müqaviləni bizimlə bağlasın. Əgər bunu etməyəcəklərsə, deməli, Azərbaycanı Rusiyaya təhvil vermək istəyirlər”. Milli Məclisin deputatı Fazil Qəzənfəroğlu isə hesab edir ki, Rusiyanın Azərbaycanı işğal etmək təhlükəsi realdır: “Xüsusilə də Qarabağ məsələsi ilə bağlı Rusiyanın müəyyən təzyiqlərinin güclənməsi ehtimalı böyükdür. Osetiya və Abxaziyanın tanınması istiqamətində Ermənistan tərəfindən hansısa addımlar atılarsa, bölgədə yeni bir situasiya yaranacaq. Xüsusilə Gürcüstan üçün çox ciddi sürprizlər ortaya qoya biləcək mahiyyətdədir. Belə olan təqdirdə atacağın addımlara bir-iki il sonra gecikmiş addımlar kimi baxmaqdansa, bu gün ölkənin taleyi üçün öz fikirlərini cəmiyyətə çatdırmağı daha düzgün sayıram. Hətta iqtidar tərəfindən səsləndirilən qəbulu məqbul olan fikirlərə də normal baxıram. Xüsusilə bu dövrdən Azərbaycan salamat, daha sabit vəziyyətdə çıxmalıdır. Çünki Gürcüstanın işğalından sonra bir fakt ortaya çıxdı ki, Tiflisin işğalı ərəfəsində bu ölkədə nə iqtidar vardı, nə də müxalifət. Hamısı bir taleni yaşayırdı. Mən Azərbaycana belə bir vəziyyəti arzulamıram. Amma elə bir taleni arzulayıram ki, biz hamımız bu barədə düşünə bilək”. Cavid TURAN musavat