Timsahın "göz yaşları "Rusiya BTC-yə birbaşa zərər vurmasa da, bu işi müəyyən terror qrupları vasitəsilə həyata keçirə bilər" Rusiyanın baş naziri Vladimir Putin ölkəsinin Gürcüstan ərazisindəki enerji obyektlərinə, o cümlədən Bakı-Tiflis-Ceyhan (BTC) əsas ixrac neft kəmərinə heç bir ziyan vurmadığını bəyanlayıb. Onun sözlərinə görə, Moskvanın əsas məqsədi regionda gedən enerji proseslərinə ziyan vurmaq deyil: "Türkiyənin rəsmi məlumatına görə, BTC-də terror aktını PKK törədib. Bu məsələnin də bizə heç bir aidiyyatı yoxdur. Bizim belə məqsədimiz olmayıb və ola da bilməz". Politoloq Rauf Mirqədirov Vladimir Putinin bu bəyanatını riyakarlıq kimi qiymətləndirdi. Ekspert eyni zamanda PKK-nın Bakı-Tiflis-Ceyhan neft kəmərində terror aktını törətməsinin Kremlə aidiyyatı olmaması barədə baş nazirin səsləndirdiyi fikirlərdə maraqlı məqamların olduğun da söylədi. Tural "Hətta terroru açıq şəkildə dəstəkləyən dövlətlər belə hər hansı bir konkret atılan addımın arxasında durmurlar. Ona görə də bu halda həmin ölkə rəsmiləri riyakarlıq etmək məcburiyyətində qalırlar". Onun sözlərinə görə, hətta Türkiyədəki məlum terror aktını birbaşa rus diversantları törətsəydi belə və əgər onların əməlləri sübut olunsaydı, Moskva yenə də bu əməlini inkar edəcəkdi. Rauf Mirqədirov ümumilikdə, son dövrlərdə Kremlin ssenarisi ilə bir sıra maraqlı hadisələrin baş verdiyini söylədi. BTC terroru, Gürcüstana hərbi müdaxilə və s. kimi olaylar təsadüfdən yaranmadı. Gürcüstana təcavüzü zamanı Moskva məhz infrastruktura zərbə endirməyə başladı. Poti və Kulevi limanları-hansılar ki, Azərbaycan nefti dünya bazarına bu limanlar vasitəsilə çıxırdı- zəbt olundu. Daha sonra məlum oldu ki, BTC-yə də raket zərbəsi endirilib. Sadəcə olaraq qeyri-dəqiq zərbə olduğu üçün kəmərə zərər dəymədi: "Yəni faktiki olaraq Kreml bütün bu addımları ilə sübut etməyə çalışdı ki, enerji obyektlərinin bu regionda yerləşməsi o qədər də ideal deyil. Təhlükəsizlik baxımından istənilən anda Bakı-Tiflis-Ceyhan neft kəmərinə zərbələr ola bilər. Neft ixrac edən ölkələr isə yeni variantlar axtarmalıdır. Digər tərəfdən, Azərbaycanda rast gəlmədiyimiz terror aktları da baş verdi- "Əbu Bəkr" məscidinə hücum və Xətai rayonunda transformatorda partlayışlar törədildi. Bunun ardınca isə Rusiya ilə sərhədində yenə də toqquşma oldu. Eyni vaxtda baş verən bu hadisələrə adi baxmamalı və bunu təsadüfi hadisə saymamalıyıq. Bu artıq müəyyən bir ilginc sistem və planın mövcudluğundan xəbər verir. Əgər bu gün "Əbu- Bəkr" məscidindəki hadisələri hüquq mühafizə orqanlarının üzə çıxardığı şəxslər törədiblərsə, onlar birbaşa Rusiya ilə bağlı olan insanlardır. Yəni ardıcıl hadisələrin və faktların toplusu onu göstərir ki, baş verənlər düşünülmüş bir planın tərkib hissəsidir. Moskva Bakıya birbaşa təzyiq vasitələrindən istifadə etməyə çalışır". Politoloqun fikrincə, Kremldə düşünürlər ki, artıq Azərbaycan hakimiyyətinin yeni situasiya ilə bağlı seçim etmək anı çatıb və bu seçim məhz Rusiya maraqlarına xidmət etməlidir. Ekspert Moskvanın mövqeyinə uyğun addımların atılmayacağı təqdirdə birbaşa olaraq PKK-dan Azərbaycana qarşı da istifadə etməyi istisna saymadı. Rauf Mirqədirov Vladimir Putinin PKK-nın terror aktlarında Kremlin əlinin olmamasının deməsini də gülünc saydı. Heç kimə sirr deyil ki, terrorçu PKK-nın yaradılmasında Rusiyanın böyük rolu olub. Bu gün PKK ilə birbaşa əlaqəsi olan insanlar Moskvada da açıq şəkildə fəaliyət göstərirlər. Yəni Rusiyanın bu təşkilata təsir imkanları həm tarixən güclü olub, həm də bu gün imkanlar və əlaqələr daha möhkəmdir. Ona görə də Vladimir Putinin bəyanatına baxmayaraq Moskva PKK-nın əli ilə nəinki Türkiyədə, regionun istənilən ölkəsində terror aktları törədə bilər: "Əgər region dövlətləri Moskvaya zidd seçimlər etsə, Rusiya bütün təsir vasitələrindən yararlanacaq. Bu gün Qafqazda bir çox maraqlar toqquşur. Kifayət sayda nəzarət altında olmayan qruplaşmalar da var ki, dini və etnik pərdə altında gizlənirlər. İstisna deyil ki, şimal qonşumuz onların gücündən yararlansın. Yəni Rusiya BTC-yə, nəhəng enerji-nəqliyyat layihələrə birbaşa zərbələr vurmasa da, bu işi terror qruplaşmaları vasitəsilə həyata keçirə bilər". xalqcebhesi