Moskvanı iki ssenari gözləyir "Sentyabrın 15-dək AB sanksiyalar barədə qərarlar qəbul etməsə, ABŞ Moskvaya qarşı sərt siyasət həyata keçirəcək" Sentyabrın 1-də Avropa Birliyinin (AB) Brüsseldə keçirilən fövqəladə toplantısında sərt qərar verilməyib. Birlik rus qoşunları Gürcüstandan geri çəkilənə qədər Moskvayla strateji ortaqlıq müzakirələrini təxirə salıb. Rusiyanın xarici işlər naziri Sergey Lavrov bu qərardan məyus olduqlarını söyləyib. Almaniyanın kansleri Angela Merkel Rusiyanın qoşunlarını Gürcüstanda 7 avqustda başlayan müharibədən əvvəlki mövqeyə çəkəcəyinə qarantiya verdiyini söyləyib. Onun sözlərinə görə, Avropa Birliyinə sədrlik edən Fransa prezidenti Nikolas Sarkozi rusiyalı həmkarı Dmitri Medvedyevlə görüşündə belə vəd alıb. Angela Merkel bildirib ki, rus əsgərləri Poti limanından və Senakidən çəkiləcəklər. Ramiz Mikayıloğlu Nikolas Sarkozi və Avropa Birliyi Komissiyasının başqanı Jose Manuel Barroso və qurumun ali nümayəndəsi Havyer Solonadan ibarət heyət də sentyabrın 8-də Moskva və Tiflisdə görüşlər keçirəcəklər. Fransanın hazırladığı və sammitdə yayımlanan bəyannamədə Rusiyaya özünü Avropadan təcrid etməmək məsləhət görülür və Gürcüstanda baş verənlər sonucunda Moskvayla münasibətlərin yol ayrıcına gəldiyi vurğulanır. Şimal qonşumuzun Cənubi Osetiya və Abxaziyanın "müstəqilliyini" tanımasını sərt bir şəkildə qınayan AB digər ölkələrin bu addımı atmamalarını istəyir. Bəyannamədə Birliyin enerji qaynaqlarının müxtəlifliyinə diqqət yetirməsinin önəmi bir daha vurğulanıb. AB-nin fövqəladə sammitinin yekunlarıyla bağlı fikirlərini öyrəndiyimiz politoloq Qabil Hüseynli deyir ki, AB ölkələri ehtiyatlı hərəkət ediblər. Bu dəfə sərt qərarların çıxarılmasını əngəlləyən Almaniya və İtaliya olub. Amma məsələ burasındadır ki, Berlin və Roma da sərt qərarların əlehdarları kimi çıxış etmirlər. Sadəcə, Rusiyayla inandırma və təsir yoluyla davranmağı məqbul sayırlar. Almaniya və İtaliya hesab edir ki, diplomatik kanallar vasitəsiylə Moskvanı geri addım atmağa vadar etmək olar. Amma yanılırlar. Politoloqa görə, hadisələrin inkişafının iki variantı var. Birincisi, Nikolas Sarkozi Moskvada görüşlər keçirdikdən sonra geri əli ətəyindən uzun qayıdacaq. Avropalılar başa düşəcəklər ki, rus təbiəti, rus xarakteri nə deməkdir. Xüsusən cibində bir az pulu və silahının sayı çox olan rus nə deməkdir. Ondan sonra yəqin ki, təhlükənin reallığını anlayacaqlar. Bu təhlükə tək Gürcüstan üçün deyil. Rusiya yavaş-yavaş bütün dünyaya təsir etməyə başlayır. Moskva neftdən və qazdan yığdığı pulları yeni silah növlərinə ayırır. Bu da çox təhlükəli tendensiyadır. Rusların silahları müasirləşdikcə və çoxaldıqca başqa ölkələrə, onları ələ keçirməyə iştahları artır. Onun sözlərinə görə, AB sentyabrın 15-dək yenidən toplanacaq. O zaman yəqin ki, Rusiyaya sanksiya tətbiqi məsələsi gündəmə gələcək. Hadisələrin ikinci inkişaf variantına görə, əgər o zaman da AB sanksiyalar barədə qərarlar qəbul etməsə, ABŞ AB-ni dağıtmadan, Birliyin sanksiya tərəfdarları olan ölkələriylə birlikdə yeni anti-Rusiya alyansında birləşərək, Moskvaya qarşı sərt siyasət həyata keçirəcək: "Əgər qısa zaman fasiləsində diplomatik yanaşmalar bir effekt verməsə, daha səmərəli və təsiredici yollar üzərində düşünəcəklər". Yeri gəlmişkən, AB-nin sammiti gedişində Rusiya Polşa və Almaniyaya qaz ötürülməsini sentyabrın 2-də saat 16:00-dan 3 sentyabr 22:00-dək dayandıracağını bəyanlayıb. Bu, kəmərlərdəki "təmir"lə əlaqələndirilib. Bəs Moskvanın enerji xəbərdarlığı AB-nin gələcək addımlarının müəyyənləşməsinə ciddi təsir göstərə bilərmi? Qabil Hüseynli bildirdi ki, onsuz da xarici işlər naziri Sergey Lavrov AB-nin sanksiyalar barədə qərarlar qəbul etdiyi halda qaz ötürülməsini dayandıra biləcəklərini söyləmişdi: "Avropaya qaz ötürülməsinin iki günlüyə dayandırılması Rusiyanın təhdididir. Amma məsələ burasındadır ki, Avropa alternativ qaz layihələri üzərində düşünməli və təcili Rusiyanın enerji aslılığından qurtarmaq yollarını aramalıdır". xalqcebhesi