Moskva təxribat ssenarisini işə salıb "Bu gün Azərbaycanda təxribat törətməyə çalışan vəhhabi qrupun arxasında Səudiyyə Ərəbistanı durmur" Avqustun 30-da Dağıstan istiqamətindən bir qrup vəhhabi yaraqlısı Qusar rayonunun Nəzrə kəndi yaxınlığında sərhədimizi keçməyə cəhd göstərib. Bu zaman sərhədçi əsgərlərimizlə onlar arasında atışma başlayıb. Atışma zamanı bir əsgərimiz həlak olub. Silahlı qrup daha sonra hadisə yerindən uzaqlaşıb. Onların sərhədi keçdiyi və Qusar rayonu ərazisindəki meşəliklərdə gizləndiyi güman edilir. Atışmadan sonra Qusar rayonuna xüsusi təyinatlı dəstələr göndərilib, yaraqlıların axtarışı üçün vertalyotlar cəlb edilib. Mətbu orqanların yazdığına görə, Daxili Qoşunların Biləcəridə dislokasiya olunmuş alayı da yaranmış gərginliklə bağlı Qusar rayonuna göndərilib. Rəvan Məmmədli Ekspertlər baş verənlərin arxasında Rusiya xüsusi xidmət orqanlarının dayandığına əmindirlər. Təhlükəsizlik Araşdırmaları Mərkəzinin rəhbəri İlham İsmayıl deyir ki, şimal qonşumuzda yaşayanların əksəriyyəti arasında vəhhabi təriqəti kifayət qədər, həm də aqressiv formada inkişaf edib. Bu da təsadüfi deyil. Məsələn, Çeçenistan hadisələrində əsas dəstək vəhhabiliyin əsas və rəsmi təriqət olduğu Səudiyyə Ərəbistanından gəlib. İlham İsmayıla görə, "Əbu-Bəkr" məscidində baş verən son partlayış hadisəsiylə bağlı Dağıstandan aqressiv vəhhabi qruplarının Azərbaycana keçməsi mümkündür. Ümumiyyətlə, hadisələrə bölgədə baş verən proseslər aspektində yanaşılsa, vəhhabi dəstəsinin şimaldan sərhədlərimizi keçməsi, hüquq-mühafizə orqanlarıyla qarşılaşması fonunda təxribatın şimal qonşumuzdan gəlməsini daha inandırıcı versiya kimi irəli sürmək olar: "Ancaq demək ki, bu, Azərbaycan dövləti üçün hər hansı gərginlik, ciddi qarşıdurma yaradacaq. Azərbaycanda qarşıdurma yaradacaq səviyyədə vəhhabilik yoxdur. Amma bu o demək deyil ki, hüquq-mühafizə orqanlarımız, təhlükəsizlik xidmətimiz məsələyə dırnaqarası baxmalıdırlar. Çünki qığılcımdan alov törər. Bu, dindir, həssas mövzudur, kifayət qədər insanların şüuruna yeriyib. Həm də nəzərə alınmalıdır ki, vəhhabilik təriqətində aqressivlik çoxdur. Ona görə də bunun qarşısı ciddi şəkildə alınmalıdır. Hər bir informasiya diqqətdə saxlanılmalıdır". Təhlükəsizlik Araşdırmaları Mərkəzinin rəhbəri dedi ki, bütün bu proseslərin eyni mərkəzdən idarə olunmasını həmişə xüsusi vurğulamaq lazımdır. Sonradan baş verən hadisələr isə o mərkəzin nəzərdə tutduğu təxribatların fonunda cərəyan edir. Yəni dünən "Əbu-Bəkr"ə qumbara atanda onun əks nəticəsinin nə olacağını hesablamaq çətin deyil. Əks reaksiyanı idarə etməmək də olar, çünki həmin reaksiyanın necə olacağı bilinir. Şimaldan da, daxildən də qüvvələr qalxa bilər və elə də oldu. Ekspert hesab edir ki, xüsusən seçki dövründə hüquq-mühafizə orqanlarının hər hansı radikal addımın qarşısını alması çox vacibdir: "Bu gün Azərbaycanda təxribat törətməyə çalışan vəhhabi qrupun arxasında Səudiyyə Ərəbistanı durmur. Çeçenistan müharibəsi zamanı Səudiyyə Ərəbistanından gələn müəyyən şəxslər proseslərin arxasında dayanırdılar. O zaman da, bu gün də Səudiyyə Ərəbistanı Azərbaycanın əleyhinə heç nə etmir və belə marağı da yoxdur. Sadəcə, ayrı-ayrı radikal şəxslər, qrupların hərəkəti şimaldan, Rusiyadan qaynaqlanır. İkinci Çeçenistan müharibəsi göstərdi ki, Rusiya vəhhabilərin idarəçiliyini öz əlinə keçirib, bu radikal qrupu Moskva yönləndirir. Məhz 1999-cu ildə Çeçenistandan Dağıstana hücum edərək, Çobanmahi, Qaramahi kimi kəndləri tutan vəhhabilər Rusiyanın əlinə Çeçenistana hücum üçün bəhanə verdilər, baş nazir Vladimir Putinin prezident seçilməsini, "qalib" olmasını asanlaşdırdılar. Bir daha vurğulayıram ki, "Əbu-Bəkr"də baş verən partlayışdan sonra bunu törədən mərkəz əks-reaksiyanın necə olacağını bilirdi. Bilirdilər ki, məscidə qumbara atandan sonra nə isə baş verəcək. Şimal sərhədimizdə baş verənlər də bunun əks-reaksiyasıdır. Bunun da qarşısı alınmalıdır". Dünən Baş Prokurorluq da məlumat yayıb. Məlumatda bildirilir ki, Azərbaycanın şimal bölgəsində yerləşən Qusar rayonu ərazisində avqustun 30-da Daxili Qoşun hissələrinin sələfilərə (vəhhabilər) qarşı keçirdiyi əməliyyatla bağlı cinayət işi açılıb. Faktla bağlı Ağır Cinayətlərə Dair İşlər üzrə İstintaq İdarəsində Cinayət Məcəlləsinin qəsdən adamöldürmə (120) maddəsilə cinayət işi açılıb. Hadisənin təfərrüatları barədə əlavə məlumat verilmir. Qusar rayon prokuroru Vamiq Əsədov bildirib ki, hadisə zamanı Daxili Qoşunların bir əsgəri öldürülüb. Prokuror hadisənin təfərrüatlarıyla bağlı əlavə məlumat verməyib. O, hadisənin kim tərəfindən törədildiyinin məlum olmadığını, hadisəni törədən şəxslərin qaçdığını deyib. Öldürülən əsgər Bakının Binəqədi rayon Hərbi Komissarlığından hərbi xidmətə çağrılmış, müddətdən artıq hərbi xidmət quluqçusu 23 yaşlı Əli Yolçuyevdir. Daxili Qoşunların mətbuat xidmətindən həmin ərazidə əməliyyat keçirildiyi təsdiqlənib. Amma hadisəylə bağlı əlavə məlumat verilmir. xalqcebhesi