Saakaşvili Potidə sərt bəyanatlar verdi Gürcüstan prezidenti separatçı qurumlara qarşı sərt sanksiyaların tətbiq olunacağını bildirib Bütün rus qoşunları Psou çayının əks tərəfinə (Abxaziya istiqamətində Gürcüstan-Rusiya sərhədi) və Rok tunelinin arxasına (Sxinvali istiqamətində Gürcüstan-Rusiya sərhədi) keçməyincə Gürcüstan ərazisi işğal edilmiş sayılacaq. Bu barədə ölkə prezidenti Mixail Saakaşvili Poti şəhərində rayon administrasiyalarının rəhbərləri ilə görüşdə bildirib. Prezident “rus işğalı günlərində görünməmiş birlik və rəşadət göstərən xalqa” təşəkkür edib:"Hökumətimiz də güclü və möhkəm idi və çox effektli işləyirdi", deyə Saakaşvili qeyd edib. Prezident həmçinin qeyd edib ki, Gürcüstan böhran günlərində bütün dünyadan görünməmiş birləşmiş dəstək alıb. “Bu, mənim üçün gözlənilməz idi. Bu, xalqımızın möhkəmlik və birlik nümayiş etdirməsi sayəsində mümkün olub", deyə Saakaşvili qeyd edib. Dövlət başçısı qeyd edib ki, indi əsas vəzifələrdən biri bütün dağıdılmış obyektləri bərpa etmək və ölkənin inkişafı ilə məşğul olmaq, ölkəni investorlar üçün daha cazibəli etməkdir. Saakaşvili Gürcüstanın bu günlərdə xaricdən çox böyük kömək aldığını qeyd edib. Prezidentin sözlərinə görə, ümumilikdə bir milyard dollardan çox vəsait daxil olacağı gözlənilir, bu vəsait zərərçəkmiş əhaliyə kömək göstərilməsi və ölkənin inkişafı üzrə layihələrə sərf edilməlidir. Eyni zamanda, dövlət başçısı Moskvanın qondarma Abxaziya və Cənubi Osetiya respublikalarının müstəqilliyini tanımaq qərarını xatırladaraq qeyd edib ki, Gürcüstan rəhbərliyi bu ərazilərdə istənilən qanunsuz əməlin cəzasız qalmaması üçün tədbirlər görəcək:"Biz qanunlar qəbul edəcəyik ki, onlar əsasında Abxaziya və Cənubi Osetiyada istənilən biznes fəaliyyəti və ya vəsait qoyulması qanunsuz elan edilsin", deyə Saakaşvili bildirib və söz verib ki, xarici partnyorların, ilk növbədə ABŞ-ın köməyi ilə qanunu pozanlara qarşı beynəlxalq sanksiyalar tətbiq edilməsinə nail olacaq (Turan). GUAM Gürcüstanla bağlı bəyanat verəcək Bəyanat təşkilata üzv ölkələrin xarici işlər nazirlərinin görüşü çərçivəsində qəbul ediləcək Demokratiya və iqtisadi inkişaf uğrunda təşkilat- GUAM-ın Xarici Işlər Nazirləri Şurası Gürcüstandakı vəziyyətlə əlaqədar bəyanatla çıxış etmək niyyətindədir. Bu barədə “Trend”ə GUAM katibliyi proqramlarının koordinatoru Georgi Nazarov məlumat verib. Onun sözlərinə görə, bəyanat təşkilata üzv ölkələrin - Gürcüstan, Ukrayna, Azərbaycan və Moldovanın xarici işlər nazirlərinin görüşü çərçivəsində qəbul ediləcək. Nazirlər BMT Baş Assambleyasının sentyabrın ikinci yarısına təyin edilən növbəti sessiyası zamanı toplaşmağı planlaşdırırlar",- deyə Nazarov bildirib. Yəqin ki, təşkilata üzv ölkələrdən biri belə təşəbbüslə çıxış edəcək. Avropa Ittifaqı Gürcüstana yardım edəcək Avropa Ittifaqının Brüsseldəki sammitində bu məsələlər yüksək səviyyədə müzakirə ediləcək Avropa Ittifaqı strukturlarında Rusiya Silahlı Qüvvələrinin Gürcüstanın işğal olunmuş ərazilərindən dərhal çıxarılması və Rusiyanın hərbi təcavüzünün nəticələrinin aradan qaldırılmasında bu ölkəyə yardım məqsədilə, AI-nin rolunun fəallaşdırılması məsələsi barədə intensiv müzakirələr aparılır. Bu barədə Gürcüstanın xarici işlər nazirinin müavini Qriqol Vaşadze ilə görüşdə AI-nin Cənubi Qafqaz üzrə xüsusi nümayəndəsi Piter Semnebi bildirib. O qeyd edib ki, Fransa prezidenti Nikolya Sarkozinin sentyabrın 1- də Brüsseldə çağırdığı AI sammitində bu məsələlər yüksək səviyyədə müzakirə olunacaq. Görüşdə tərəflər Rusiyanın Gürcüstan ərazilərinə təcavüzü və işğalından sonra yaranmış vəziyyəti müzakirə ediblər. Vaşadze Avropa tərəfini, yeni reallıqlar nəzərə alınmaqla, Gürcüstan ilə AI arasında qarşılıqlı əlaqələrin dərinləşdirilməsi və inkişafına gürcü tərəfinin baxışları ilə tanış edib və bu planda sıx əməkdaşlıq təklif edib. O bildirib ki, Rusiya Fransa prezidentinin təşəbbüsü ilə əldə olunan altı bəndlik müqavilənin şərtlərinə yenə də əməl etmir. “Reuters” Rusiyanı ifşa etdi Agentlik BTC-nin Gürcüstandan keçən hissəsini Rusiyanın bombaladığına dəlalət edən kadrlar yayımlayıb “Reuters” Bakı-Tiflis-Ceyhan neft kəmərinin Gürcüstandan keçən hissəsini Rusiyanın bombaladığına dəlalət edən kadrlar yayımlayıb. Kadrlarda neft kəməri boyunca ərazidə məhz bombardman nəticəsində əmələ gəlmiş iri çalalar aydın görünür. Çalaların diametri bir neçə metrə çatır. Xatırladaq ki, Gürcüstan tərəfi Rusiyanın müharibə günlərində BTC-ni bombalamaq istədiyi barədə bir neçə dəfə bəyanat verib. Rusiya tərəfi isə bunu inkar edib. Indi “Reuters”in yaydığı kadrlar Tiflisin dediklərinə sübut sayıla bilər. Amma bir məsələ qaranlıq qalır ki, Rusiya bombardmançıları həqiqətən də BTC-ni nişan alıblarsa, nəyə görə bütün mərmilər kəmərin ətrafına dəyib. Tiflisdə Leninin şəkli yandırılıb Dünən Gürcüstanın paytaxtı Tiflisdə Gürcüstan vətəndaşları şəhər küçələrinə çıxaraq ölkədə rus qoşunlarının hələ də iştirakının əleyhinə nümayişlər keçiriblər. Çukorotski məntəqəsindəki rus ordusunun yerləşdiyi bazanın qarşısında etiraz aksiyası keçirən yerli əhali Gürcüstan bayrağını yellədərək rus inqilabçısı Vladimir Leninin təsvirini daşıyan bayrağı yandırıblar. Sakinlərdən birinin sözlərinə görə, ölkələrinin işğal edilməsi utandırıcı ambisiyadır və kiçik ölkə olaraq bunu ittiham edirlər və bildirirlər ki, onlar təslim olmayacaq, torpaqlarını verməyəcəklər. Aksiya iştrakçılarından biri qeyd edib ki, Rusiya ilə diplomatik əlaqələrin kəsilməsi qərarı düzgün addımdır:"Çünki bizim şahidi oduğumuz təcavüzdən sonra əlaqələr əvvəlki kimi davam edə bilməzdi". Gürcüstan ruslara viza verilməsini dayandırdı Dünəndən etibarən Gürcüstanın Rusiya ilə dövlət sərhədindəki bütün nəzarət-buraxılış məntəqələrində RF vətəndaşlarına vizaların verilməsi dayandırılıb. “Interfaks”ın verdiyi xəbərə görə, bununla bağlı Gürcüstanın Xarici Işlər Nazirliyi məlumat yayıb. Nazirlikdən bildirilib ki, artıq bundan sonra Gürcüstana getmək istəyən bütün Rusiya vətəndaşları vizanı Gürcüstanın üçüncü ölkələrdə yerləşən konsulluqlarından almalıdır. Xatırladaq ki, indiyədək Gürcüstana səfər edən Rusiya vətəndaşları vizanı Tiflis aeroportunda 20 ABŞ dolları ödəyərək alırdılar. azadliq