SƏRKİSYAN-GÜL DANIŞIQLARI “RAZDAN” STADİONUNDA KEÇİRİLƏCƏK Rəcəb Tayyib Ərdoğan: “Prezident xarici işlər naziri ilə gedəcək, oturub hər şeyi müzakirə edəcəklər, xeyirli olsun” Türkiyə prezidenti Abdullah Gül İrəvana səfər edib-etməyəcəyi haqda bu günədək konkret danışmasa da onun səfəri ilə bağlı neçə vaxtdır davam edən müəmmalara nöqtə qoyulub. Baş nazir Rəcəb Tayyib Ərdoğan onun adından elan edib ki, bu səfər baş tutacaq. “Xarici işlər naziri ilə birgə gedəcəklər, oturub hər şeyi müzakirə edəcəklər, xeyirli olsun”- deyə Ərdoğan bildirib. Xatırladaq ki, Ermənistan prezidenti Serj Sərkisyan A.Gülü iki ölkənin milli futbol komandalarının oyununa baxmaq üçün İrəvana dəvət edib. Əslində bu dəvət Ermənistanla Türkiyə arasında barışıq əldə edilməsinə xidmət edir. Sentyabrın 6-da keçiriləcək futbol matçına az qalsa da Türkiyə prezidenti hələ də Ermənistana gedib-getməyəcəyini açıqlamırdı. Hətta onun İrəvana gedəcəyi haqda həm Türkiyə, həm də Ermənistan hökumətindəki mənbələrə istinadən xəbərlər yayılırdı. Amma A.Gül Türkiyə Silahlı Qüvvələrinin Baş Qərargahı tərəfindən 30 avqust Qələbə bayramı münasibətilə təşkil edilən ziyafətdə jurnalistlərin bu məsələ ilə bağlı suallarına cavab olaraq “hələ qərar vermədim” deyib. Baxmayaraq ki, onun İrəvana gedəcəyini həmin mərasimdə iştirak edən baş nazir Ərdoğan da təsdiqləmişdi. Xatırladaq ki, ötən həftə Türkiyə hökumətinə bağlı mənbələr Prezidentin Xüsusi Mühafizə Xidmətinin 15 əməkdaşının dövlət başçısının təhlükəsizliyini təmin etmək üçün İrəvana göndəriləcəyini xəbər verib. “Maskalı pişiklər” adlı xüsusi təyinatlı dəstənin əməkdaşlarının dünən İrəvana göndəriləcəyi gözlənilirdi. Onlar Ermənistan prezidentinin mühafizə xidməti ilə birgə A.Gülün təhlükəsizliyini təmin edəcək. Türkiyə mətbuatının məlumatına görə, A.Gül əvvəlcədən İrəvana səfərin tərəfdarı olub. O, Ermənistana səfər edən ilk Türkiyə prezidenti adını qazanmaq istəyib. Lakin Xarici İşlər Nazirliyindən diplomatlar prezidentə məsləhət görüb ki, bu səfərə ehtiyatla yanaşsın. Bildirilir ki, Azərbaycan prezidenti İlham Əliyevin bu səfərdən narahat olacağı yönündəki fikirlər səfərə hazırlığın son anadək gizli aparılmasına səbəb olub. Məlumatlara görə, A.Gül İrəvanda ən çoxu 3 saat qalmaq istəyir. Onun hava limanından birbaşa İrəvanın “Razdan” stadionuna getməsi gözlənilir. A.Gülün S.Sərkisyanla görüşü və danışıqları da stadionda baş tutacaq. Oyun başa çatandan dərhal sonra A.Gül Ankaraya dönəcək. A.Gülün bu səfər zamanı Ermənistan prezidenti ilə rəsmi danışıqlar aparacağı gözlənilmir. Lakin digər məlumata görə, belə danışıqlar istisna da deyil, xarici işlər naziri Əli Babacan isə ermənistanlı həmkarı ilə Türkiyənin irəli sürdüyü “Qafqaz platforması” ideyası ilə bağlı ayrıca müzakirələr aparacaq. Türkiyənin ana müxalifət lideri Dəniz Baykal isə prezident A.Gülün İrəvana getmək qərarını tənqid edib. Onun sözlərinə görə, prezidentin səfəri heç də futbol matçına baxmaq məqsədi daşımır: “Bu, uzun müddətdir aparılan siyasətin bəhrəsidir. Türkiyə indi bir futbol matçı bəhanəsi ilə Ermənistanla yeni münasibətlərə girməyə çalışır. Bu günə qədər bizim Ermənistana dair siyasətimiz nəyə görə o cür idi? Nəyə görə Ermənistanla münasibətlərimizdə diqqətlə davranırdıq və əlaqələr qurmaq üçün şərtlər irəli sürürdük? Ermənistanla nəyə görə Azərbaycanla olan münasibətləri qurmamışdıq, bunun səbəbləri nə idi?” D.Baykal bu sualları izah edərək deyib ki, Ermənistan bu günədək Türkiyənin sərhədlərini tanımayıb. İkincisi, “soyqırım” iddialarını bütün vasitələrlə dəstəkləyir. Üçüncüsü isə Ermənistan Azərbaycan torpaqlarını işğal edib. “Ona görə də mənə “Ermənistanda futbola baxmağa gedərsinizmi” sualına “Yox, Bakıya matça getməyi üstün tutardım” şəklində cavab verirəm”- deyə D.Baykal jurnalistlərə bildirib. F.MƏMMƏDOV musavat