İRƏVAN ANKARAYA TƏHLÜKƏLİ “HƏDİYYƏ” HAZIRLAYIR Ermənistan Türkiyə ilə barışığın əvəzində Şimali Kipri tanıya bilər “Ermənistan parlamentində bu ölkənin Şimali Kiprin müstəqilliyini tanıması barədə qanun layihəsi hazırlanıb” . Bu sözləri dünən AMEA İnsan Haqları İnstitunun direktoru Rövşən Mustafayev bölgədəki vəziyyətə həsr olunmuş tədbirdə səsləndirib. Onun bildirdiyinə görə, hazırda bu qanun layihəsinin səkkiz variantına baxılır: “Əgər sözügedən qanun qəbul olunarsa, iki qardaş ölkə arasında vəziyyət gərginləşəcək”. Bildirilir ki, Ermənistan Türkiyənin son vaxtlar verdiyi barışıq mesajlarına cavab olaraq bu addımı ata bilər. Qeyd edək ki, erməni mənbələrində Şimali Kiprin müstəqilliyinin tanınması barədə qanun layihəsinin hazırlandığı haqda heç bir məlumata rast gəlmək mümkün deyil, bu baxımdan xəbərin nə dərəcədə dəqiq olduğunu müəyyən etmək çətindir. Bununla belə, istisna deyil ki, Ermənistan Türkiyənin jestlərinə cavab olaraq belə addım ata bilər. Bu isə Azərbaycanla Türkiyənin münasibətlərinin gələcəyi üçün olduqca təhlükəli ola bilərdi. Çünki Azərbaycan indiyədək Dağlıq Qarabağ münaqişəsini nəzərə alaraq Şimali Kipri tanımayıb və onunla diplomatik münasibətlər yaratmayıb. Lakin indi Ermənistan bunu etməklə Dağlıq Qarabağın müstəqilliyinin tanınması məsələsində Türkiyənin mövqeyini ən azı yumşalda bilər. Xəbər verildiyi kimi Türkiyə prezidenti Abdullah Gülün sentyabrın 6-da İrəvana gedəcəyi dəqiqləşib. Ermənistan prezidenti Serj Sərkisyan isə Türkiyənin “Radikal” qəzetinə verdiyi müahibədə dəvətini bir daha yeniləyib. Sərkisyan deyib ki, iki ölkənin milli futbol komandaları ilk dəfə görüşürlər. “Bu, münasibətlərimizin inkişafı üçün yaxşı fürsətdir. Prezident Gülə dəvəti də bu çərçivədə etdim”. Sərkisyan vəd edib ki, Türkiyə prezidentinin İrəvana səfəri zamanı təhlükəsizlik ən yüksək səviyyədə təmin olunacaq. “Heç bir narahatlıq ola bilməz. Təşkilati və texniki hazırlıqlar bir yana, bir dövlət başçısı dəvət etdik və dövlət başçısına yaraşan şəkildə qarşılanması üçün hər cür tədbirlər görüldü”. Ermənistan prezidenti deyib ki, onun ölkəsi Türkiyə prezidentini qarşılamağa tam hazırdır. Sərkisyan Türkiyə baş naziri Rəcəb Tayyib Ərdoğanın irəli sürdüyü “Qafqaz platforması” ideyasını da dəstəkləyib. O xatırladıb ki, xarici işlər naziri Edvard Nalbəndyan Türkiyənin regionda əməkdaşlığa və təhlükəsizliyə xidmət edən təşəbbüsünü alqışladığını artıq bəyan edib. Sərkisyan onu da bildirib ki, Ermənistanın hansısa dövlət rəsmisinin Türkiyədən torpaq tələb etdiyini xatırlamır. “Biz Türkiyə ilə münasibətlərdə heç bir tələb irəli sürülməsini istəmirik. Ermənistanın rəsmi siyasətində Türkiyədən ərazi tələb edilməsi məsələsi dayanmır”. Xatırladaq ki, bir gün əvvəl Ermənistan prezidenti iki ölkə liderlərinin “mühüm qərar” ərəfəsində olduğunu bildirmişdi. O demişdi ki, bu qərar nə Ermənistanda, nə də Türkiyədə hamını razı salmayacaq. Sərkisyan onu da deyib ki, Dağlıq Qarabağ münaqişəsinin yaxın vaxtlarda dinc yolla həll ediləcəyinə inanır. Ermənistan prezidentinin sözlərinə görə, xarici işlər nazirləri Madrid sənədi əsasında danışıqlar aparırlar və ümid var ki, razılaşma yaxın vaxtlarda əldə olunacaq. Dünən Azərbaycanın xarici işlər naziri Elmar Məmmədyarov Qafqazdakı vəziyyəti müzakirə etmək üçün Türkiyəyə gedib. Türkiyənin Xarici İşlər Nazirliyindən bildiriblər ki, səfər məsləhətləşmə xarakteri daşıyır. Məmmədyarov Ankarada Türkiyə prezidenti, baş naziri və başqa rəsmi şəxslərlə görüşərək, Rusiya-Gürcüstan münasibətlərini və Ankaranın irəli sürdüyü “Qafqaz Evi” təklifini müzakirə edəcək. Şübhə yoxdur ki, Məmmədyarovun Ankara təmasları zamanı Ermənistanla yaxınlaşma və prezident Abdullah Gülün İrəvana səfəri də gündəmə gələcək. Elmar Məmmədyarov Ankaradakı təmaslarından sonra bildirib ki, Abdullah Gülün İrəvana səfəri Türkiyənin daxili işidir. Hazırda bir məsələ Azərbaycan ictimaiyyətini narahat edir: Türkiyə Ermənistanla barışıq əldə etmək səyləri göstərdiyi bir vaxtda Azərbaycanın mənafelərini nəzərə alırmı? Qərb mənbələri xəbər verirlrə ki, Türkiyə Ermənistanı izolyasiyada saxlamaqla Dağlıq Qarabağ ətrafındakı rayonların boşaldılmasına nail ola bilməyəcəyini başa düşüb. Ona görə də İrəvanla münasibətlər qurmaq üçün bu məsələni aarxa plana keçirib və ermənilərin “soyqırım” ın dünyada tanınması yönündə fəaliyyətlərini dayandırması müqabilində barışığa hazırdır. F.MƏMMƏDOV musavat