Erməni müxalifəti həlledici döyüşə hazırlaşır Vəfa Quluzadə: “Ermənistanın Rusiyanın təsir dairəsindən çıxarılması bütün region üçün yaxşı olardı” Zəfər Quliyev: “Cənubi Qafqazda güclənən konfrantasiya şəraitində Qərb Ermənistanda təsir imkanlarını daha çox gücləndirməkdə maraqlıdır” Uzun müddətdir Ermənistan cəmiyyətindəki qarşıdurma pik həddinə yaxınlaşmaqdadır. Artıq Ermənistan müxalifəti özünün sözüylə desək sentyabrın 5-də Irəvanda həlledici aksiya keçirməyə hazırlaşır. Verilən məlumatlardan o da hiss olunur ki, ölkədə baş verən proseslərdən Ermənistan hakimiyyəti təlaş içindədir və ən müxtəlif vasitələrlə aksiyanın kütləviliyinin qarşısını almağa çalışır. Bəzi ekspertlərin fikrincə, hazırda dünyanın diqqəti Cənubi Qafqaz regionunda olduğu bir zamanda Ermənistan müxalifətinin cəhdləri hakimiyyət dəyişikliyinə belə səbəb ola bilər. Belə ki, Gürcüstanda baş verən olaylardan sonra Qərb və Rusiya Cənubi Qafqazda nüfuz dairəsini möhkəmləndirmək uğrunda açıq savaşa başlayıb. Və Qərbin növbəti mərhələdə Rusiyanı məhz Ermənistandan sıxışdırıb çıxarmaq niyyətində olduğu bəyan olunur. Politoloq Vəfa Quluzadənin fikrincə, Qərbin hazırda Ermənistan müxalifətinin fəallaşmasından istifadə edərək ölkədəki situasiyanı dəyişməyə və Rusiyayönlü hakimiyyət üçün bir sıra problemlər yaratmağa cəhd göstərəcəyi istisna deyil: “Ermənistanda hazırda həqiqətən də ciddi proseslər getməkdədir. Həqiqətən də baş verənlərə Cənubi Qafqazda hazırda yaranan situasiyanın kontekstindən yanaşmaq lazımdır. Ermənistanın Rusiyanın təsir dairəsindən çıxarılması bütün region üçün yaxşı olardı. Ümumiyyətlə Qərb Ermənistanda Rusiya meylli rejimin dəyişdirilməsinə çoxdan can atır. Türkiyənin Ermənistanla son zamanlar yaxınlaşmağa can atması elə bir başa Qərbin planlarına daxil olan məsələdir. Eyni zamanda Ermənistanda Qərbyönlü hakimiyyətin qurulması regionun gələcəyini təhlükəli etmir. Çünki Rusiya Cənubi Osetiyada olduğu kimi Ermənistandan istifadə edərək Qarabağda problemlər yarada bilər. Elə Qarabağ münaqişəsinin də indiyə qədər həll olunmamış qalması birbaşa Rusiyanın üzündəndir”. Politoloq Zəfər Quliyevin sözlərinə görə, Qərb Ermənistandakı müxalifəti artıq uzun müddətdir ki, dəstəkləyir. Ermənistandakı prezident seçkiləri zamanı da bu dəstəyin açıq şəkildə hiss olunduğunu xatırladan Z.Quliyev bildirdi ki, müxalifətin əsas namizədi Levon Ter-Petrosyanın seçki öncəsi ABŞ-a səfər etməsi və oradakı məsləhətləşmələri Qərbin erməni müxalifətinə münasibətini göstərir: “Ermənistanda seçkidən sonrakı proseslər onu göstərirdi ki, ABŞ bu ölkədə Qərbyönlü müxalifətin mövqelərini gücləndirmək istəyir. Və situasiya imkan verəcəyi təqdirdə Qərbyönümlü qüvvələrin hakimiyyətə gəlməsi, Ermənistanın geosiyasi mahiyyətini də dəyişə bilər. Bu baxımdan Cənubi Qafqazda gedən proseslər və Qərblə Rusiya arasında güclənən konfrantasiya şəraitində aydın məsələdir ki, Qərb Ermənistanda təsir imkanlarını daha çox gücləndirməkdə maraqlıdırlar. Qərb müxalifətə yardımı artırmaqla Ermənistanı tədricən Rusiyadan uzaqlaşdırmağa nail olmaq istəyir”. Z.Quliyevin fikrincə, eyni zamanda onu da vurğulamaq lazımdır ki, indiki mərhələdə Ermənistan hakimiyyəti müxalifətə qarşı daha sərt addımlara keçə bilər. Mart hadisələrinin daha qəddar formada təkrar oluna bilməsinin səbəblərinə gəlincə, Z.Quliyev hesab edir ki, indiki şəraitdə Moskva Ermənistan hakimiyyətinin mövqelərini daha sərt formada gücləndirməyə çalışacaq. Xəyal azadliq