Azərbaycanın idarəçiliyi kürdlərə tapşırılmayacaq

SON XƏBƏRLƏR

Azərbaycanın idarəçiliyi kürdlərə tapşırılmayacaq – Urmiyənin millət vəkili

2021.10.20, 07:36

Gunaz.tv

GünAz TV: Güney Azərbaycanın Urmiyə şəhərinin İran parlamentindəki millət vəkili Nadir Qazipur terror qruplaşmalarının yanlısı olan kürd cərəyanlarının iddialarına qarşı Azərbaycanda idarəçiliyin etnik azlıqlara buraxılmayacağını bildirib.

O bu barədə şəxsi Teleqram kanalında məlumat yayıb.

“Əyalətdə idarəçilik heç vaxt etnik azlıqlara tapşırılmayıb. Bu etniklərin bəzilərinin mövqeyi bizə aydındır”- deyə o qeyd edib.

Nadir Qazipur Qərbi Azərbaycan Əyalətinin 4 kürd millət vəkilinin həddini aşan tələblərinə işarə etmək istəyib.

Ötən həftə 4 kürd millət vəkili İranın Daxili İşlər Nazirliyinə məktub ünvanlayaraq əyalətin idarəçiliyində kürdlərdən daha çox istifadə olunmasını tələb etmişdirlər. Bu kimi cəhdlər İran rejimi tərəfindən Qərbi Azərbaycana Məhəmməd Mehdi Şəhriyari adlı kürd kökənli vali gətirildikdən sonra daha da artıb.

N.Qazipur sözlərinin davamında yazıb:

“Qərbi Azərbaycanda bir sıra etniklərin məskunlaşması və onların sayının artması, əyalətin idarəçiliyini onların ixtiyarına vermək mənasına gəlmir, bu belə də olacaq. Burada söhbət hansısa qərəzdən getmir. Məsələn Tehran əhalisinin ən azı 40 faizi türkdür. Lakin bəzi millət vəkilləri kimi, kimsə ona sahib çıxmır, onun idarəçiliyini ələ keçirməyə çalışmır.

Bir müddət əvvəl bizim əyalətimiz dağılmış Demokrat və Komelə qruplaşmalarının terror fəaliyyəti nəticəsində təhlükəsizliyini itirmişdir. Bu gün həmin qruplaşmaların üzvləri PKK və “Pjak” qruplaşmalarına üzv olub. Onlar hər zaman bizim qeyrətli gənclərimizi şəhid ediblər. O zamanlar düzgün idarəçilik, həmçinin sərdar Kazimi və sərdar Osanlu kimi insanlar olmasaydı əyalət bu bəladan yaxasını qurtara bilməyəcəkdi. Elə indi də bəziləri Kubani adı altında PKK və “Pjak”a dəstək verir və terrora söykənən hədəflərini təmin etməyə çalışırlar.”

N.Qazipur sözlərinin davamında təkidlə qeyd edib ki, “Bəziləri daxili işlər nazirinə Qərbi Azərbaycan Əyalətinin idarəçiliyində 50 faiz kürdlərdən istifadə olunması ilə bağlı sual verir. Bu nifaqın kökü qeyd etdiyim düşüncəyə söykənirsə, o zaman çox təəssüflənmək lazımdır ki, islami sistemdə bəziləri etnik fərqliliyindən bəhrələnmək istəyir.”

Bundan öncə Qərbi Azərbaycanın kürd valisi Məhəmməd Mehdi Şəhriyari kürd terror qruplaşmalarının planlarına uyğun bir şəkildə əyalətdə kürddillilərin yaşadığını qeyd edərək idarəçilikdə onlara daha çox yer verilməsini tələb etmişdir.

Vali həmçinin Urmiyə Texnologiya Universitetində türk dili və ədəbiyyatının iki dərslik şəkilində tədris olunmasına cavab olaraq kürd dilinin rəsmiləşdirilməsini istəmişdir. Həmin zaman N.Qazipur valinin anti-türk mövqeyinə sərt reaksiya vermişdir: “Azərbaycan əhalisi qonaqlara (mühacir kürdlər) ayağını öz yorğanından artıq uzatmağa, Azərbaycanın mədəniyyət işlərinə müdaxilə etməsinə icazə verməyyəcək”- deyə millət vəkili xəbərdarlıq etmişdir.

N.S

GUNAZ.TV

SON XƏBƏRLƏR