Təbrizdə “Tiraxtur” tərəfdarı olan qız, oğlan geyimində Səhənd stadionuna daxil olaraq matçı yaxından izləyə bilib

SON XƏBƏRLƏR

Təbrizdə “Tiraxtur” tərəfdarı olan qız, oğlan geyimində Səhənd stadionuna daxil olaraq matçı yaxından izləyə bilib

2021.10.20, 07:36

Gunaz.tv

GünAzTV: İran rejiminin qadınlara qarşı tətbiq etdiyi bütün qadağa və məhdudiyyətlərə baxmayaraq, martın 13-də Təbrizdə yeniyetmə bir qız, oğlan geyimində Səhənd stadionuna daxil olaraq “Tiraxtur-Əlcəzirə” komandaları arasında keçirilən matçı yaxından izləyə bilib.

Bildirilir ki, stadiondakı polis və təhlükəsizlik qüvvələrinin müxtəlif maneələrindən keçməyi bacaran həmin qız, matçı izlərkən, öz sevincini “Bozqurd” işarəsini göstərməklə büruzə verib.

Xatırladaq ki, həmin gün, “Tiraxtur” və “Əlcəzirə” futbol komandaları arasında keçirilən matçı yaxından izləmək üçün oğlan geyimində Səhənd stadionuna daxil olmağa çalışan 2 azərbaycanlı qız saxlanılmışdı. Hökumət qüvvələri, həmin qızları təhqir edərək, onlara qarşı zorakılıq nümayiş etdirmiş, kobudcasına stadiondan uzaqlaşdırmışdı.

Martın 13-də Asiya Çempionlar Liqasının 4-cü həftəsində keçirilən görüşdə, Təbrizin “Tiraxtur” futbol komandası, Birləşmiş Ərəb Əmirliklərinin “Əlcəzirə” komandası ilə görüşüb. Axşam saat 16-da başlanan matç, 1:1 hesabı ilə başa çatıb.

40 mindən çox “Tiraxtur” tərəfdarının iştirakı ilə keçirilən oyun zamanı milli şüarlar səsləndirilib. İştirakçılar, “Türk dilində mədrəsə, olmalıdır hər kəsə” və “Nə mutlu türküm deyənə” şüarlarını səsləndirərək, Güney Azərbaycan məktəblərində təhsilin ana dilində aparılmasını tələb ediblər.

Qeyd edək ki, İran İslam Respublikasında qadınların stadionlara və idman zallarına girişi qadağndır. Son illər, qadınlar hökumətin onlara qarşı yürütdüyü ayrı-seçkilik siyasətinə etiraz bildirərək bu qadağanın aradan qaldırılmasını tələb edirlər. Həmin qadağanın nəticəsidir ki, bəzi qadınlar bütün təhlükələrə baxmayaraq, vaxtaşırı kişi geyimində stadionlara daxil olmağa çalışır və bunun acı nəticələri ilə üz-üzə qalırlar.

GUNAZ.TV

SON XƏBƏRLƏR