GünAz TV: Tehranda nəşr olunan “Alik” qəzetinin baş redaktoru Derenik Məlikyan İranın daxili məsələləri və bu ölkənin Ermənistan və Azərbaycanla olan əlaqələri barədə erməni saytına danışıb.

Pantürkizmin propaqandası anti-iran təbliğatı sayılır və hökumət problemləri fars manerasına uyğun olaraq sakit və təmkinlə həll edir. Azərbaycan və Türkiyəyə qarşı İran neytral siyasət yürüdür. Bu barədə Tert.am saytına müsahibəsində Tehrandakı “Alik” qəzetinin baş redaktoru Derenik Məlikyan danışıb. Onun sözlərinə görə, İranın erməni genosidi və dağlıq qarabağ məsələsində mövqeyi Ermənistanla eynidir, amma zahirən neytral mövqe sərgiləyir. Çünki əks halda 30 milyonluq türklərin qəzəbinə tuş gələr. Məlikyanın sözlərinə görə, bu siyasət sayəsində İranda separatizm mövcud deyil.

İrandakı son hadisələr, hakimiyyətə qarşı təşkil edilən etirazlar, yerli KİV və xüsusilə də “Alik” qəzetinin siyasəti və iş stillərinin dəyişib-dəyişməməsi haqda sualı cavablandıran Məlikyan onların artıq 87 ildir fəaliyyət göstərdiyini bildirdi.

“Fasiləsiz olaraq 87 ildir işləyirik. İrandakı erməni icmasında “Alik” yeganə qəzetdir. Biz hökumət yox, dövlət qəzetiyik. Çünki hökumət hər an dəyişə bilər. İslam inqilabından sonra keçən 40 il ərzində biz müxtəlif növ hökumətin “dadına baxmışıq”. Sağ, sol, mərkəzi, mühafizəkar, radikal hakimiyyətlərlə çalışmışıq. Bütün mərhələlərdə balanslı şəkildə işləmişik və məqsədimizə də nail olmuşuq” – Məlikyan dedi.

Onun sözlərinə görə, son hadisələrdən sonra çoxluğun səsi ilə seçilən hökumət iqtisadi problemlərlə üzləşdi.

“İşsizlik və yoxsulluq səviyyəsinin artması cəmiyyəti küçələrə çıxmağa məcbur etdi” – deyən baş redaktor əlavə edib ki, heç bir partiya, KİV xalqı yönləndirmədi və hər şey spontan şəkildə baş verdi.

“Yüzlərlə həbs edilən tezliklə azad edildi. Onlardan çoxu tələbə idi. Bir erməni tələbə də həbs edilmişdi. Amma erməni olduğuna görə onu tezliklə - 10 gün ərzində azad etdilər. Ona qarşı heç bir ayrı-seçkilik edilməmişdi” – deyən Derenik Məlikyan vurğulayıb ki, xoşbəxtlikdən hakimiyyət etirazçıların tələblərini təmin etmək istədiklərini bildirdilər. Bunun nəticəsində də İran yeni ili ərəfəsində ərzaqların qiymətlərinin artmasının qarşısı alındı.

O həmçinin qeyd etdi ki, bu addımlarla hökumət daxili siyasətdəki narahatlığı da azaltmış oldular.

İranda yaşayan ermənilərdə də eyni problemlərin olub-olmaması və niyə onların etirazlarda zəif iştirak etməsi haqda suala cavab verən Derenik Məlikyan iqtisadi problemlərin erməni icmasına da birbaşa təsir etdiyini dedi.

“Bu, bütün ölkənin problemidir. Ümumxalq narazılığıdır. Biz də etirazımızı bildirmişik. Öz fikrimizi parlamentdəki erməni deputatlar və “Alik” qəzeti vasitəsilə çatdırmağa çalışmışıq. 6 ildir ki, “Alik” qəzetinin fars dilində mobil tətbiqi var və bu, öz fikrimizi yerli hakimiyyətə çatdırmaqda bizə xeyli kömək edir” – deyə o bildirdi.

Redaktorun sözlərinə görə, iqtisadi problemlərə görə ermənilər İrandan gedirlər.

“Gənc insanların gələcək üçün heç bir perspektivi yoxdur. Əsasən onlar Avstraliyadan Amerikaya gedirlər. Minlərlə erməni yalnız qazanc üçün deyil, həm də miqrant kimi gedirlər. Amma Donald Trampın son siyasəti nəticəsində, hazırda onlar heç yerə gedə bilmirlər. Çoxları viza almaq üçün gözləyirlər. Amma bu o demək deyil ki, getmək istəyən yoxdur” – o qeyd etdi. Məlikyan əlavə etdi ki, bir çox gündəlik problemlərə görə də gənc ermənilər İranda qalmaq istəmirlər.

Onun sözlərinə görə, onlar hicaba və digər dini problemlərə ehtiyatla yanaşırlar.

“Xarici aləmlə əlaqə quran İrandakı gənc ermənilər görürlər ki, məsələn. onların Amerikadakı həmyaşıdları daha azaddırlar və qadağasız həyat yaşayırlar. Buna görə də onlar getmək istəyirlər. Bütün hallarda bizim icmamız yaşayışa uyğundur. Bizim erməni məktəblərimiz, mədəniyyət ocaqlarımız və sairə var” – D. Məlikyan deyib.

N.S