GünAz TV: Urmiyənin İran parlamentindəki millət vəkili Nadir Qazipur prezident Həsən Ruhaninin etniklər və dini azlıqların işi üzrə özəl köməkçisi Əli Yunisinin antitürk açılqlamalarına reaksiya verərək vurğulayıb ki, “biz türklər icazə verməyəcəyik ki, yerindən duran hər kəs əleyhimizə danışsın.”

Millət vəkili aprelin 23-də “Anac” xəbər agentliyinə verdiyi müsahibədə Ə.Yunisinin açıqlamasını qövmlər arasında uçurum yaradan sözlər kimi qiymətləndirib.

“Əgər ölkənin rəhbəri uşaqlarınıza türk dili öyrədin deyirsə, o zaman Yunisi bu sözləri dilinə gətirməkdə çox böyük səhv edib. İran əhalisinin təxminən 50 faizi türkdür. Elə bir əyalət yoxdur ki, orada azərbaycanlı yaşamasın. Əli Yunisi yanlış elmi girişimə yol verib. Azərbaycanlılar artıq kimsənin təhqirə keçməsinə icazə verməyəcək. Ölkə prezidentindən də istəyirik ki, köməkçisinin pərdə arxasındakı mövqeyini başa düşsün”- deyə o sözlərinin bir hissəsində qeyd edib.

Deputat təxminən 50 azərbaycanlı millət vəkilinin Həsən Ruhaniyə ünvanladığı xəbərdarlıq məktubuna da işarə edib: “Ümid edirəm ki, problem daha da dərinləşmədən prezidentin köməkçisi bu xəbərdarlığı ciddiyə alacaq və cənab Ruhani də ona qarşı tədbir görəcək.”

N.Qazipur məsulların “Qanun” qəzetinə qarşı heç bir tədbir almadıqlarını tənqid edərək qəzetin türklərə qarşı mövqeyi ilə bağlı İrşad və Mədəniyyət nazirinə sual ünvanladığını deyib.

Qeyd edək ki, ƏIi Xamenei uşaqlara türk dili öyrətməklə bağlı heç bir hökm çıxarmayıb. O bir ailə ilə görüşdə ailənin anasına məqsədyönlü şəkildə bildirmişdir ki, evdə türkcə söhbət eləyin. Bu söz o halda deyilib ki, İranda milyonlarla türk uşağı ana dilində təhsil almaq hüququndan məhrumdur. Ola bilsin ki, millət vəkili Xameneinin bu sözünə işarə etmək istəyib.

Əli Yunisi ötən şənbə günü “Qanun” qəzetinə verdiyi müsahibədə Azərbaycan türklərinin milli kimliyini inkar etmişdir.

O “Qövmçülük və fitnənin qarşısı alınmalıdır” başlığı ilə yayılan müsahibədə olduqca əsassız fikirlər səsləndirib. “Türk ilə azəri arasında fərq qoyulmalıdır. Azərilər farslarla dildaş və soydaşdır. Onlar hətta bir çox bölgənin əhalisindən daha çox farsdır.

Azərilər kürdlərin əkiz qardaşıdır. Bu ikisi də madd (midiya) qövmüdür, onlar Əhəmənilərdən əvvəl bu torpaqları alıblar. Onların arasında qarşıdurma olub, lakin eyni ailədən olublar.

Azərbaycanda təxminən 300-400 ildir ki, türk dilində danışılır. Keçmişdə onların hamısı talışlar kimi söhbət ediblər”- deyə o verdiyi müsahibədə bildirib.

Bu məsələ bütün azərbaycanlılar, o cümlədən bir sıra türk millət vəkillərinin etirazına səbəb olub. Məsələ ilə bağlı türk bölgələrinin 46 millət vəkili aprelin 22-də İran prezidenti Həsən Ruhaniyə məktub ünvanlayaraq köməkçisinin səsləndirdiyi əsassız və bayağı sözlərinə reaksiya verməsini tələb ediblər.

Sözügedən “Qanun” qəzeti vaxtaşırı Azərbaycan türk millətinə qarşı əsassız məlumatlar yayır. Ötən günlərdə Ərdəbilin İran parlamentindəki millət vəkili Südeyif Bədri parlamentdə ana dilinin tədris ilə bağlı imza toplandığını açıqladıqdan sonra “Qanun” qəzeti aprelin 18-də ana dilinə qarşı məqalə dərc etmişdir.

Bu barədə qəzetdə “Qövmlərin uçurumu təlimi” başlığı ilə yayılan məqalədə İranda ana dilinin tədris olunması ölkə təhlükəsizliyinin əleyhinə olan amil kimi xarakterizə edilib, onun konstitusiyanın 15-ci maddəsinə uyğun gəlmədiyi də qeyd olunub.

N.S