“Amnesty International” İran rəsmilərindən Şahnaz Əkməliyə qarşı çıxarılmış həbs hökmünü dərhal ləğv etməyi tələb edib- FOTO

SON XƏBƏRLƏR

“Amnesty International” İran rəsmilərindən Şahnaz Əkməliyə qarşı çıxarılmış həbs hökmünü dərhal ləğv etməyi tələb edib- FOTO

2021.10.20, 07:36

Gunaz.tv

GünAz TV: Beynəlxalq Əfv Təşkilatı- “Amnesty International” İran rəsmilərindən insan haqları fəalı Şahnaz Əkməliyə qarşı çıxarılmış 1 il həbs hökmünü dərhal ləğv etməyi tələb edib.

Təşkilatın Twitter səhifəsində dərc edilən yazıda qeyd edilir ki, əgər 2009-cu il Aşura hadisələrində öldürülən Mustafa Kərimbiginin anası Şahnaz Əkməliyə qarşı çıxarılmış 1 il həbs hökmü qüvvəyə minsə, o, insan haqlarını qorumaq uğrunda göstərdiyi fəaliyyətlərə görə həbs edilmiş əqidə məhbusu hesab ediləcək.

Yazıda həmçinin xanım Əkməlinin barəsində İranda 2009-cu il prezident seçkilərinin nəticələrinin saxtalaşdırılmasına etiraz edərkən öldürülənlərin ailələrini müdafiə etdiyi, eləcə də oğlunun qətlə yetirilməsinə görə ədalət tələb etdiyi üçün “dövlət əleyhinə çalışma” ittihamı ilə bir il həbs cəzasının çıxarıldığı vurğulanır.

Xatırladaq ki, Şahnaz Əkməliyə qarşı ötən on ildə oğlunu öldürən hüquq mühafizə orqanlarının işçilərinin tapılaraq cəzalandırılması üçün çalışdığına görə, bir neçə gün öncə “dövlət əleyhinə təbliğat və fəaliyyət” ittihamı ilə 1 il həbs hökmü, ölkədə çıxma, siyasi və sosial şəbəkələrdə fəaliyyət qadağaları çıxarılmışdı. Keçirilmiş apelyasiya məhkəməsi də hökmləri olduğu kimi qüvvədə saxlamışdı.

Onun oğlu Mustafa Kərimbigi 2009-cu ildə prezident seçkilərinin saxtalaşdırılmasına qarşı keçirilən xalq etirazları zamanı, Aşura günündə baş nahiyəsindən güllə yarası alaraq ölmüşdü.

Yayılan xəbərlərə əsasən, o zaman təhlükəsizlik qüvvələri onun cəsədini ailəsinə təhvil vermək üçün bir neçə şərt irəli sürmüşdü. Həmin şərtlərə görə, dəfn mərasimi Tehrandan və mərhumun yaşadığı bölgədən uzaqda keçirilməli, anası, atası və bacısından başqa heç kim dəfndə iştirak etməməli idi. Mustafa Kərimbiginin nəşi uzun müddətdən sonra Şəhriyar qəbirsanlığında torpağa tapşırılmışdı.

Ə.A

GUNAZ.TV

SON XƏBƏRLƏR