Müəllimlərin 15 həmkarlar ittifaqı İbrahim Rəisidən məhkumları azadlığa buraxmağı tələb edib

SON XƏBƏRLƏR

Müəllimlərin 15 həmkarlar ittifaqı İbrahim Rəisidən məhkumları azadlığa buraxmağı tələb edib

2021.10.20, 07:36

Gunaz.tv

GünAz TV: Şərqi Azərbaycan əyaləti, İslamşəhr, İsfahan, Əligudərz, Buşehr, Tehran, Şəhrza, Qəzvin, Kürdüstan, Kirmanşah, Gilan, Mazandaran, Həmədan və Yəzddə fəaliyyət göstərən müəllimlərin həmkarlar ittifaqları Məhkəmə Sisteminin rəhbəri İbrahim Rəisiyə məktub ünvanlayıblar.

Onlar koronavirus səbəbindən dünyanın bir neçə ölkəsində məhkumların həyat və sağlamlıqlarının qorunması üçün müvəqqəti azadlığa buraxıldığını bildiriblər. Müəllimlər qeyd ediblər ki, İranda da bir müddət əvvəl oxşar formada addımlar atıldı, lakin bu, kifayət deyil.

Məktubda qeyd edilir ki, müəllimlər, insan haqları fəalları, siyasi və vicdan məhbusları, yazıçılar, fəhlələr və digər bu kimi cəmiyyətin müxtəlif kateqoriyalarından olan məhkumlar koronavirusun tüğyan etdiyi bir zamanda və canlarının təhlükə qarşısında olmasına baxmayaraq, hələ də həbsxanalarda saxlanılırlar. Bu isə nəinki onların özlərinin, eləcə də ailə üzvlərinin böyük narahatlığına səbəb olur.

Onlar müəllim məhkum Məhəmməd Həbibini misal çəkərək, onun ağ ciyər xəstəliyindən əziyyət çəkməsinə və səhhətində olan digər problemlərə rəğmən, həbsxanada qalmasını həyat və sağlamlığı üçün böyük təhlükə adlandırıblar.

"Məhəmməd Həbibi kimi sağlamlıq vəziyyəti qaydasında olmayan və cəmiyyət arasına yenidən qayıtması heç bir təhlükəyə səbəb olmayan siyasi və ya adi məhbusların azad edilməməsi, ya ən azından müvəqqəti olaraq məzuniyyətə buraxılmaması gözlənilməz acı hadisələrə səbəb ola bilər", - deyə məktubda vurğulanır.

Onlar İbrahim Rəisini bütün bu hallara diqqət yetirməyə və qeyd edilmiş kateqoriyadan olan məhkumları müvəqqəti olsa belə, koronavirus təhlükəsi sovuşana qədər azadlığa buraxmağa çağırıblar.

Həmkarlar İttifaqlarının üzvləri qeyd ediblər ki, bu xüsusda yol veriləcək ən adi səhlənkarlıq və etinasızlıq ən təməl insan hüququ olan yaşama haqqını təhlükə qarşısında qoyacaq.

Məktubun sonunda ictimai rəyin hökumətin, xüsusilə də Məhkəmə Sisteminin bütün vətəndaşların, əsas etibarilə isə məhkumların həyat və sağlamlığı qarşısında lazımi səviyyədə məsuliyyət hissi duyduğuna inamının azaldığı vurğulanır.

Xatırladaq ki, ötən həftə Birləşmiş Millətlər Təşkilatının insan haqları müvəkkili koronavirusun yayıldığı dönəmdə İranda məhkumların həyatlarına görə narahatlıq keçirdiyini bildirmişdi.

Eləcə də, son günlər ərzində İranın bir neçə həbsxanasında məhbuslar mövcud vəziyyətdə müvəqqəti azadlığa buraxılmaları tələbi ilə qiyamlar təşkil ediblər. Həmin hadisələr zamanı təhlükəsizlik qüvvələrinin onlarla məhkumu güllələyərək öldürdüyü deyilir.

Ə.A