GünAzTv: Amerika Dövlət Departamentinin saytında “Azərbaycanda seçkilər” adı ilə yerləşdirilmiş mətndə deyilir ki, Azərbaycanda dinc keçən parlament seçkilərində bütün partiyalar və müxtəlif yerlərdən müşahidəçilər iştirak ediblər.

Daha sonra deyilir: “biz ATƏT-in Demokratik Təsisatlar və İnsan Haqları Bürosunun ilkin hesabatında belə bir müddəanı dəstəkləyirik ki, ümumilikdə seçkilərin keçirilməsi onların mənalı tərəqqidən xəbər verdiyi nəticəsinə gəlmək imkanı vermir”.

Bu da qeyd olunur ki, bəzi texniki tərəqqiyə baxmayaraq, seçkilər beynəlxalq standartlara cavab verməyib.

Mətndə Azərbaycan hökumətinə seçkidə buraxılmış qüsurlara bir də baxmaq, şikayətləri ədalətlə araşdırmaq tövsiyə olunur.

Sənəddə deyilir ki, “Biz ATƏT-in və DTİH-in belə bir rəyini bölüşürük ki, seçkiqabağı mühit namizədlərin mətbuatda təbliğatı üçün media işıqlandırmasının balanssızlığı ilə xarakterizə olunub, sərbəst toplaşma, ifadə azadlığı kimi təməl haqların davamlı məhdudlaşdırılması yer alıb, namizədlərin qeydə alınması prosesi qüsurlu olub, bütün bunlar birlikdə götürüldükdə namizədlər üçün nahəmvar meydan yaradıb.

Sənəddə deyilir ki, ABŞ-ın Bakıdakı səfirliyindən olan müşahidəçilər bülletenlərin qutulara qalaqla doldurulması da daxil olmaqla kobud pozuntuları qeydə alıblar.Bəyanatda deyilir ki, Azərbaycan hökuməti seçkilərin gedişinə müdaxilə etmiş rəsmiləri cəzalandırmalıdır.

“Biz Azərbaycan hökumətini ifadə, toplaşma və təşkilatlanma azadlığına hörmətə çağırııq”, - deyilir sənəddə.

Bundan bir gün əvvəl Avropa qurumlarının müşahidəçiləri də bənzər nəticəyə gəlmişdilər.

Azərbaycanda seçkilər, müxalifətin iştirakına baxmayaraq, demokratik inkişafda əhəmiyyətli irəliləyişə nail olmayıb - bu barədə Avropada Təhlükəsizlik və Əməkdaşlıq Təşkilatının Azərbaycanda noyabrın 7-də keçirilən parlament seçkilərinə dair rəyini əks etdirən pres-relizdə deyilir.

"Azərbaycanda parlament seçkiləri sülh atmosferində keçib və siyasi prosesdə bütün müxalifət partiyaları iştirak edib. Ancaq bu seçkilərin keçirilməsi ümumilikdə ölkənin demoktratik inkişafında əhəmiyyətli proqres üçün yetərli olmayıb" - deyilir ATƏT-in məlumatında və bildirilir ki, bu barədə beynəlxalq müşahidəçilərin rəyində qeydlər öz yerini alıb.

Müşahidəçilər qeyd ediblər ki, Mərkəzi Seçki Komissiyası seçki prosesinin texniki aspektlərini ümumilikdə yaxşı idarə edib. "Ancaq media azadlıqlarının və sərbəst toplaşma azadlığının məhdudlaşdırılması müxalifəti zəiflədib və siyasi diskursun canlı olmasını mümkünsüz edib" - deyilir pres relizdə.

Sənəddə deyilir ki, bunlar və məhdud rəqabət mühiti namizədlərə qeyri-bərabər oyun meydanı verib və bu da, seçicilərin məlumatlanaraq seçim etməsini çətinləşdirib.

Müsbət baxımdan isə, deyir ATƏT, seçicilərin mərkəzləşdirilmiş seçici qeydiyyatını yoxlamaq və düzəliş istəmək imkanı vardı.

ATƏT missiyasının başçısı Wolfgang Grossruck deyib: "Öz demokratik institutlarını, xüsusilə də çətin bir mühitdə, inkişaf etdirən ölkədə ədalət yaratmaq heç zaman asan məsələ deyil. Biz irəliləyiş əldə etmək üçün bir çox səylərin edildiyini və ölkənin uğurlar qazandığını görmüşük. Biz bütün bunları və söhbət etdiyimiz insanların nümayiş etdirdiyi qonaqpərvərliyi alqışlayırıq. Ancaq bütün göstərilən səylərə baxmayraq, ölkənin həqiqi plüralist demokratiyanın inkişafı üçün edəcəyi çox iş var". BBC