GünAzTv: 2009-cu ilin yayında Rusiya Gürcüstana hərbi müdaxilə edəndən sonra Tehran Tbilisiyə  (Tiflis)  Moskvanın gözü ilə baxırdı. Hətta o zaman İran hakimiyyəti Rusiyanın işğal etdiyi Abxaziya və Cənubi Osetiyanın müstəqiliyini də tanımağa hazırlaşırdı.

Çünki həmin olaylar zamanı Tehran rəsmi şəkildə Gürcüstan hakimiyyətinin «günahkar» sayaraq, gürcüləri Abxaziya və Cənubi Osetiyaya «təcavüz»də qınadı.

Atom-nüvə proqramı ilə bağlı məsələdə Kreml İran hakimiyyətinin arxasından bir az aralanan kimi (əsasən Birləşmiş Millətlər Təşkilatı Təhlükəsizlik Şurasının sonuncu, 4-cü qətnaməsindən sonra) Tehran Moskvaya yönəli siyasətində müəyyən korrektələr etməyə başladı. Bu özünü İranın Gürcüstana siyasətində göstərməkdədir.

Yeri gəlmişkən ötən həftə Gürcüstanda səfərdə olan İranın xarici işlər naziri Mənuçehr Müttəkinin iştirakı ilə Acarıstan Muxtar Respublikasının paytaxtı Batumi şəhərində İranın baş konsulluğunun açılışı olub.

Baş konsulluq binasının açılışında Mənuçehr Müttəki ilə yanaşı, İranın Gürcüstandakı səfiri Məcid Səmədzadə -Sabiri, Gürcüstan xarici işlər nazirinin müavini Aleksandr Nalbandov, Acarıstan Muxtar Respublikasının rəhbəri Levan Varşalomidze də iştirak ediblər.

M. Sabir jurnalistlərə açıqlamasında Batumidə İran baş konsulluğunun fəaliyyətə başlamasını yüksək qiymətləndirdiyini vurğulayıb: “Baş konsulluğun fəaliyyətə başlaması Tehranla Tbilisi arasındakı münasibətlərin hərtərəfli inkişafı üçün yardım göstərəcək”.

Bundan başqa Gürcüstanla İran arasında vizasız gediş-gəliş rejiminin tətbiq olunması haqda saziş imzalanıb.

Sazişi Tbilisidə rəsmi səfərdə olan İranın xarici işlər naziri M. Müttəki ilə Gürcüstanın xarici işlər naziri Qriqol Vaşadze imzalayıblar.

Elə bu təntənələrdən sonra Tiflisdə 150 qram zənginləşdirilmiş uranı 1,5 milyon dollara satmaq istəyən Ermənistan vətəndaşları tutulub.

Lent.az-ın “Rustavi-2” telekanalına istinadən verdiyi məlumata görə, bu barədə Gürcüstan Daxili İşlər Nazirliyi məlumat yayıb.

Siqaret qutularında gizlədilən uran Gürcüstana taksi ilə gətirilib. Daha sonra bu yük Tbilisi dəmir yol vağzalına aparılıb və burada yük saxlama kamerasının bir bölməsində yerləşdirilib.

Baş vermiş bu olayla bağlı ehtimallarda yox deyil. Ehtimal olunur ki, Tehran hakimiyyəti atom nüvə texnologiyası ilə bağlı  məsələdə əvvəllər də ermənilərdən yararlanıb. Ancaq Rusiyaya zərbə vurmaq üçün bu dəfə «tədarükçünü» gürcülərə təhvil verməklə Tbilisi ilə münasibətdə səmimi olduğunu sübut etməyə çalışır. Yaxud İran hakimiyyəti bu sahədə Gürcüstanın uyğun qurumları ilə əməkdaşlıq edərək, beynəlxalq ictimaiyyətə «uran qaçaqmalçıları» ilə «işləmədiyin» nümayiş etdirməyə cəhd göstərir.

Xatırladaq ki, Beynəlxalq ictimaiyyəti narahat edən başlıca məsələlərdən biri atom silahının terrorçu qrupların əlinə keçməsidir. Bir neçə ay öncə ABŞ-ın müdafiə naziri Robert Geyts ölkə telekanalarına müsahibəsində bildirmişdi ki,  onlar İranın atom silahı əldə edə bilməyəcyi qənaətindədirlər: «Biz belə hesab edir ki, onlar hələ nüvə silahı əldə etməyə qadir deyillər». 

Dövlət katibi Hillari Klinton onu söylədkilərini təsdiqləyərək, İslam Respublikasının atom silahı əldə etməməsi Vaşinqtonun əsas hədəfi olduğunu söyləmişdi : «Soyuq savaşdan» qalma nüvə müharibəsi təhlükəsi artıq azalıb. Ancaq nüvə terrorçuluğu təlükəsi qalmaqdadır».

Bu sayaq rahatsızlıq əsassız  deyil. Son zamanlar uran qaçaqmalçılığına dair xəbərlər yayılmaqdadır.

O, ərəfədə İngiltərədə çıxan «Qardian» qəzeti bildirmişdi ki, Gürcüstanın təhlükəsizlik qüvvələri yüksək səviyyədə zənginləşdirilmiş uranın «qara bazarda» satılmasının qarşısını alıb.

Qurum təmsilçisinin sözlərinə görə, hələ bu ilin martında 70 faiz zənginləşdirilmiş uranı satmaq istğəyənlə təmasa giriblər. Müsadirə olunmuş uranın laborator analizi yaxın ünlərdə başa çatacaq, bununla belə mütəxəssislər hesab edir ki, ondan bəsit nüvə silahı hazırlamaq mümkündür.

Qəzetin yazdığına əsasən, Gürcüstan təhlükəsizlik orqanları qaçaqmalçıların əlində olan  uranının çox cüzi hissəsini müsadirə edib, nüvə texnologiyasında istifadə olunan materialların böyük hissəsi hələ də belə cinayət qurplardadır. Uranın mənşəyi və qaçaqmalçıların adları hələ açıqlanmır. «Gürcüstan Daxili İşlər Nazirliyi bildirib ki, son on ildənüvə silahı üçün uranın satışı 8-ci cəhddir»-deyə, «Qardian» yazıb.

Atom Enerjisi üzrə Beynəlxalq Agentliyin baş direktoru Yukio Amano Bi-Bi-Si-yə müsahibəsində bəyan etmişdi : «Nüvə və radioaktiv materialları yetərincə qorunmur. Orta hesabla hər iki gündən bir biz nüvə materiallarının oğurlanması və ya qaçaqmalçılığı ilə bağlı məlumat alırıq».

Ameikanın terrorçuluğa qarşı mübarizədə tanınan mütəxəssisi Con Brennan xəbərdarlıq edərək, bildirib ki, nüvə silahı əldə etmək üçün «əl-Qaidə» 15 ildən artıq müddətdə cəhd göstərir : «Son 8-9 il ərzində onların bu istqamətdə çeşidli materiallar almağa cəhd etdikləri haqda məlumatlar olub. «əl -Qaidə» bir neçə dəfə belə sövdələşmədə iştirak edib və onları dəfələrlə aldadıblar» .

Hazırda dünyada silah istehsalında istifadə oluna  bilcək 1600 ton zənginləşdirilmiş uran var. Bundan başşqa 500 ton atom silahının əsas tərkibi sayılan plutonium mövcuddur. Bu qədər materialla  isə 120 min nüvə başlığı hazırlamaq olar. Sədrəddin Soltan