GünAzTv: Azərbaycanda Mərkəzi Seçki Komissiyası parlament seçkilərinin ilkin nəticələrini açıqlayıb.

Xarici xəbər agentliklərindən yayılan məlumatlarda hakim Yeni Azərbaycan Partiyasının 125 seçki dairəsinin ən azı 74-də qələbə qazandığı bildirlir’

Həmçinin xəbər verilir ki, bir sıra müşahidəçilərin ölkə tarixində ən durğun adlandırdıqları bu seçkidə seçicilərin 50 faizdən bir qədər çoxu iştirak edib.

Bu faktın özünü şübhə altına alanlar seçici sayının "karusel" kimi tanınan seçki pozuntusu vasitəsilə əldə olunduğunu deyirlər.

GünAzTv mətbuat mərkəzinin BBC-yə istinadən yaydığı məlumata görə, Müxalifət seçkilərdə kütləvi qanunsuzluqlara, seçicilərin təhdidinə, müstəqil müşahidəçilərə təzyiq göstərildiyinə dair faktlara malik olduğunu bildirir.

Hakim Yeni Azərbaycan Partiyasının rəsmiləri isə bu tənqidləri rədd edərək bütün namizədlərə bərabər şərait yaradıldığını bildiriblər.

Yeni Azərbaycan Partiyasının icraçı katibi Əli Əhmədov seçidən az sonra keçirdiyi mətbuat konfransında deyib ki, “bu seçkilər həm demokratiyanın, həm də seçki praktikasının inkişafında əhəmiyyətli mərhələ hesab oluna bilər”.

YAP rəsmisi qeyd edib ki, 23 siyasi partiyanın iştirakı seçkiyə olan siyasi marağın ifadəsidir və eyni zamanda partiyalar səviyyəsində marağı ifadə edir. Seçkiləri müşahidə edən Avropa qurumları hələlik mövqelərini açıqlamayıblar.

Avropa Şurası Parlament Assambleyasının müşahidə missiyasının rəhbəri Pol Vil isə müxalifəti məyus edəcək açıqlama verib.

O deyib ki, "biz seçkilərdə hakim yox, müşahidəçiyik. Texniki baxımdan MSK-nın təşkil etdiyi seçkilər beynəlxalq standardlara cavab verir."

O əlavə edib ki, əsas problemlər namizədlərin qeydə alınması zamanı baş verib.

Cənab Vil müxalifətin konkret proqrama malik olmadığını da söyləyib.

Xatırladırıq ki, seçki ərəfəsində Azərbaycanın ana müxalifəti AŞPA-nın müşahidə missiyasının görüş təklifini rədd etmişdi.

AŞPA ilə tam ziddiyətli şəkildə ATƏT-in Demokratik Təsisatlar və İnsan Haqları təşkilatı seçki öncəsi iki aralıq məruzəsində ölkədə ədalətli seçkilər üçün normal şərait yaradılmadığını bildirmişdi.

Yerli qeyri-hökumət təşkilatı ELS-in keçirdiyi exit-poll da hakimiyyət partiyasının qələbə çaldığını göstərib.

Müstəqil müşahidəçilər exit-polların nəticələrinə birmənalı baxmırlar.

Bəzi müşahidəçilər bildirirlər ki, biznesin müstəqil olmadığı bir ölkədə biznesin maliyyələşdirdiyi exit-pollar o qədər də etibarlı görünmür.

Bununla belə, müşahidəçilər seçici fəallığının son dərəcə aşağı olduğunu vurğulayırlar.

Bəzi məlumatlara görə yeni parlamentdə hakimiyyətin "radikal müxalifət" adlandırdığı partiyalar ümumiyyətlə təmsil olunmaya bilərlər.

Müxalifət qəzetləri onların müşahidəçilərinə monitorinq imkanı verilmədiyini, hətta iki ana müxalifət partiyasının liderləri Əli Kərimli və İsa Qənbərin nümayəndələrinin tutulub saxlandığını bildiriblər.

Lakin YAP vəzifəlisi Əli Əhmədov deyib ki, YAP müşahidəçilərinin müşahidələri və verdikləri məlumatlarda bəzi müxalifət namizədləri tərəfindən qanun pozuntularına yol verilməsi cəhdləri görünür.

YAP icra katibi beynəlxalq mətbuatı da ciddi tənqid edərək bildirib ki, çox vaxt xarici media səhifəsində Azərbaycandakı seçki prosesi obyektiv işıqlandırılmır. Müxalifəti təmsil edən “AXCP-Müsavat” bloku isə seçkilərin nəticələri ilə bağlı noyabrın 8-də mətbuat konfransı keçirəcək.

Elə həmin gün ATƏT, Avropa Şurası və MDB müşahidə missiyasının da seçkilərin gedişinə dair hesabatı açıqlanacaq.

Noyabrın 8-də ABŞ Dövlət departamentinin də Azərbaycanda parlament seçkiləri ilə bağlı qiymətləndirməsinin işıq üzü görəcəyi gözlənilir.

Bunu ABŞ Azərbaycandakı səfirliyinin nümayəndəsi Adam Sterlinq bildirib.