GünAzTv: Bu gündən 7 noyabr parlament seçkiləri ilə bağlı təbliğat-təşviqat kampaniyası yekunlaşdı. Sabah seçicilər seçki məntəqələrinə gedərək növbəti 5 ildə onları parlamentdə təmsil etmək iddiasında olan namizədlərdən birinə səs verəcəklər.  Mərkəzi Seçki Komissiyasının “Seçkilər” İnformasiya Mərkəzinin məlumatına görə, qeydə alınmış 738 namizəddən 53-ü artıq seçki yarışından geri çəkilib və mübarizəni 685 nəfər davam etdirir. Bu, 125 nəfərlik parlamentdə bir mandata 5,5 iddiaçı deməkdir. Namizədlərin 633-ü ali, 36-sı isə orta ixtisas, 15-i orta, 1-i natamam ali təhsillidir. 30 yaşadək 50, 31-40 yaş arası 108, 41-50 yaş arası 226, 51-60 yaş arası 229, yaşı 60-dan yuxarı olan 72 namizəd deputat olmaq istəyir.  Ən gənc namizəd 25 yaşlı Əfqan Binyətovdur. “Kapitalbank”ın Yardımlı filialında xəzinədar işləyən Əfqan Binyətov namizədliyini 72 saylı Yardımlı-Masallı seçki dairəsindən özü irəli sürüb. Ən yaşlı namizəd olan deputat Cəlal Əliyevin 82 yaşı var. O, hakim Yeni Azərbaycan Partiyasının namizədi kimi 62 saylı Saatlı seçki dairəsində mübarizə aparır. Namizədlərin siyasi mənsubiyyətinə gəlincə, Azərbaycanda 52 siyasi partiya dövlət qeydiyyatından keçsə də, 5 siyasi partiyalar bloku və 22 partiya seçkidə iştirak edir. Yeni Azərbaycan Partiyası 113, Klassik Xalq Cəbhəsi Partiyası 30, AMİP 23, Demokratik Azərbaycan Dünyası Partiyası 20, Ana Vətən Partiyası 7, Müasir Müsavat Partiyası 7, Azərbaycan Milli Demokrat Partiyası 2, Azərbaycan Sosial Demokrat Partiyası 2, Azərbaycan Milli Dövlətçilik Partiyası 1, Azərbaycan Tərəqqi Partiyası 1 namizədlə seçkilərdə iştirak edir. Ümumiyyətlə isə “AXCP–Müsavat” blokundan 35, “Qarabağ” blokundan 32, “İslahat” blokundan 31, “İnsan naminə” blokundan 19, “Demokratiya” blokundan 17 namizəd qeydə alınıb. Namizədlər kifayət qədər fəal təbliğat-təşviqat kampaniyası keçiriblər. Qeyd etmək lazımdır ki, yayda Seçki Məcəlləsinə edilən dəyişikliyə əsasən, bu ildən Azərbaycanda seçkiqabağı təbliğat-təşviqat kampaniyasının müddəti azaldılıb. Namizədlər cəmi 24 gün təbliğatla məşğul olublar. Bu baxımdan, deputatlığa namizədlərin KİV-də təbliğatı 2005-ci illə müqayisədə azalıb. Amma İctimai Televiziyada namizədlərə 4 dəqiqəlik pulsuz efir vaxtı ayrılıbdır. Builki seçkilərdə namizədlər ödənişli efir vaxtından da istifadə etməkdə maraqlı olmayıblar. Buna səbəb televiziyaların bəzilərinin ümumiyyətlə bu xidməti göstərməkdən imtina etməsi və iştirak edənlərin də elan etdikləri qiymətlərin həddən artıq baha olması olub. Bu səbəbdəndir ki, qeydə alınan namizədlərdən cəmi bir neçəsi ödənişli efir vaxtından istifadə edib. Namizədlərin səviyyəsinə baxdıqda hakimiyyət namizədləri müxalif namizədləri üstələyib. Digər tərəfdən, bu seçkilər Azərbaycan müxalifətinin siyasi mübarizə aparmaq qabiliyyəti olan nümayəndələrinin sayının xeyli az olduğunu da göstərib. Müxalifətin namizədləri seçki kampaniyasının gedişində özlərini müsbət tərəfdən göstərə bilməyiblər.  Seçki günü «ELS» Müstəqil Araşdırmalar Mərkəzi tərəfindən «exit-poll»  keçiriləcəkdir. Seçkilərin müşahidəsini isə Azərbaycanda Vətəndaş Cəmiyyətinin İnkişafına Yardım Assosiasiyası həyata keçirəcəkdir. Bir neçə nüfuzlu QHT-nin birləşdiyi «Parlament-2010» koalisiyası seçkilərin monitorinqini aparır. Hakimiyyət seçkilərin demokratikliyinin təmin edilməsi üçün bütün addımları atıb. Məntəqələrdə yenə də şəffaf seçki qutularından istifadə ediləcək. Bu il 500 seçki məntəqəsində veb-kameralar quraşdırılıb. Bu o deməkdir ki, ölkədəki seçki məntəqələrinin 10 faizində seçkilərin gedişini onlyan rejimdə müşahidə etmək imkanı olacaqdır.   Seçkilərə həm yerli, həm də beynəlxalq səviyyədə böyük maraq var. MSK-nın məlumatına görə, 48000 müşahidəçi izləyəcək. Noyabrın 3-ə olan məlumata görə, 125 dairə üzrə seçkiləri müşahidə etmək üçün MSK-da 3406 nəfərdən artıq müşahidəçi qeydiyyatdan keçib. Dairələr üzrə seçkiləri müşahidə etmək üçün isə 32390 nəfər müşahidəçi qeydə alınıb. Yəni müşahidəçilərin ümumi sayı 48000 nəfərdən artıqdır. Prosesi izləyəcək beynəlxalq müşahidəçilərin sayı isə  1009 nəfərdir. Seçkiləri 48 ölkədən müşahidəçi izləyəcək. 11 xarici KİV nümayəndəsi isə seçkiləri işıqlandırmaq üçün MSK-da qeydiyyatdan keçib. Onu da qeyd edək ki, yerli KİV-ə qeydiyyatla bağlı problem olmayacaq. Onlar istədikləri məntəqədə müşahidə apara biləcək.