GünAzTv: İranın xarici işlər naziri Mönuçehr Mottəki mətbuata verdiyi açıqlamasında bildirib ki, təmsil olunduğu dövlət Azərbaycan-Ermənistan Dağlıq Qarabağ münaqişəsinin həllində vasitəçilik edə bilər.

İran XİN başçısının sözlərinə görə, ölkəsi buna hazırdır və münaqişənin həllində töhfə vermək gücündədir. Bu açıqlamaya Ermənistan tərəfindən də reaksiya gəlib. Ermənistanın XİN idarəsinin rəhbəri Eduard Nalbandyan erməni KİV-nə bildirib ki, İranın Qarabağ münaqişəsinin həllində vasitəçilik etməsi normal olardı. Erməni nazir qeyd edib ki, İran hər zaman Qarabağ münaqişəsi ilə bağlı balanslı siyasət aparır.        Bu açıqlamalara münasibət bildirən politoloq Qabil Hüseynli bildirib ki, İran dünyanın taleyüklü problemlərini həll edəsi bir ölkə deyil: "Düzdü, İran Azərbaycanla qonşu dövlətdir, münaqişəyə coğrafi baxımdan yaxınlığı var. Bu məntiqə görə münaqişənin həllində iştirak edə bilər. Lakin töhfə verəcəyinə inanmıram". Q.Hüseynli Ermənistan XİN başçısının açıqlamasının isə ritorikadan başqa bir şey olmadığı qənaətindədir: "Ermənistan sözdə deyir ki, İran münaqişəyə vasitəçilik edə bilər. Amma əməldə gedib Rusiyanın, Fransanın və yaxud da Amerikanın ətəyindən yapışır. Yəni bu ritorikadır. Ermənistan XİN rəhbəri sadəcə olaraq İranın xətrinin xoş olmasına görə gəlişi gözəl olan sözlər deyir". Yaqub Məmmədovun Ali Sovetin və prezidentin səlahiyyətlərini icra edən vaxtı, Qarabağ münaqişəsi ilə bağlı İranın vasitəçilik etdiyini xatırladan politoloq bildirib ki, həmin vaxt da Şuşa işğal olunub: "Bu, hər zaman bizim yaddaşımızdadır. Prezidentlər İranda bir masa ətrafında oturan zaman Şuşa işğal olundu. Anlaşma memorandumu imzalanan vaxt isə erməni-rus qoşun birləşmələri Azərbaycan torpaqlarına soxuldular. Yəni İran bir dəfə vasitəçi qismində iştirak edib ki, onun da nəticəsini Azərbaycan xalqı gördü". Qabil Hüseynli vurğulayıb ki, İranın Qarabağ münaqişəsinin həlli ilə bağlı vasitəçiliyinə Azərbaycanın və yaxud da Ermənistanın razılığı məntiqsiz görünərdi: "Əgər məsələ bu dərəcədə beynəlmiləlləşibsə, regional miqyasdan çıxıbsa, beynəlxalq güclərin nəzarəti altındadırsa, təkrarən onu ya Azərbaycan, ya da ki Ermənistan regional müstəviyə qaytara bilməz axı. İran özü də bilir ki, Qarabağ məsələsi hansı güclərin nəzarəti altındadır. Ona görə də İranın vasitəçilik sevdası baş tutan deyil. Tutaq ki, biz bu güclərin nisbətini, formasını, say tərkibini, qane etməyən müddəaları dəyişməyə çalışırıq. Əgər bunlar alınmırsa, İranın vasitəçiliyi necə alına bilər?!" Nalbandyanın "İran Qarabağla bağlı balanslı siyasət aparır" deməsini isə politoloq cəfəngiyyat adlandırıb: "İran sadəcə olaraq Qəzza məsələsi ilə bağlı balanslı siyasət aparır. Yəni bildirir ki, İsrailin Qəzzanı bombalaması beynəlxalq hüquqa ziddir və s. Yəni balans budur. Azərbaycanın torpaqları Ermənistan tərəfindən işğal olunub. Bu birmənalıdır. Yəni Ermənistan işğalçı, Azərbaycan isə işğala məruz qalan dövlətdir. İranın bununla bağlı balanslı siyasəti nədir ki? Azərbaycanın torpaqlarını ermənilər işğal edib, əhalisini qırıb, bir milyondan artıq insanını isə öz dədə-baba torpaqlarından didərgin salıblar. Hər şeyi öz adıyla çağırmaq lazımdır. İran durub demir ki, Ermənistan işğalçıdır. Əksinə, Ermənistanla İran arasında müəyyən sahələrdə əməkdaşlıqlar var. İran o zaman balansı qoruyardı ki, Ermənistanı işğalçı, Azərbaycanı isə işğala məruz qalan kimi adlandırardı. Əgər bunu demirsə, o zaman balansdan söz gedə bilməz. Bu mənada Nalbandyanın məlum kəlməsi cəfəngiyyatdır". Şərq