GünAzTv: Dünən “Azərbaycan Respublikası və Türkiyə Respublikası arasında Yüksək Səviyyəli Strateji Əməkdaşlıq Şurasının qurulması haqqında Birgə Bəyannamə” (YSSƏŞ) imzalanıb.

Müqaviləyə Türk Ölkələri Başçılarının X Zirvə Görüşündə iştirak etmək üçün qardaş ölkəyə gedən Azərbaycan Prezidenti İlham Əliyev və Türkiyənin Baş naziri Rəcəb Tayyib Ərdoğan imza atıb. Hər iki ölkənin liderləri bu sənədin iki qardaş dövlət arasında əməkdaşlığın bundan sonrakı inkişafına daha böyük təkan verəcəyini vurğulayıblar.

Baş nazir Rəcəb Tayyib Ərdoğan dedi ki, YSSƏŞ iki ölkənin bundan sonra birgə həll etmək istədikləri problemlərin dərhal aradan qaldırılmasına vəsilə olacaq. “Strateji Əməkdaşlıq Şurası eyni zamanda “Azərbaycanın sevinci sevincimiz, kədəri kədərimizdir” deyən Atatürk və “Bir millət, iki dövlət” deyən mərhum Prezident Heydər Əliyevdən aldığımız bayrağı daha yüksək yerlərə daşımaq niyyətimizin təzahürüdür”,- deyən Baş nazir iki ölkə arasındakı münasibətlərin dünyada analoqu olmadığını xatırladıb və: “Yüksək Səviyyəli Strateji Əməkdaşlıq Şurası qardaşlığımızı daha da gücləndirən bir əsər olacaq”,- deyib. R. T. Ərdoğan həmçinin bu sənədin istər ikitərəfli, istərsə də regional əməkdaşlığa fayda verəcəyinə ümid etdiyini vurğulayıb. 1GÜNDƏM 03

Prezident İlham Əliyev sözügedən sənədin iki ölkə arasındakı əlaqələrin gələcək inkişafına təminat verdiyini söyləyib: “Tarixən mövcud olan əlaqələrimizin daha da genişləndirilməsi və dərinləşdirilməsi üçün bu gün (dünən-red.) imzalanmış sənədin çox böyük əhəmiyyəti var”. Prezident əslində bunun yalnız hüquqi sənəd kimi qiymətləndirilməsinin doğru olmadığını da bildirib: “Bu, adi bir saziş deyil. Bu, çox səmimi bir sənəddir. Bu, yalnız iki ölkə arasında imzalanmış müqavilə deyil, bu, ürəkləri və xalqları birləşdirən və xoş niyyətimizi ifadə edən bir əsərdir. Bu əsər yaşayacaq və bizi daha da xoşbəxt edəcək. Bu, bütün sahələrdə əməkdaşlığımızı genişləndirməyə, həmçinin öz fəaliyyətimizi birgə qurmağa və koordinasiyalı şəkildə davam etdirməyə imkan verir. Bu sənəd həmçinin imkan verəcək ki, Türkiyə-Azərbaycan əlaqələri uğurla, sürətlə və daha mütəşəkkil qaydada irəliyə getsin və xalqlarımız daha sıx birləşsin”.

Daha sonra liderlər jurnalistlərin suallarını cavablandırıblar. Sözügedən sənədin Dağlıq Qarabağ münaqişəsinin həllinə necə təsir edəcəyinə dair sualı cavablandıran Prezident Əliyev bu məsələnin iki ölkə arasındakı bütün danışıqların başlıca mövzusu olduğunu söyləyib: “Türkiyə 10 il əvvəlki Türkiyə deyil. Türkiyə böyük və qüdrətli dövlətdir. Türkiyənin güclənməsi bölgəyə də müsbət təsir edir. Türkiyə ilə hesablaşmamaq mümkün deyil. Türkiyənin gücü bizim gücümüzdür. Türkiyə Dağlıq Qarabağ məsələsində çox fəal siyasət aparır və əminəm ki, bunun müsbət nəticələri olacaq və Azərbaycanın ərazi bütövlüyü təmin olunacaq”.

“Qardaşım viza məsələsini ən qısa zamanda həll edəcək”

Liderlər iki ölkə arasında viza rejiminin qarşılıqlı şəkildə ləğvi ilə bağlı sualı da cavablandırıblar. Prezident Əliyev bununla bağlı daim məsləhətləşmələr aparıldığını söyləyib və deyib ki, Azərbaycanda daxili proseduralar tamamlandıqdan sonra bu məsələ müsbət həllini tapacaq.

Baş nazir Ərdoğan isə suala yumorla cavab verib: “Zatən bu məsələdə bizim tərəfimizdən problem yoxdur. Amma qardaşım da bu məsələni ən qısa zamanda həll edəcək”.

Qeyd edək ki, Azərbaycan Prezidenti İlham Əliyev dünən türkiyəli həmkarı Abdullah Gül ilə də görüşüb.