GünAzTv: İranda edama məhkum edilmiş təbrizli qadın Səkinə Məhəmmədi Aştiyaniyə beynəlxalq dəstək genişlənir.

Avropa Parlamentinin sədri Yeji Buzek İran hökumətini azərbaycanlı qadın Səkinə Məhəmmədi Aştiyaniyə qarşı çıxarılan edam hökmünü dəyişdirməyə çağırıb.

GünAzTv mətbuat mərkəzinin “Media forum”-a istinadən yaydığı məlumata görə, Buzek Strasburqda Avropa Parlamentinin plenar iclasını bu sözlərlə açıb: “Avropa Parlamenti istənilən halda ölüm hökmünə qarşı çıxacaq”. Avropalı deputatlar sədrin bu sözlərini alqışlarla qarşılayıblar.

Buzek xatırladıb ki, zinaya görə edama məhkum edilmiş Səkinə Məhəmmədi Aştiyaniyə indi də nalayiq hərəkətlərə görə növbəti şallaq cəzası kəsilib. Buna səbəb Britaniyanın “Tayms” qəzetinin dərc etdiyi fotoşəkildir. Səkinə Məhəmmədi Aştiyani olduğu bildirilən həmin fotodakı qadın hicabsızdır. Məhz buna görə də Aştiyaniyə yeni cəza - 99 şallaq təyin edilib.

2010-cu il avqustun 28-də “Tayms” qəzeti Aştiyaninin şəkli olduğu bildirilən bir foto dərc edib. Qəzet həmin fotonu İrandan qaçmış vəkil Məhəmməd Mustafayidən əldə etdiyini bildirib. Vəkil isə fotonu Aştiyaninin oğlu Səcəd Qadirzadədən aldığını iddia edib. Ancaq Səcəd Qadirzadə vəkilə şəkil vermədiyini bildirib. O eyni zamanda yeni hökmün anasının incidilməsini davam etdirmək üçün bəhanə olduğunu və bu hökmə qarşı apellyasiya şikayəti veriləcəyini vurğulayıb.

Roma Katolik Kilsəsi isə Aştiyaninin xilası üçün diplomatik vasitələrə əl atacağını bəyan edib. Vatikanın bəyanatında deyilir ki, daşqalaq yolu ilə edam - ölüm cəzasının ən qəddar növüdür.

Həmçinin  məşhur italyan futbolçusu, “Roma” futbol klubunun kapitanı Françesko Totti və Fransanın xarici işlər naziri Bernar Kuşner də Aştiyaniyə dəstək kampaniyasına qoşulublar.

Françesko Totti təbrizli qadını ölümdən qurtarmaq üçün “Gül atmaq, daş yox” devizi altında keçirilən kampaniyaya qoşulduğunu bəyan edərkən jurnalistlərə deyib: “Bizim yaşadığımız dövrdə daşqalaq yolverilməzdir. Mən qadınlara, uşaqlara, dünyanın bütün zəif insanlarına hörmət olunmasına böyük əhəmiyyət verir, buna təkid edirəm”.

Bernar Kuşner sentyabrın 6-da jurnalistlərə deyib ki, Səkinə Məhəmmədi Aştiyanini ölümdən qurtarmaq üçün əlindən gələni əsirgəməyəcək: “Fransa Aştiyaniyə dəstək verir. Mən şəxsən əlimdən gələn hər bir işi görməyə hazıram. Lazım gəlsə, mən Səkinənin nicatı üçün Tehrana səfər etməyə də hazıram”.

Xatırladaq ki, Səkinə Məhəmmədi Aştiyani Təbrizdəndir. 5 ildir İranda həbsdə saxlanır. O, əri qətlə yetiriləndən sonra iki kişi ilə zina etməkdə günahlandırılaraq 2005-ci ildə həbs olunub. Təbriz məhkəməsi əvvəlcə onu 99 şallaq zərbəsinə məhkum edib və hökm icra olunub. Sonradan Səkinə Məhəmmədi Aştiyaniyə yeni iş açılıb. O, ərinin qətlində iştirakda və onun sağlığında da zinakarlıq etməkdə günahlandırılıb, daşqalaq yolu ilə edama məhkum olunub. Azərbaycanlı qadın ona qarşı irəli sürülən bütün ittihamları rədd edir.