Rusiyanın Ukraynanı qaranlığa qərq etmək planı üzə çıxdı

SON XƏBƏRLƏR

Rusiyanın Ukraynanı qaranlığa qərq etmək planı üzə çıxdı

2026.10.02, 22:57

Gunaz.tv

“Gunaz TV”nin məlumatına görə, “New York Times” qəzeti Ukraynanın kəşfiyyat məlumatlarının ələ keçirilməsi yolu ilə əldə etdiyini bildirdiyi Rusiya sənədinə istinadən yazıb ki, Moskva qış mövsümündə Ukraynanın enerji infrastrukturuna genişmiqyaslı hücuma hazırlaşır.

Sənədə əsasən, avqust ayında hazırlanmış bu planda Rusiyanın əməliyyat zamanı 1000-ə qədər raket, pilotsuz uçuş aparatı və bombadan istifadə edə biləcəyi bildirilir. İstilik və su elektrik stansiyaları, elektrik yarımstansiyaları və istilik sistemləri hücumların əsas hədəfləri sırasındadır.

Plan həmçinin Ukraynada fəaliyyət göstərən üç nüvə elektrik stansiyası ilə əlaqəli elektrik yarımstansiyalarına hücumları da əhatə edir. Sənədə görə, bu addım həmin stansiyaların elektrik şəbəkəsindən çıxarılmasına səbəb ola bilər.

Su təchizatı infrastrukturu, o cümlədən nasos stansiyaları və tullantı suların təmizlənməsi qurğuları da hədəflər siyahısına daxil edilib. Planda Kiyev, Xarkiv və Odessa əsas hədəflər kimi göstərilir və bu şəhərlərdə elektrik və istilik təchizatının ciddi şəkildə azaldılması, kanalizasiya sistemlərinin isə genişmiqyaslı şəkildə sıradan çıxarılması nəzərdə tutulur.

“New York Times” qəzetinin bildirdiyinə görə, nəşr sənədin həqiqiliyini müstəqil şəkildə təsdiqləyə bilməyib və Moskvanın sənəddə qeyd olunan bütün addımları həyata keçirib-keçirməyəcəyi məlum deyil. Bununla belə, Rusiya Prezidenti Vladimir Putin daha əvvəl açıq şəkildə Moskvanın qış aylarında Ukraynanın enerji infrastrukturuna qarşı genişmiqyaslı kampaniyaya hazırlaşdığını bildirib.

Gunaz TV
R.G

GUNAZ.TV

SON XƏBƏRLƏR