GünAzTv: Yaxın Şərqə dair sülh danışıqları qalmaqal yaradıb, İran xarici işlər naziri Misirə buraxılmadı.

İsraillə Fələstin arasında uzun müddətdən sonra yenidən başlayan birbaşa sülh danışıqları qalmaqalla müşayiət olunur. Ötən həftə Fələstin administrasiyasının lideri və İsrailin baş naziri Benyamin Netanyahu Vaşinqtonda ABŞ (Amerika Birləşmiş Ştatları) dövlət katibi Hillari Klintonun vasitəçiliyi ilə görüşüblər.

Danışıqlarda İordaniya və Misir liderləri də yer alıb. İran və onun dəstəklədiyi “Hizbullah”la “Həmas” təşkilatları isə dərhal bəyan ediblər ki, bu danışıqları tanımırlar və onun uğursuzluğa düçar olacağı bəribaşdan aydındır. İran isə birbaşa danışıqların baş tutmasından xüsusilə qəzəblidir və Vaşinqton görüşünü təşkil edənlərə, həmçinin orada iştirak edənlərə sərt reaksiya verib. Prezident Mahmud Əhmədinejad bildirib ki, Mahmud Abbasın bu danışıqları aparmaq üçün heç bir mandatı yoxdur: “Fələstinlilərin adından danışmağa ona kim səlahiyyət verib? Onun nə haqqı var ki, Fələstin adından danışsın? Mahmud Abbas kimdir ki, Fələstin ərazilərini düşmənə versin?” - deyə Əhmədinejad Tehrandakı çıxışında bildirib.Ona Fələstin administrasiyası liderinin cavabı da kifayət qədər sərt olub. Mahmud Abbasın şəxsi nümayəndəsi Abu Rudeyn onun adından bildirib ki, Əhmədinejadın Fələstin liderini tənqid etməyə heç bir haqqı yoxdur. “Üstəlik, onun İran xalqı adından danışmağa səlahiyyəti də yoxdur. Əhmədinejad prezident seçkilərini saxtalaşdırıb və fırıldaq yoluyla hakimiyyətə gəlib. Ona görə də bu cür ”moşennik"in Fələstin və onun təmsilçiləri barədə danışmaq haqqı çatmır" deyə Abbasın təmsilçisi bildirib. Müşahidəçilə qeyd edirlər ki, Fələstin administrasiyasının rəhbərliyi ilə İran arasında bu cür sərt polemika heç vaxt yaşanmayıb. Bu baxımdan gözlənilir ki, İran İsraillə Fələstin arasında başlayan sülh danışıqlarını pozmaq üçün öz rıçaqlarından istifadə edəcək. ABŞ dövlət katibi bəyan etmişdi ki, prezident Obama bir il ərzində bu problemin həllinə nail olmaq istəyir.İran təkcə Fələstin administrasiyasını deyil, Vaşinqton danışıqlarına dəstək verən İordaniya və Misiri də tənqid edir. Xarici işlər naziri Manuçehr Mottəki bu danışıqları şərh edərək deyib ki, ərəb ölkələrində ABŞ-a tabe olan liderlər var. Lakin onlar başa düşməlidir ki, öz xalqlarına qarşı satqınçılıq mövqeyindədir. Mottəkinin Misirə səfər ərəfəsində verdiyi bu açıqlama rəsmi Qahirəni qəzəbləndirib. Misir hakimiyyəti bəyan edib ki, İran xarici işlər nazirinin səfəri ləğv olunur. Rəsmi Qahirə Mottəkinin sözlərini təhqir kimi qiymətləndirib və bildirib ki, Misir liderlərini “satqın” adlandıran şəxslə danışıqlar aparmaq istəmir.