İranın Gülüstan əyalətinin Qalikeş şəhərində vəziyyət gərgindir

SON XƏBƏRLƏR

İranın Gülüstan əyalətinin Qalikeş şəhərində vəziyyət gərgindir - VİDEO

2021.12.24, 07:58

Gunaz.tv

Sosial şəbəkələrdə yayılan video və məlumatlara əsasən, dekabrın 23-ü axşam saatlarında sünni axundun yüzlərlə tərəfdarı küçələrə axışaraq, “Allahü əkbər” və digər şüarlar səsləndirərək mövləvi Məhəmməd Hüseyn Qorqiçin Qalikeşin cümə imam vəzifəsindən kənarlaşdırılmasına etiraz bildiriblər.

Yayılan məlumata görə, polis və təhlükəsizlik qüvvələri onlarla etirazçını həbs etsə də, bəzi mənbələr həbs olunanlardan çoxunun dindirildikdən sonra azadlığa buraxıldığını iddia edirlər.

Qeyd edilir ki, İran təhlükəsizlik qüvvələri sünni axundun özünü də həbs edib dindirdikdən sonra müvəqqəti sərbəst buraxıblar.

Yerli sünni mənbələrin yaydığı xəbərdə deyilir ki, İranın təhlükəsizlik qüvvələri mövləvi Məhəmməd Hüseyn Qorqiçə təzyiq göstərərək, deyiblər ki, o bu gün (dekabrın 24-də) Qalikeşdə keçiriləcək cümə namazına başçılıq etməkdən imtina etməli, tərəfdarlarını sakit qalmağa çağırmalıdır.

Bu arada Sistan-Bəlucistan əyalətindəki Zahidan şəhərinin sünni məzhəbli “cümə imamı” mövləvi Əbdülhəmid İsmayılzehi İran lideri Əli Xamneyiyə məktub yazaraq, sözü gedən sünni ruhani ilə belə davranılmasını başa düşə bilmədiyini və bunu həzm edə bilmədiyini bildirərək, onun işə qarışmasını və sünni axunda göstərilən təzyiqlərin dayandırılmasını tələb edib.

“Bu məsələ “sünni-şiə” qardaşlığına zidd addımdır. Mövləvi Qorqiçin işdən azad edilməsini heç nə ilə izah etmək olmur. Bu iş yerli sünnilərin məyus olmasına gətirib çıxarıb, böyük narahatlığa səbəb olub”, -deyə Zahidanın sünni məzhəbli “cümə imamı” mövləvi Əbdülhəmid İsmayılzehi Xamneyiyə yazdığı məktubunda bildirib.

Qeyd edək ki, son günlər Qalikeşin cümə imamı mövləvi Qorqiç namaz xütbələrindəki çıxışlarında ölkədə sünni məzhəbli əhaliyə qarşı təzyiqlərin göstərilməsinə, hər yerdə və hətta rəsmi tribunalarda “sünni müqəddəslər”nin təhqir edilməsinə etiraz bildirərək, bu kimi hərəkətlərə son qoyulmasını tələb edtmişdi.

Bunun ardınca, İran lideri Əli Xamneyinin Gülüstan əyalətindəki nümayəndəsi bir neçə gün əvvəl hər hansı bir səbəb göstərmədən Qalikeşin cümə imamı olan mövləvi Məhəmməd Hüseyn Qorqiçi tutduğu vəzifəsindən kənarlaşdırmışdı. Bu isə yerli sünnilərin qəzəbinə gətirib çıxarıb.

بیوگرافی مولوی گرگیج او کیست؟ +فیلم توهین مولوی گرگیج به شیعه

Mövləvi Məhəmməd Hüseyn Qorqiç

VİDEO:

A.M

GUNAZ.TV

SON XƏBƏRLƏR