Tədbir antiazərbaycan və ermənipərəst mövqeyi ilə tanınan ekspert Dr. Əhməd Kazıminin “Beynəlxalq hüquq aspektindən Azərbaycan Respublikasında azlıqların hüquqları” adlı kitabının təqdimat mərasimi adı altında baş tutub.

Yanvarın 19-da keçirilən mərasimdə müəllifin verdiyi informasiyalar və onun müvafiq sahədə uzun illərdir davam edən antiazərbaycan fəaliyyətləri kitabın Azərbaycanın milli təhlükəsizliyi və suverenliyi əleyhinə çağırışlar ehtiva etdiyini göstərir.

Keçirilmiş “elmi konfrans”da “İran Tatşünaslıq Assosiasiyası”nın rəhbəri Abbas Rəhmani, “Tehranda Məskunlaşan Talışların Assosiasiyası”nın sədri Məcid Neməti Siyahməzgi, Tehranın Azad İslami Universitetinin Xarici dillər kafedrasının erməni əsilli müəllimi Andranik Simonyan, “Qafqaz Araşdırmaları Fondu”nun icraçı direktoru Cəfər Xaşe, İran ermənilərinə məxsus “Hur Tərcümə və Tədqiqat İnstitutu”nun İdarə Heyətinin rəhbəri İsak Yunansiyan, dosent Hadi Rəhmani Səid, Avrasiya və media üzrə aparıcı tədqiqatçı Həsən Behiştipur və kürd milləti üzrə araşdırmaçı Cəfər Əbdülmülki kimi antiazərbaycan simalar iştirak ediblər. Müxtəlif millətlərdən olan sözügedən “ekspertlər”in “simvolik olaraq” tədbirə dəvət edilməsi “həmin millətlərin nümayəndələrinin Azərbaycanda yaşaması” ilə əlaqələndirilib.

İranın İRNA və “Mehr” xəbər agentlikləri, eləcə də İranın Məhkəmə Sisteminə aid “Mizan” informasiya saytı mərasimlə bağlı geniş məlumatlar yayıblar.

Ə.Kazımi kitabı Azərbaycan Respublikasında “etnik, din, dil və milli azlıqlar daxil olmaqla” 4 qrup “azlıq” üzrə yazdığını bildirib. Kitab 4 hissə, 16 fəsil və 608 səhifədən ibarətdir. Müvafiq beynəlxalq hüquq və konvensiyalara istinad etdiyini iddia edən müəllif Azərbaycan Respublikasını etnik və dini azlıqlara qarşı “sistematik diskriminasiya və mədəniyyət soyqrımı həyata keçirmək”də ittiham edib. Müxtəlif dillərdə mənbələrlə yanaşı, Azərbaycan Respublikasında fəaliyyət göstərdiyi 5 il ərzindəki “təcrübəyə də əsaslandığı”nı deyən Ə.Kazımi kitabda “yaşamaq hüququ, kollektiv kimlik hüququ, mədəni hüquqlar, dini hüquqlar, linqvistik hüquqlar, iqtisadi hüquqlar, əlaqə hüququ, effektiv iştirak hüququ, bərabərliyə əsaslanan inteqrasiya hüququ və öz müqəddəratını təyin etmə hüququ” kimi mövzulara toxunduğunu qeyd edib. Kitabda “öz müqəddəratını təyinetmə hüququ” bu zəmində Azərbaycanın ərazi bütövlüyü və suverenliyinə qarşı hədəflənmiş əsas aspektlərdən biridir.

​Ə.Kazımi kitabda Azərbaycan Respublikasının “diskriminasiya siyasəti”nə əsasən azlıqları iki qrupda - “seçilmiş” və “adi” azlıqlar qismində kateqoriyalaşdırıb. Türk əsilli xalqları və yəhudilər kimi dini azlıqları “seçilmiş” azlıqlara daxil edib, digər etnik azlıqları və şiə məzhəbinə etiqad edənləri “adi” azlıqlar (? – red.) kateqoriyasında qruplaşdırıb. Azərbaycan hökumətinin “adi” azlıqlara qarşı “mövcudluq hüquqlarından tutmuş sistematik olaraq etnik təmizləmə və mədəniyyət soyqrımı həyata keçirməklə” onların “hüquqlarını kəskin şəkildə pozduğu”na dair dezinformasiya və ittihamlara yer verib.

Ə.Kazımi azərbaycanda etnik və dini düşmənçilik zəminində ədavət, parçalanma və iğtişaşları qızışdırmaq məqsədilə yazdığı kitabda ölkədə “panazərizm”, “pantürkizm” və “panturanizm” ideologiyalarının yayılması ilə paralel olaraq “şiə izlərinin silinməsi” prosesinin cərəyan etdiyini iddia edib.

O, həmçinin kitabın ərsəyə gətirilməsi ilə bağlı etdiyi çıxışda Azərbaycanda Çar Rusiyası və Sovet imperiyası dövründə olduğu kimi, azlıqlarla bağlı məlumat “çatışmazlığı” və mövcud olan məlumatların “saxtakarlıq” və “nifrət aşılayan məzmunla” dolu olduğuna dair əsassız fikirlərə də yer verib.

Qeyd edək ki, bu son 1 ay ərzində İranda Azərbaycan əleyhinə keçirilən mərasim və tədbirlərin davamıdır.

Bundan əvvəl dekabrın 29-u və yanvarın 18-də də Ərdəbil şəhərində Əli Xaməneinin əyalətlədki nümayəndəsi və şəhərin cümə imamının təşəbbüsü ilə antiazərbaycan mətasimləri baş tutub.

GünazTV