Britaniya mediası bildirir ki, öncə dörd İran vətəndaşı da daxil olmaqla beş kişi şənbə günü İngiltərənin müxtəlif yerlərində həbs edilib. Daha sonra terrorla mübarizə polisi Londonda ayrıca əməliyyat həyata keçirərək daha üç iranlını həbs edib. Terrorla mübarizə polisindən verilən bəyanatda qeyd edilib ki, 3 şəxsin Böyük Britaniyanı tərk edəcəkləri və ya sübutları məhv edəcəkləri ehtimalına qarşı əməliyyat mümükün qədər tez həyata keçirilib.

Daxili işlər naziri bu əməliyyatı son illərin ən böyük anti-terror əməliyyatlarından biri kimi təsvir edib.

“The Telegraph” nəşri hesab edir ki, həbs edilən İranlı terrorçuların hədəf siyahısında İsrail səfirliyi də ola bilərdi. Ehtimal olunur ki, şübhəli terrorçular terror aktını həyata keçirməyə sadəcə bir neçə saat qalmış saxlanılıblar. 

"Londonun qərbindəki Kensinqtondakı İsrail səfirliyi planlaşdırılmış hücumun hədəfi olduğu aydın olur," - “The Telegraph” 8 may tarixində paylaşdığı yeni xəbərdə bildirir. 

Çərşənbə axşamı ölkənin təhlükəsizlik naziri Dan Jarvis, İcmalar Palatasında bir neçə deputatın təzyiqinə baxmayaraq həbs olunan şəxslərin immiqrasiya statusu ilə bağlı təfərrüatları açıqlamaqdan imtina etib. "Hazırda nazirlərin nə deyə biləcəyinə dair çox ciddi məhdudiyyətlər var," -Dan Jarvis əlavə etdi. 

Skotland Yard antiterror əməkdaşları və Mİ-5 2022-ci ilin yanvar ayından Böyük Britaniyada İranın dəstəklədiyi iddia edilən 20-dən çox terror planının qarşısını alıblar.

Terrorla mübarizə komandanlığının rəhbəri, Dominik Merfi açıqlaması zamanı bildirdi ki, hazırda əlavə məlumat verə bilməməklərinin əhəmiyyətli səbəbləri var: "Mümkün olan ən qısa zamanda əlavə təfərrüatları paylaşmağa çalışacağıq və bu arada ictimaiyyətdən ayıq qalmalarını və hər hansı bir narahatlığınız olarsa bizimlə əlaqə saxlamalarını xahiş edirik."

Qeyd edək ki, Svindon bölgəsində 29 yaşlı kişi, Londonun qərbində 46 yaşlı kişi, Stokport bölgəsində 29 yaşlı kişi, Roçdeyl bölgəsində 40 yaşlı kişi və Mançester bölgəsində 24 yaşlı kişi saxlanılıblar.

İlk dörd nəfər 2006-cı il Terrorizm Aktının 5-ci bəndinə zidd olaraq terror aktı hazırlamaqda şübhəli bilinərək, beşincisi isə Polis və Cinayət Sübutları Qanununa əsasən saxlanılıb.

İran Böyük Britaniyanı xarici təsirdən qorumaq məqsədi daşıyan xarici təsirlərin qeydiyyatı sisteminə (FİRS) daxil olan ilk xarici ölkədir. Bu o deməkdir ki, rejim tərəfindən Böyük Britaniyada fəaliyyət göstərmək üçün göstəriş verilən hər kəs fəaliyyət istiqamətini bəyan etməli, əks halda qanun iyulda qüvvəyə mindikdən sonra beş il həbs cəzası ilə üzləşə bilərlər.

Şahin Elxanoğlu