İranda hicab qadağası davam edir - Polis xəbərdarlıq etdi

SON XƏBƏRLƏR

İranda hicab qadağası davam edir - Polis xəbərdarlıq etdi

2025.10.10, 14:39

İran polis qüvvələri ölkədə bütün iş yerləri və ictimai iaşə obyektlərindən hicab qaydalarının riayət etmələrini tələb edib və əks təqdirdə onları fəaliyyətlərinin qadağan ediləcəyi ilə təhdid edib.

Gunaz.tv

İran Polis Komandanlığının xəbərdarlıq bəyanatında deyilib:

"Ölkənin bütün iş yerləri və ictimai məkanlarında qanun və qaydalara riayət olunmalıdır, əks halda onların fəaliyyəti dayandırılacaq, obyektlər möhürlənəcək",- bəyanatda bildirilib.

Buna səbəb kimi, “bir sıra ticarət mərkəzlərində, xüsusilə iaşə obyektlərində ictimai ədəb-ərkan və sosial normalara zidd olan bəzi reklamların, şəkillərin və kliplərin yenidən dərc edilməsi” göstərilib.

İctimai Yerlərə Nəzarət Polisinin İnformasiya Mərkəzinin yaydığı bəyanatda da oxşar təhdidlər səsləndirilib:

"Qaydalara riayət olunmadıı təqdirdə iş yerləri və ticarət obyektlərinin sahiblərinə qarşı hüquqi ölçü götürülməsi ilə yanaşı, həmin obyektlərin fəaliyyətlərinin dayandırılması və lisenziyalarının ləğv edilməsi məsələsi də gündəmdədir".

Tehranın İctimai Yerlərə Nəzarət Polisinin rəisi Əli Rəfiyi bildirib ki, polislər restoran, kafe və başqa bu kimi yerlərdə hicab qaydalarını pozanlara qarşı fəaliyyət göstərirlər.

“Polis bu məsələdə böyük həssaslıq və dəqiqliklə hərəkət edir, istənilən ictimai proqram, o cümlədən konsertlər, şənliklər və mədəni mərasimlər qanunlara və islam qaydalarına riayət edilməklə keçirilməlidir, əks təqdirdə, təşkilatçılar məsuliyyətə cəlb olunacaqlar”,- o xəbərdarlıq edib.

Bununla eyni vaxtda Kiş adasının baş prokuroru Əli Salimizadə də oxşar bəyanatla çıxış edib və islam qaydalarının pozulmasına yol açan mərasimlərin keçirilməsinə icazə verən məsul şəxslərin və dövlət qurumlarının da məsuliyyətə cəlb olunmalarını istəyib.

Qeyd edək ki, ötən həftə İran Məsləhət Şurasının üzvü Məhəmməd Rza Bahünərə istinadən "İranda məcburi hicab qanununun tətbiqi dayandırıldı" məzmunlu məlumatlar yayılıb, bu isə həqiqəti əks etdirmir.

Bu günə kimi məcburi hicab qaydaları ilə bağlı tətbiq etmələr davam edir, sadəcə İbrahim Rəisinin prezidentliyi dövründə təklif olunan və qaydaların daha da sərtləşdirilməsini nəzərdə tutan "hicab qanun layihəsi" qəbul olunmayıb.

İran Ali Milli Təhlükəsizlik Şurası yeni qanunun qəbulunun etiraz dalğalarının başlamasına səbəb olacağını deyib, bunun ölkənin milli təhlükəsizliyə zərbə vuracağı barədə xəbərdarlıq edib.

GünazTV

GUNAZ.TV

SON XƏBƏRLƏR